Uumama 44 - KITAABA WAAQA

¹ Jennaani Yusufuuni hojattu mana isaa qorqorattu yaame waan jed'eeni, Subba worraa, haga worri baachu dandau, guuti, beese nama ch'ufale subba keesa mid'aani gubbaa kayi.

² Muduunu tiyya ta qarsi, subba much'a maand'icha keesa, mid'aani gubbaa, beese isaa woliini kayi. Jennaani namichi akuma Yusufuuni iti hime kaani tolche.

³ Lafti bariite jennaani worrafi harrele worrale gad'iisani.

⁴ Worri diqo dira ira fagaate jennaani Yusufuuni namicha hojattu mana isaa kaani yaame waan jed'eeni, Worra suni hurrisi hordofi, faana d'ai, yo d'aqabde waan jettuuni, Galati keesani kana? Waan dansa argattani jennaani waan hamtu naa deebiftani?

⁵ Isani muduunu qarsi ta abba kiyya maafi hattani? Inni tanaani d'uge tanaani inhimne? Guddo waan hamtu tolchitani!

⁶ Namichi hojattuuni kaani worra d'aqabe jennaani dubbi taani worrani jed'e.

⁷ Worri waan jed'eeni, Aabbo, atini maafi dubbi akana tana nuuni jetta? Nu inkakhanna, aka waan akana kana intolchini.

⁸ Nu ufuftu beese onana subba keenna keesati garre, lafa Kanaaniti, sii deebimne, imbeeta; amma duuba akami qarsi yokhaani worqi mana abba keeti keesaa hanne?

⁹ Aabbo, waan suni nu nama irati arganifu ha ijeesani, nuleeni worri hafe tissele tante taana.

¹⁰ Inni waan jed'e, ha taatu, ammo nama muduunu irati argani ch'allati tisse naa taha, isani kaani d'ibi dubbi womatu iraa inqabu.

¹¹ Jennaani nami ch'ufti maro tokotu miha isaa harre iraa hiikhate subba ufii babane.

¹² Namichi hojattuuni kaani subba nama ch'ufa ka angafa iti keeyate ka maand'atii d'aabe soqe barbaade, duuba muduunu subba Benjamini keesati arge.

¹³ Jennaani worri laalefate woya ufii tatarsaase, harrele faate dirati deebie.

¹⁴ Yo Yudafi oboleyaani isaa mana Yusufutiini bahani, inni manuma jira. Isa durati gadijennaani

¹⁵ Yusufuuni waan jed'eeni, Isani maani tolchitani? Aka nami aka kiyya wa himu imbeetani?

¹⁶ Yudaani waan jed'eeni, Nu maani siini jenna, Aabbo? Akami jenne ufi qulqulleesina? Waaqi ya ch'ubbu teenna mullise, nuuni ch'ufti amma tana tisse teeti, nama muduunu irati argani ch'allaniti.

¹⁷ Yusufuuni waan jed'eeni, Hiyo, ani akasi imfed'u! Nama muduunu irati argani ch'allati tisse naa taha; isani kaani nagayaani abba keesaniti gala.

Aka Yudaani Benjaminifi kad'ate

¹⁸ Yudaani Yusufuti hiiqe waan jed'eeni, Aabbo, nati indallaniini, ato sifi Faraoni wolqit'e taatanile anini wa siini jechu fed'a.

¹⁹ Aabbo, atini waan nuuni jette, Isani abbaafi oboleyaani tokole qabdu?

²⁰ Nu waan siini jenne, Nu abba inqamna, inni jaarsa; oboleesa maand'ichale inqamna, ka inni jaaruma keesa d'ale. Oboleesi gurba suni ka garaa injiru, garaani haad'a suni isuma ch'allati hafe, tanaafi abbaani isa guddo jaalate jenne.

²¹ Aabbo, atini, Isa argu fed'a, natiini koota nuuni jette;

²² nu waan jenne, Gurbaani dandae abba biraa indeemu, yo inni deeme jaarsi indua jenne.

²³ Jennaani atini waan nuuni jette, Yo oboleesa keesani maand'ichaani d'uftani male, deebitani na dura inejatina.

²⁴ Nu gara aabbo dachaannaani waan atini nuuni jette iti himne.

²⁵ Jennaani inni, Dachaa, sagale diqo toko nu bita jed'e.

²⁶ Ammo nu waan jenneeni, Yo oboleesa keenna maand'ichaani yaani male, dandeenne namicha suni dura inejannu. Yoi nu yaanu yo oboleesi keenna maand'ichi nu woliini deemu ch'alla.

²⁷ Abbaani keenna waan nuuni jed'e, Niitiini tiyya Raheliini ijoolle d'iira lama ch'alla naa d'alte, imbeetani.

²⁸ Toko amma na bira injiru, haga inni na biraa deeme deebie ingarre; hegeri ya bineensi alaa nyaate hobaase.

²⁹ Anini ya jaare hobae, yo takacha kana naraa fuutani inni wo tahele, anini dandae naasuu iraa inhafu, inuma dua nuuni jed'e.

^30-31 Amma aabbo, yo anini gurba male abba keennati gale, innileeni aka gurbaani nu bira, injirre arge, hojuma suni dua. Jireenni isaa gurba kana, yo isa d'abe dandae iraa inhafu.

³² Tana male, waan anini aabbooni jed'e, Duaa jireenna isaa gubbaa tiyya, yo anini gallaani isa si duraani ind'ufini, wollaali ha kiyya tahu haga jiru jireennale.

³³ Amma aabbo, nati fulla gurba tisse sii taha, inni ha oboleyaani ufii woliini galu.

³⁴ Anini eesa gurba male dandae abba kiyyati gala? Gaargala hama ka sila abba kiyyati d'ufu obsu indandau.