Uumama 4 - KITAABA WAAQA

¹ Duuba Adamuuni Hawai niiti tolfate, isiini garaachoofte Kaini d'alte waan jette, Qarqaarsa AABBO Waaqatini ya ilma argad'e.

² Eegi suni ilma d'ibi d'alte maqa Habili baafteefi. Habiliini nama ree tissu, ammo Kainiini nama oobru qotu.

³ Eegi turani, gaafa toko Kainiini waan oobru keesaa argate d'ufeeni AABBO Waaqaa baase.

⁴ Habiliini ree qara d'alate qale fooni gabbo AABBO Waaqaa baase. AABBO Waaqi waan Habiliini baaseefi jaalate iraa fud'ate,

⁵ ammo Kainifi waan inni baase fud'achu dide. Duuba Kainiini aka hama dallane garaa hammaate.

⁶ Jennaani AABBO Waaqi waan jed'eeni, Atini maafi akana dallante garaa hammaatte fuula guurta?

⁷ Yo waan dansaa tolchite sila waan atini baaftu siraa fud'atani, ammo waan atini waan hamtu tolchiteefi ch'ubbuuni balbala keesa kurfo teete si eegatti. Isiini si qabachu feeti, ammo atini dabsachu malte.

⁸ Jennaani Kainiini waan oboleesa isaa Habiliini jed'e, Oobru nu yaasi. Achi geennaani Kainiini oboleesa isaa Habiliti garagale d'ae ijeese.

⁹ Duuba AABBO Waaqi Kaini gaafate waan jed'eeni, Oboleesi kanke Habiliini me? Inni waan jed'eeni, Anini imbeekhu. Qara oboleesa kiyya nati tissa?

¹⁰ AABBO Waaqi waan jed'eeni, Atini maafi waan hamtu akana tana tolchite? D'iigi oboleesa keeti qonqo lafa iraa iyyitu nati fakaata.

¹¹ Amma si abaarani, lafa d'iigi oboleesa keeti harka keetiini irati jige, isiini liqimsite, keesaa si gussani.

¹² Yo atini lafa qotatte, lafti deebite woma sii imbaaftu; worra d'abde seseega taate lafa marta.

¹³ Duuba Kainiini waan AABBO Waaqaani jed'e, Abaarsi kunini la haga nati dabre nati guddate.

¹⁴ Atini ya fuula kanke duraafi lafa tana iraa na gussite, worra d'abe seseege lafa mare, ammalle nami na argu ch'ufti na ijeesa.

¹⁵ Jennaani AABBO Waaqi waan jed'eeni, Akasiniti, yo nami si ijeese maro torba haalo baasani. Duuba AABBO Waaqi beesisa Kaini ira kaye, aka nami isa arge inijeemne.

¹⁶ Akasiini Kainiini fuula AABBO Waaqa duraa kae biraa deeme, lafa Nodi ta Edeniini ilaboru tae.

Ilmaani Kaini

¹⁷ Kainiini niiti fuud'e, isiini garaachoofte Henoko d'alteefi. Duuba eege inni dira jaare, dira sunile maqa ilma isaa gula Henoko baaseefi.

¹⁸ Henokooni Iradi d'ale, Iradiini Mehuyaeli d'ale, Mehuyaeliini Methushaeli d'ale, Methushaelini Lameki d'ale.

¹⁹ Lamekiini nad'eeni lama fuud'e, ta qara maqaani Ada, taani maqaani Sila.

²⁰ Adaani Yabali d'alte. Inni abba worra hori horate waaro keesa tau.

²¹ Oboleesa isaa maqaani Yubali; inni abba worra sirbaa, ka kerarifi fulludo d'au.

²² Silaleeni Tubal-Kaini d'alte; inni nama qara sibiila diimafi sibiila guraacha tume. Oboleetiini Tubal-Kaini Naama.

²³ Lamekiini waan nad'eeni isaatini jed'e, Adafi Sila, dubbi tiyya ch'aqasa; isani nad'eeni Lameki, jecha kiyya d'agaya: anini nama na madeese yokhaani kaima na d'aane la ijeese.

²⁴ Yo haalo Kaini maro torba baasani, ta Lameki maro torbatami torba baasani.

Sethifi Enoshi

²⁵ Adamufi niitiini isaa ilma d'ibi d'alani jennaani isiini waan jette, Waaqi ya ilma naa kenne fulla Habili, ka Kainiini ijeese; tanaafi isiini maqa isaa Sethi baafteefi.

²⁶ Sethiini ilma d'ale maqa Enoshi baaseefi. Gaafi sunini gaafa qara nami yo Waaqa yaamatu AABBO jed'e yaamatu.