Uumama 2 - KITAABA WAAQA

¹ Akanaani uumami lafafi gubba ch'ufumanu qit'ae.

² Guyya torbeeso Waaqi huji ufii ch'ufa hobaamnaani boqote.

³ Duuba Waaqi guyya torbeeso eebise guyya jaba tolche; wonti akanatiifi Waaqi gaafasi huji uumama ch'ufa hobaase boqote.

⁴ Uumami lafafi gubba akasiini tahe. Gaafa AABBO Waaqi lafafi gubba uume,

Oobru Edeni

⁵ lafti marrafi gurbile inqabdu, yokhaani mid'aani tokoleeni imbaane; wonti akanatiifi AABBO Waaqi taka iti irroomne, nami lafa qotuleeni injiru.

⁶ Ammo hojja ch'ufa lafti oldabante, dabaani, fulla ch'ufa gahe lafa ch'ufa jiise.

⁷ Jennaani AABBO Waaqi biyye lafa iraa fuud'e nama tolche, hafuura jireennaa funaaniti afuufe, nami suni sunumaani jiraate lubbu argate.

⁸ Jennaani AABBO Waaqi lafa Edeni ta ilaboru jirtu keesati oobru fach'aase, nama mid'aase suni keesa kaye.

⁹ Inni mukeeni guddo ilti namaa jaalattu, ta mid'aani isii guddo sagale dansaa oobru suni keesati baase; ammalle wod'aka oobru suni keesati mukha jireennatiifi mukha waan dansaafi hamtu ch'ufa nama hubachiisu baase.

¹⁰ Galaani toko lafa Edeni keesaa bahe oobruti yae, achi keesati d'anqu afuri gargari bahe galaana afuri tahe.

¹¹ Maqaani galaana qara Pishoni, inni ka lafa Habila, ta worqi qabdu, maru.

¹² (Worqiini lafa suni qulqullo, ammalle qumbifi d'akha diima ch'ulkichati lafa suni jira.)

¹³ Galaani lameeso maqaani Gihoni, inni ka lafa Kushi maru.

¹⁴ Galaani sadeeso maqaani Tigrisi, inni ka lafa Ashuru ilaboru yau; ka afreeso maqaani Frati.

¹⁵ Jennaani AABBO Waaqi nama kaani fuud'e oobru Edeni keesa kaye, aka inni qote jabeesu.

¹⁶ Ammalle waan jed'eeni, Mid'aani oobru tana ke jira ch'ufa nyaad'i,

¹⁷ ammo mid'aani mukha waan dansaafi hamtu ch'ufa gargari nama hubachiisu inyaatini, yo nyaatte guyyuma suni doota.

¹⁸ Jennaani AABBO Waaqi waan jed'e, Nami kunini ka koba tau dansaniti, wahela isaa male tolchaafi.

¹⁹ Duuba inni biyye lafaa fuud'e bineensafi simpirre gosa ch'ufa mid'aase namichatiini d'ufe, aka maqa inni baasufi laalu; tana gula bineensi ch'ufti maqa argate.

²⁰ Duuba namichi horifi simpirreefi bineensa ala ch'ufa maqa baaseefi; ammo waheli isaa male keesaa d'abe.

²¹ Jennaani AABBO Waaqi aka jaba isa rafise, duuba ato inni rafu, ch'inaacha isaa toko keesaa fuud'e, fulla suni akuma duriti deebise.

²² Duuba ch'inaacha keesaa fuud'ani kaani nama uwa tolche namichatiini d'ufe.

²³ Jennaani namichi waan jed'e, Eegi ufi jibbaad'e, lafe lafe tiyya keesaa baate, yokhaani fooni fooni kiyya keesaa bahe ya argad'e; uwa isiini jed'ani, waan isiini d'iira keesaa baateefi.

²⁴ Tanaafi d'iirti abbaafi haad'a ufii lakifte niiti ufitiini takaa taati, worri lamaani nafa takaa taha.

²⁵ Namichafi niitiini qulla yaani, ammo gaafasi waan ch'eera imbeekhani.