Uumama 27 - KITAABA WAAQA

¹ Isaaqooni jaare ila d'abe jennaani ilma isaa ka angafa Esau yaame waan jed'eeni, Gurba! Jennaani inni, Ya jed'e.

² Isaaqooni waan jed'eeni, Anini ya jaare, guyya kiyya imbeekhu,

³ guubefi t'iya tante fud'ad'i, adamo d'aqi, bineensa naa ijeesi.

⁴ Sagale miooftu anini fed'u d'aabi naa kootiini, aka anini nyaad'e, ato induiinu si eebisu.

⁵ Rebekaani waan Isaaqooni Esauuni jed'e ch'ufa d'ageete, Esauuni adamo deemnaani

⁶ Yakobo yaamte waan jetteeni, Anini reefuma tana waan abbe Esauuni jed'e d'agaye:

⁷ Bineensa ijeesi, naa kootiini, sagale miooftu naa d'aabi, aka anini nyaad'e, AABBO Waaqa durati, ato induiini si eebisu.

⁸ Amma, gurba kiyya, na ch'aqasi, waan anini siini jed'u ch'ufa guuti.

⁹ Gara ree d'aqi, kaarata laleesa gagabba lama fuud'i, aka anini sagale miooftu abbe guddo jaalatu d'aabuufi.

¹⁰ Duuba abbeeti geesi, aka inni nyaate, ato induiinu si eebisu.

¹¹ Ammo Yakobooni waan haad'aani jed'e, Atini imbeeta, nafi Esauu dabassicha, kiyya ammo qulqullicha.

¹² Hegeri aabbooni na qabate, aka anini isa sobe beekate, fulla eeba anini abaarsa ufitiini d'ufa.

¹³ Haati waan jetteeni, Abaarsi suni ha na qabatuuti, waanuma anini siini jed'e guuti, beeni, kaarata suniini kooti.

¹⁴ Duuba inni d'aqe kaarata kaani fuud'e isiitiini d'ufe, isiini sagale miooftu abbaani jaalatu d'aabdeefi.

¹⁵ Woya Esau ta ch'ufa ira dansa mana isiiti fuute Yakobo much'a maand'ichati keete.

¹⁶ Duuba goga kaaroota sunile fuute harkaafi fulla morma ta rifeensa inqamneti keete.

¹⁷ Sagale miooftu d'aabdeefi qit'a Yakoboo kennite.

¹⁸ Jennaani Yakobooni gara abba d'aqe, Aabbo jed'e. Abbaani owaate waan jed'e, Atini eenu kana, ilma kiyya?

¹⁹ Yakobooni waan jed'eeni, Anini angafa kanke Esau; ya waan atini naani jette guute, kai, fooni bineensa anini galeeni kana nyaad'i, na eebisi.

²⁰ Isaaqooni waan jed'eeni, Atini akami akana yoosu agarte, ilma kiyya? Yakobooni waan jed'eeni, AABBO Waaqi kanke, na qarqaare naa baase.

²¹ Jennaani Isaaqooni waan Yakobooni jed'e, Me gadi hiiqi, si qaqabad'e laala, aka atini d'uguma Esau.

²² Duuba Yakobooni abbaati hiiqe, abbaani qaqabate waan jed'eeni, Qonqooni qonqo Yakobooti, ammo harki ka Esau.

²³ Ammo inni Yakobo hubachu dad'abe, waan harki isaa dabassa aka ka Esau qabuufi isa eebise.

²⁴ Ammo ammalle gaafate waan jed'e, Atini d'uguma Esau? Inni, Ee jed'eeni.

²⁵ Jennaani Isaaqooni waan jed'e, Fooniini na kooti, aka anini sagale harka kanketi nyaad'e si eebisu. Yakobooni foonifi daad'i inni d'ugu d'ufeeniifi.

²⁶ Jennaani abbaani waan jed'eeni, Nati hiiqi, na d'ungad'u, ilma kiyya.

²⁷ Inni ind'ungata iti gadihiiqe jennaani Isaaqooni urgaa woya isaa suufe eebiseefi waan jed'e, Fooleeni gurba kiyya aka foole oobru AABBO Waaqi eebiseefi urgoofti.

²⁸ Waaqi sii roobe, oobru sii eebise, mid'aanifi daad'i guddo sii kenninna.

²⁹ Nami gosa ch'ufa ha si hojate si durati jilbifatu. Oboleyaani tante ch'ufa mohad'i, ilmaani haateti ch'ufa ha si durati jilbifatu. Ka si abaaru ha abaaramu; ka si eebisu ha eebifamu.

Aka Esauuni Isaaqo eeba kad'ate

³⁰ Akuma Yakobooni eeba argate abba biraa baheeni, oboleesi isaa Esauuni adamoo gale.

³¹ Innileeni sagale miooftu abbaa d'aabe geeseefi waan jed'eeni, Aabbo, kai, fooni anini si d'ufeeni kana nyaad'u naa eebisi.

³² Isaaqooni waan jed'eeni, Atini eenu kana? Inni waan jed'e, Anini Esau, ilma kanke ka angafa.

³³ Isaaqooni nahe hollate waan jed'eeni, Eenu re, ka reefu si durati bineensa ijeese fooniini naa d'ufe? Anini diquma si durati nyaad'e eebiseefi, eebiti sunini inhanqattu, tama isaa taati.

³⁴ Esauuni dubbi tana d'ageennaani aka taka inargini laalefate lalabe bohe inni waan jed'e, Aabbo kiyya, nale eebisi!

³⁵ Isaaqooni waan jed'eeni, oboleesi kanke d'ufe sobaani na balleese eeba anini sila sii kennu fud'ate.

³⁶ Esauuni waan jed'e, D'uguma maqa Yakobo iti baasani. Kuni maro lameeso ka inni na dabse. Qara angafooma naraa fud'ate, ammo arra eeba naa malte naraa fud'ate. Ila amma eeba diqole na inhambimne?

³⁷ Isaaqooni waan jed'eeni, Anini isa yayu moticha kanke tolche, oboleyaani isaa ch'ufa hojattu isaa tolche. Anini isaa mid'aanifi daad'ile ya kenneefi, amma woma inhamne, maani sii tolcha, ilma kiyya?

³⁸ Esauuni abba sobate waan jed'eeni, Eebiti tante suni ch'allaa, aabbo? Nale eebisi jed'e bohe.

³⁹ Jennaani Isaaqooni waan jed'eeni, Bokeeni gubbaa si roobu injiru, oobruuni woma sii imbaaftu.

⁴⁰ Atini woraana keetiini fidamta, hojattu oboleesa kanketi taata. Ammo hojja obsu dad'abde, harka isaa keesaa baata.

⁴¹ Wonti Esauuni Yakobo jibbeefi waan abbaani isaa isa eebiseefi. Inni herege waan ufiini jed'e, Guyyaani abba kiyya ya gabaabate, anini gaafa inni due Yakobo inuma ijeesa.

⁴² Rebekaani mala Esau d'ageete jennaani Yakobo yaamte waan jetteeni, Oboleesi kanke ya malate, aka si ijeese akanaani haalo baafatu.

⁴³ Amma, ilma kiyya, dubbi tiyya ch'aqasi, kai hurrisi worra oboleesa kiyya Labani, ka lafa Harani jiruti baqad'u,

⁴⁴ achi tai, haga oboleesa kanke dallansuuni iraa galte,

⁴⁵ inni waan atini tolchite ded'uuti. Eegi suni nama si galchu siti erga. Anini guyyuma tokooni isani lachu d'abu indandau.

Aka Isaaqooni Yakobo Labaniti erge

⁴⁶ Jennaani waan Rebekaani Isaaqooni jette, Anini waan dubarti Hiti na tolchite ya obsu dad'abe. Yo Yakoboleeni dubra Hiti fuud'e dua male woma na inhamne.