Uumama 33 - KITAABA WAAQA

¹ Yakobooni Esaufi jari isaa ka d'ibba afuri kaani, ka gadi d'ufu jirani arge jennaani ilmaani ta gari Lea qoode, ta gari Rahelii qoode, ammalle ta gari nad'eeni hojattu taani lamaaniti qoode.

² Inni nad'eeni hojattu taanifi ilmaani isii dura aanse Leafi ilmaani isii iti aanse, Rahelifi Yusufu eegee aanse.

³ Ufi worra dura deeme oboleesa isati d'iannaani maro torba durati gajed'e.

⁴ Ammo Esauuni fuula keesa utaale iti mamarate isa d'ungate; worri lachu wolti bohe.

⁵ Esauuni ufi d'aatu millate nad'eenifi ijoolle arge, Worri isani woliini jirtani kunini ka eenu jed'eeni? Yakobooni waan jed'eeni, Aabbo, ijoolleeni tunini ta Waaqi eebaani naa kenne.

⁶ Jennaani nad'eeni hojattu taanifi ijoolleeni isii d'ufte durati gajette.

⁷ Akuma suni Leafi ijoolleeni isiileeni d'ufte. Eegee Yusufufi Raheliini d'ufani durati gajed'ani.

⁸ Esauuni waan jed'eeni, Worri anini qara baheeni suni maani? Worri kami kana? Yakobooni waan jed'eeni, Worri kiyyuma, ka anini naasu siraa fed'ad'a deemuuni.

⁹ Ammo Esauuni waan jed'eeni, Gurba, anini ya quufe, waan qabdu oluma keeyad'i.

¹⁰ Yakobooni waan jed'eeni, Akananiti. Yo atini naasu naa qabaatte, waan anini sii kennu kana fud'ad'u. Agartaani fuula keeti aka nama fuula Waaqaa arge nati fakaatti, eegi atini amma jaalala hagana geetu na garsiifte.

¹¹ Waan anini sii d'ufeeni kana naraa fud'ad'u; Waaqi ya naa nahe na quubse. Yakobooni ituma d'owe fud'achiise.

¹² Esauuni waan jed'e, Nu yaasa, anini ammo si dura deema.

¹³ Yakobooni waan jed'eeni, Ijoolleeni tunini lalaaftu, anini hori ilmeeni hootu kanale qorqorachuu male. Yo guyya tokole arifachiisani oofani, ch'ufti inhobaati.

¹⁴ Abbo, womaniti, atini beeni nu dura deemi, anini laanuma haga horifi ijoolleeni dandeetu tirsa, haga lafa Edomuti si d'aqabuuti.

¹⁵ Jennaani Esauuni waan jed'eeni, Yoosi eegi, jara kiyya ka gari sii lakisa. Jennaani Yakobooni waan jed'eeni, Hiyo, lakisi, womaniti, anini qara naasu tante ch'alla barbaadad'a.

¹⁶ Duuba guyyuma suni Esauuni kara qabate Edomuti deebie.

¹⁷ Ammo Yakobooni lafa Sukothiti qajeele achiti mana jaarate hori ufile waaba jaare. Tanaafi fulla suni maqa Sukothi jed'ani.

¹⁸ Yakobooni lafa Mesopotamiati gale dira Shekemu, ka lafa Kanaani keesa, nagayaani baheeni waaro diida dira suni d'aatuti d'aabate.

¹⁹ Fulla qubate suni ilmaani Hamori, ka abba Shekemu, qarsi d'ibba tokotini iraa bite.

²⁰ Achiti fulla sorio iti qalani mid'aase, El-Elohe-Israeli jed'e yaame, akasi jechaani Waaqa, Waaqa Israeli jechu.