Uumama 14 - KITAABA WAAQA

¹ Bara suni hayyooti afuri, Amrafeli ka lafa Shinari, Arioko ka lafa Elasari, Kedor-Laoma ka lafa Elamu, Tidali ka lafa Goimu,

² hayyoota shani d'ibiti duulte. Hayyooti shanani suni Bera ka lafa Sodoma, Birsha ka lafa Gomora, Shinabu ka lafa Adma, Shemeberi ka lafa Seboimu, ammalle hayyu ka lafa Bela yokhaani Zoari jed'ani.

³ Hayyooti shanani tuni wolti d'ufte wold'ageete laga Sidimu keesati, ka amma galaana Sooda jed'ani.

⁴ Qara haga ganna kud'ani lama Kedor-Laomaani worra mohate, ammo ganna kud'ani sadeeso mohanno isaa didani.

⁵ Ganna kud'ani afreeso Kedor-Laomafi hayyooti golli isaa d'ufani, gosa Refai ta lafa Ashteroth-Karnaimu, gosa Zuzi ta lafa Hamu, gosa Emi ta lafa Shawe-Kiryathaimu,

⁶ gosa Hori ta gaara Seiri dabsatani, haga Elparani moga lafa alooti gussani artini baasani.

⁷ Jennaani dachaani lafa Kadeshi d'ufani (ta gaafasi Enmisfati jed'ani). Lafa Amalekitifi gosa Amori ta lafa Hasason-Tamari ke teetu had'ani dabsatani.

⁸ Jennaani hayyooti Sodomafi Gomorafi Admafi Seboimufi Bela (yokhaani Soari) askarti ufii ta lola kurfefate, Bale Sidimu keesa

⁹ hayyoota lafa Elamufi Goimufi Shinarifi Elasari wolhad'ani. Jari wolhad'e suni gami toko hayyoota shani, kaanileeni afuri.

¹⁰ Baleeni suni boola waan aka laami qabdu heddu qabdi, duuba hayyooti Sodomafi Gomora, ato baqachu jirtu, boola laami suni keesa duudde; ammo taani sadeeni gaarati baqatte.

¹¹ Hayyooti afraani taani waan Sodomafi Gomora ke jira ch'ufa, horifi sagalele fud'atte itiini d'aabatte.

¹² Lutule, ilma oboleesa Abramu, ka Sodoma ke tau isaafi hori isaale boojiani.

¹³ Ammo namichi toko baqate waan kana ch'ufa Abramu ka gosa Ebraniati hime; inni gaafasi fulla mukeeni woyyu, ta namicha Mamre gosa Amori jed'ani, d'aatu jira. Mamrefi oboleyaani isaa Eshkolifi Aneriini golli Abramuti.

¹⁴ Abramuuni aka ilma oboleesa isaa qabani d'ageennaani nama olla isaa ch'ufa ka had'i dandau, nama d'ibba saditiifi kud'ani saddeeti, wolti yaame hayyoota afraani taani haga lafa Dani reebani.

¹⁵ Achi geennaani inni jara isaa fullaa fullaa qoode, halkaniini nyaapa suni lole dabsate, haga Hoba, ka dira Damaski mirgaa, had'e

¹⁶ waan qara fud'atani iraa buuse. Ammalle Lutu, ilma oboleesa isaa ka boojiani, isaafi hori isaa ch'ufafi nad'eenifi worra qara boojianile deebise.

Aka Melkizedekiini Abramu eebise

¹⁷ Abramuuni Kedor-Laomafi hayyoota taani dabsate gale, jennaani hayyuuni Sodoma Bale Shawe, ta Bale Hayyule jed'ani, keesati yoyo fuula ke deeme.

¹⁸ Jennaani Melkizedekiini, ka hayyu Salemu, ka ammalle qaallu Waaqa Guddaa, qit'afi daad'i Abramuu geese

¹⁹ eebiseefi waan jed'e, Waaqi Guddaani, ka lafafi gubba uume, Abramu eeba kenninna!

²⁰ Waaqa gudda ka nyaapa kanke ch'ufa si dabsachiise ha faarsani! Abramuuni hori nyaapa iraa deebise Melkizedeki qoode.

²¹ Hayyuuni Sodoma waan Abramuuni jed'e, Hori galfatte kanaani tai, ammo nama kiyya ch'ufa naa deebisi.

²² Abramuuni harka olfud'ate kakhate waan jed'eeni, Anini Waaqa AABBO Gudda, ka lafafi gubba uume durati kakhad'a,

²³ aka waan kanke tokoleeni inteenne, waan d'ibi lakisi liilanafi limele, aka ati dandeete, Anati Abramu duroomse deebite injenne.

²⁴ Anini ufi woma tokole imfud'ad'u, waan jari kiyya qara nyaate male. Ammo golliini tiyya, Anerifi Eshkolifi Mamreeni, qooda ufii ha fud'atani.