Uumama 18 - KITAABA WAAQA

¹ AABBO Waaqi Abrahamuti mullate fulla mukha woyyu ka Mamre, ato inni balbala waaro isaa keesa tau, guyya gudda.

² Inni olmillate nama sadi ka ejaanju arge jennaani kae fuula ke fiige gajed'e

³ waan jed'eeni, D'iiro tiyya, yo na tufachu baatani, mana kiyya bira indabriina.

⁴ Eega, bisaani miila d'iqattaniini isanii d'ufa; hagasi gaadisa kana jala boqod'a.

⁵ Liqimsa diqo toko isanii kenna, ta woreega karaa isanii taatu. Waan guddo na tolchitani ka mana kiyya d'uftani, eega, isani gololcha. Worri waan jed'eeni, Hayye, ha taatu.

⁶ Abrahamuuni waaroti arifate waan Saraani jed'e, Hurrisi, subba mid'aani daakhani qabu dansa fuud'i mid'aasi, qit'a d'aabi.

⁷ Abrahamuuni gara hori isaa arifate lamacha gabba toko fuud'e, hojattu isaatini, Hurrisa qala jed'eeni.

⁸ Eegi suni inni ititufi aanani miifi fooni fuud'e keessuma duraani d'ufe, Soorad'a jed'eeni. Achiti mukha jalati bira eje worra gololche.

⁹ Jennaani worri waan jed'eeni, Meeti, niitiini tante Saraani? Inni waan jed'eeni, Achi waaro keesa jirti.

¹⁰ Worra suni nami toko waan jed'eeni, Anini jia sagali tae deebia, gaafa anini gadeebiu, niitiini tante Saraani ilma qabdi. Saraani balbala waaro keesa isa duuba ejite ch'aqasu jirti.

¹¹ Abrahamufi Saraleeni ya jaarani fulla gahani; Saraleeni la d'alti keesa hobaate.

¹² Saraani kofalte waan ufiini jette, Bada, anini amma, nami jaare hobae kunini, d'iirsa kiyya ka jaare ufiyu dad'abe ind'araafi?

¹³ AABBO Waaqi waan Abrahamuuni jed'e, Saraani maafi kofalte, Anini jaaruma tanaani ilme inargad'a? jetti?

¹⁴ D'uguma wonti AABBO Waaqati jabaata injirti? Akuma qara anini siini jed'e, Anini jia sagali tae, yo ani deebie, Saraani ilma qabdi.

¹⁵ Saraani sodaatte, Anini inkofalle jette mormatte. Ammo inni, Atini la kofalte jed'eeni.

Aka Abrahamuuni araarama dira Sodoma kad'ate

¹⁶ Jennaani jari kae fuula Sodoma deefate iti d'aabate, Abrahamuuni worra gegeese.

¹⁷ AABBO Waaqi waan jed'e, Anini waan tolchu fed'u kana Abrahamu ind'ossu.

¹⁸ Eegi tana ilmaani isaa gosa guddo taate, gochiti lafa tana ch'ufti worrani eeba argatti.

¹⁹ Anini isa yayu fohad'e, aka inni ilmaani isaatiifi ababoota isaa gorse, aka worri na ch'aqase waan dansaafi ka qajeela tolchu. Yo worri waan kana tolche, anileeni waan Abrahamuu Intolcha jed'e ch'ufa intolchaafi.

²⁰ Jennaani AABBO Waaqi waan Abrahamuuni jed'e, Worri Sodomatifi ka Gomora ya guddo ch'ubbu tolche, waan sunifi worra guddo himatani.

²¹ Anini tanaafi achi d'aqa, aka himachaani suni d'arafi d'uga ilaalu.

²² Jennaani worri kaani lamaani kara Sodoma dabre, ammo AABBO Waaqi fulla Abrahamuti hafe.

²³ Abrahamuuni Waaqati d'iaate waan jed'eeni, Atini d'ugumati nama ch'ubbichafi ka ch'ubbu inqamnele woliini hobaafta?

²⁴ Yo nami shantama ka ch'ubbu inqamne dira kana keesa jiraate, atini worra shantama suni jette dira suni innaatuufi? Ch'ufa imballeesita?

²⁵ Atini nama ch'ubbu inqamne dandeete ka ch'ubbu qabu woliini inhobaaftu. Suni sii imfakaattu. Yo atini akasi tolchite, ka ch'ubbu qabuufi ka ch'ubbu inqamneleeni woliini hobaa. Wonti kunini diqole intaatu. Jaallabi lafa tana ch'ufaa waan d'uga intolchu?

²⁶ Ammo AABBO Waaqi waan jed'eeni, Hojja nama shantama ka ch'ubbu inqamne Sodoma keesati arge, anini lafa suni inaraaramaafi.

²⁷ Abrahamuuni ammalle waan jed'eeni, AABBO Waaqa, dubbi anini si gaafad'u tana naa araarami; wonti akasitiifi anini nama, waan tokole siini jechu himmalle.

²⁸ Yo ammo nama shantama ka ch'ubbu inqamne suni keesa nami shani keesaa hafe, worra shanani suni jette dira kana imballeesita? AABBO Waaqi waan jed'eeni, Yo nama afurtami shani achiti arge imballeesu.

²⁹ Abrahamuuni ammalle dubbate waan jed'e, Yo nama afurtama ch'alla achiti agarte maani tolchita? AABBO Waaqi waan jed'eeni, Hojja nami afurtama jiraate imballeesu.

³⁰ Abrahamuuni waan jed'e, AABBO Waaqa, nati indallaniini, ammalle wa si gaafad'a. Yo nami sodoma ch'allaani jiraate ho? Waaqi waan jed'eeni, Yo nama sodoma arge imballeesu.

³¹ Abrahamuuni waan jed'e, Ammalle naa araarami, AABBO Waaqa, wa si gaafad'a. Yo nami diddama ch'allaani ka ch'ubbu inqamne jiraate ho? Waaqi waan jed'eeni, Hojja nama diddama arge imballeesu.

³² Abrahamuuni ammalle waan jed'eeni, AABBO Waaqa, nati indallaniini, amma toko ch'alla si gaafad'a. Yo nami kud'ani ch'allaani ka ch'ubbu inqamne Sodoma keesa jiraate ho? AABBO Waaqi waan jed'eeni, Anini lafa suni inhobaasu, yo nami kud'ani ka d'uga qabu keesa jiraate.

³³ Dubbi tana buufatani jennaani AABBO Waaqi olgale, Abrahamuleeni worra isaa gale.