Uumama 40 - KITAABA WAAQA

¹ Eegi guddo turani worri hayyicha Misiri hojatu, ka toko daad'i gololchufi ka kaani qit'a d'aabu, hayyu dallansiisani.

² Faraoni guddo dallane

³ worra lachu mana gudda askarti keesati hid'e, fulluma Yusufu iti hid'ani taaniti.

⁴ Worri hid'aansa suni keesati ture, guddaani askartileeni Yusufu hojattu worraa tolche.

⁵ Halkani toko hojattuuni hayyu taani lachu oobju ufii oobjatte, oobjuuni worraa suni waan garagara himte.

⁶ Yo Yusufuuni diirama worrati d'ufe, worri gammada inqabu.

⁷ Duuba inni waan jed'eeni, Fuuli keesani arra eesa gammada inqamne?

⁸ Worri waan jed'eeni, Nu lachu oobjanne, nama waan oobju suni nuti himu d'amne. Jennaani Yusufuuni waan jed'eeni, Himaansi ka Waaqatiniti? Me, oobju teesani nati hima.

⁹ Duuba namichi daad'i gololchu kaani waan jed'eeni, Oobju tiyya keesati mukha zabibu ufi durati arge.

¹⁰ Mukhi suni dame sadi qaba; dameeni baala baafte, daraaraani mullate, mid'aanileeni bilchaatani.

¹¹ Anini muduunu Farao harkaa qaba; duuba mid'aani kaani mukha iraa buqise muduunuti miich'e bisaani keesaa yaase isaati kenne.

¹² Jennaani Yusufuuni waan jed'eeni, Wonti isiini himtu kuno tana: dameeni sadeeni guyya sadi.

¹³ Guyya sadi keesati hayyuuni si fuud'e sii araarame huji te ta duriti sii deebise, akuma duri daad'iini gololchitu kaani gololchita.

¹⁴ Ammo yo wonti ch'ufti sii mid'aade na qaabad'i, hayyuti naa haasai, aka akanaani mana kana keesaa na baasani.

¹⁵ Qarele lafa Ebrania keesaa irreeni na fuud'ani, armalle, ka anini woma iyyakini, naani d'ufani boola tana keesa na buusani.

¹⁶ D'aabduuni qit'a kaani, aka himaansi oobju gololchitu daad'i dansa arge, jennaani waan Yusufuuni jed'e, Anileeni akana oobjad'e; dadu sadi, ta qit'a miju, mata iraa qaba.

¹⁷ Dadu gubbaa aantu sagale miooftu, ta gosa heddu, ta Farao d'aabaniti ke jira, ammo simpirreeni sagale suni dadu keesaa guurate nyaatte.

¹⁸ Yusufuuni waan jed'eeni, Daduuni sadeeni suni guyya sadi.

¹⁹ Guyya saditi Faraoni si fuud'e mata siraa kuta! Duuba mukhati si fannise, allaatini fooni kanke nyaatti.

²⁰ Guyya sadeeso eegi oobju taani, maro qaabacha d'aloota isaatiifi, Faraoni jila hojattu isaati tolche; gololchitu daad'itiifi d'aabdu qit'a fuud'e hojattu ufii gurgudo duraani d'ufe.

²¹ Inni gololchitu daad'i huji isaa ta duriti deebise, aka inni akuma duri isa gololchu;

²² ammo inni d'aabdu qit'aa kaani mukhati fannise, akuma Yusufuuni hime kaani.

²³ Ammo ato akasile taate, gololchituuni daad'i kaani qonqo Yusufu taani ded'e ituma deebie dubbi isaale ira imbaane.