Sefania 2 - KITAABA WAAQA

¹ Gosa ch'eera inqamne, wolti koota,

² ato gogoddani aka daraara imbadiini, ammalle ato dallansuuni AABBO Waaqa isani ingubini, ammalle ato guyyaani dallansu AABBO Waaqaa isani ind'aqabiini.

³ AABBO Waaqa barbaada, isani worri balchichi, ka seera isaa guutu. Waan qajeela barbaada, AABBO Waaqa durati ufi balchoomsa. Hegeri guyya dallansu AABBO Waaqa duraa baatanifa.

Gaargala gosa Israeli d'aatu jirtu

⁴ Nami tokoleeni dira Gaza keesati inhafu, diri Ashkelonileeni ona taha. Worra Ashdodile guyya guddaani dira keesaa gussani, worra Ekronile dira isaani keesaa gussani.

⁵ Gaargala keesani, gosa Kerethi, ta afaani baariini teetu. AABBO Waaqi ya wollaala isaniti mure, isani worra Filisti. Inni isani balleesa, isani tokoleeni inhaftani.

⁶ Lafti teesani ta d'aatu baariini jirtu marra dansa baafte mana tissitutiifi moona hooliye achiti jaarani.

⁷ Worri Yuda ka hafe d'ufe lafa teesani fud'ate, ree ufii achiti tiffate mana dira Ashkeloni keesa rafa. Wonti akanatiifi AABBO Waaqi isaani akuma duri kaani horsisa.

⁸ AABBO Waaqi Guddaani waan jed'u, Anini worra Moabutiifi ka Amoni, ka gumi tiyya arabse goyeese, Lafa teesani fud'anna jed'u, ya d'agaye.

⁹ Yo anini d'uguma Waaqa Israeli taate, anini worra Moabutiifi ka Amoni akuma Sodomafi Gomora balleesani balleesa. Lafti suni doobifi boola soodda taate haga jirtu badi. Nami kiyya ka hafu worra suni saame lafa worraa fud'ata.

¹⁰ Akanaani worra Moabutiifi ka Amoni gaargalchani, maro kiyyiba isaanitifi ammalle waan worri gumi AABBO Waaqa Gudda arabse dabseefi.

¹¹ AABBO Waaqi worra sodaachiise, waaqoota worrale waan woma keesa injirre tolcha. Duuba gochiti ch'ufti lafa ufi keesati isa durati gajette kad'ati.

¹² Ammalle AABBO Waaqi worra Kushile goraadeeni fit'a.

¹³ AABBO Waaqi harka ufii mirga qabe Ashuru balleesa, ammalle dira Ninawile balleese ona lafa aloo, ka bisaani inqamne, tolcha.

¹⁴ Fullaani sunini horifi bineensa gosa ch'ufati iti gala. Urunguni maneeni onte suni gubbati galte qaa isaa keesaa booti. Haranqesileeni balbala ira kaakisa. Mukha hind'eesa ka jaaraniinile ch'ufa iraa baasani balleesani.

¹⁵ Wonti dira suni ka kiyyibe irre ufii d'aabate waan bahu ufi sehe tolchani tana. Worri waan dira isaani male diri d'ibiini lafa keesa jiru insehu. Ammo amma diri sunini me re? Yayu one bade, bineensi iti galeeniti? Nami d'aatu bahu ch'ufti maadefate afaani qabata.