Uumama 38 - KITAABA WAAQA

¹ Gaafasi Yudaani oboleyaani isaa biraa deeme nama toko ka Hira jed'ani, ka Adulamuti d'alate, woliini tae.

² Achiti Yudaani intala gosa Kanaani, ta abbaani isii Shua jed'ani, arge fuud'e.

³ Isiini ilma Eri jed'ani d'alteefi.

⁴ Ammalle garaachoofte ilma lameeso d'alteefi, maqa Onani baafteefi.

⁵ Ammalle gaafa Yudaani Kesibu jiru, ilma d'alteefi maqa Shela baafteefi.

⁶ Yudaani ilma isaa ka angafa, ka Eri jed'ani, intala Tamari jed'ani toko kad'ateefi fuusise.

⁷ Eriini nama hama, hameenni isaa suni Waaqa dallansiise, tanaafi Waaqi isa ijeese.

⁸ Jennaani Yudaani waan Onani oboleesa Eritiini jed'e, Niiti oboleesa kanketi d'aali, ilme kosi lakisiifi.

⁹ Ammo Onaniini aka ijoolleeni sunini ta isaa intaane beennaani, yo niiti suni bira bule ch'ufa gudeeda d'iira lafati naqe, aka oboleesi isaa ijoolle inarganne.

¹⁰ Wonti inni tolche suni AABBO Waaqa diqole ingammachiimne, tanaafi AABBO Waaqi isale ijeese.

¹¹ Jennaani Yudaani waan niiti ilma isaa, ta Tamari jed'aniini jed'e, Worra si d'aleti gali, haga gurbaani kiyya Shelaani guddatuti d'iirsa male tai. Wonti inni akasi jed'eefi, waan hegeri much'a kanale, akuma oboleyaani isaa ijeesani, isale ijeesani sehe sodaate. Eegi suni Tamariini worra isii d'aleti galte.

¹² Eegi bulti diqo niitiini Yuda doote. Hamtu baafannaani isaafi jaala isaa Hiraani, ka worra isaani Adulamu, gara Timna, fulla ree isaa dabassa iraa ch'irani d'aqani.

¹³ Namichi toko waan Tamariini jed'e, Abbaani d'iirsa keeti ya gara Timna dabassa ree iraa ch'irachu d'aqe.

¹⁴ Duuba isiini woya hamtu taani baafatte woya d'ibi keeyatte fuula hagogatte fullo Enaimu, ka karaani Timna ke bahu, ke teete. Wonti isiini akasi taateefi, aka Shelaani ato guddatele isi imfuune beeti.

¹⁵ Yudaani isi arginaani sharmut'a sehe, waan isiini fuula hagogatteefi.

¹⁶ Inni kara d'aatuti isii gore waan jed'eeni, Hori hagami nama iraa fud'atta? (Inni aka isiini niiti ilma isaa imbeekhu.) Isiini waan jetteeni, Hagami naa kennita?

¹⁷ Inni waan jed'eeni, Ilme toko ree tiyya keesaa sii kenna. Jennaani isiini waan jette, Qabdo naa kenni, haga reeni d'uftuti.

¹⁸ Inni, Maani aka qabdo sii kenna? jed'e gaafate. Isiini waan jetteeni, Beesisa morma qabdufi haada isaatiifi ule deemtuuni suni. Duuba inni iti kenne bira bule garaacheese.

¹⁹ Tamariini galte hagogo taani ufiraa fuute woya ufii ta hamtu taani keeyatte.

²⁰ Eegi suni Yudaani jaala ufii Hira ilme reetini erge, aka niitiini miha qabdo kaani deebiftufi, ammo Hiraani isi barbaade d'abe.

²¹ Inni waan worra lafa sunitini jed'e, Sharmut'itiini onana kara kana d'aatu teetu me? Nu takuma sharmut'a asi ingarre jed'aniini.

²² Inni Yudati deebie waan jed'eeni, Anini ya isi barbaade, d'abe, worri lafa sunileeni, Sharmut'i taka achi ind'umne naani jed'e.

²³ Yudaani waan jed'eeni, Nu nama nu koblu imfeenu, laki, waan suni ch'ufa ha taatuuni. Anini ya ilme ree isii erge, ammo siti isi d'abe male.

²⁴ Eegi jii sadi dabre, nami toko waan Yudaani jed'e, Intalti tante Tamariini ya sharmut'a taate garaachoofte. Yudaani waan jed'e, Gabaasa, guba yoosi.

²⁵ Ato gabaasu jiranu, qonqo gara abba isii Yuda ergite waan jette, Nami na garaacheese abba miha kana, ilaali, abba miha kana mid'aafad'u, beesisa kanafi haada isaatiifi ule tanale abba himi.

²⁶ Yudaani waan kana hubate waan jed'e, D'ugaani tama isiiti, anati wollaale, sila ilmi kiyya Shelaani isi fuud'uu male. Duuba Yudaani iti deebie isiiti indeebine.

²⁷ Guyyaani ala hobae jennaani, aka isiini lakoole d'altu argani.

²⁸ Ato isiini ch'ininfattu, daimi toko harka gabaafate. Niitiini deesisu jirtu harka daima suni qabde liilana diima iti hite waan jette, Kuno, ka angafa kana.

²⁹ Ammo daimi kaani harka keesa deefate, oboleesi isaa durati d'alate. Jennaani niitiini deesiftu taani waan jette, Atini akanuma irreeni keesaa baata! Tanaafi maqa Peresi baasanifi.

³⁰ Duuba oboleesi isaa ka liilana diima harkaa qabu d'alate, maqa isaa Zera baasanifi.