Sefania 1 - KITAABA WAAQA

¹ Tunini dubbi AABBO Waaqaa, ta Sefania, ilma Kushi, ka ilma Gedalia, ka ilma Amaria, ka ilma Hezekiati d'ufte, gaafa Yosiani, ilmi Amoni, hayyu Yudaa.

Guyya AABBO Waaqi wollaala namati muru

² AABBO Waaqi waan jed'e, Anini waan lafa gubba jira ch'ufa lafa ira balleesa —

³ namafi bineensafi simpirrefi qurt'umile. Anini worra ch'ubbu gaargalche badi itiini d'ufa. Ammalle nama ch'ufa balleesa, tokoleeni ka hafu injiru. Nami dubbi tana jed'e ana, AABBO Waaqa.

⁴ Anini nama Yerusalemu keesa taufi ka Yudale ch'ufa nyaapa iti tahe waan waaqa Baali jed'ani ka hafe ch'ufa balleese, maqa qaalole worra ta d'ara sunile deebiani inqaabatani.

⁵ Anini ammalle nama mana ufii kore adufi jiafi urji kad'atu imballeesa. Ammalle nama na durati maqa kiyyaani gajed'e kakhate ammo eegi suni garagale maqa waaqa Milkomu jed'aniini kakhatule balleesa.

⁶ Ammalle anini worra garagale na gula yau dide, ka nati d'ufe qarqaarsa naraa imfed'anne, imballeesa.

⁷ Guyyaani AABBO Waaqaa yad'iaate, guyyaani inni wo tolchu; duuba isa durati indubbatiina, ch'allisa. AABBO Waaqi kurfefachuu jira, aka gumi isaa aka aka sorio qaqalu.

⁸ AABBO Waaqi waan jed'u, Guyya sorio suni anini hojattufi ilmaani hayyutiifi worra gaad'a gochiti d'ibiini keeyattu naqatu ingaargalcha.

⁹ Ammalle anini nama aka nama Waaqa d'uga imbeenne kad'atu, ka wo hate nama ijeese mana abba isaa waan saamateeni guutu, ingaargalcha.

¹⁰ AABBO Waaqi waan jed'u, Guyya suni isani qonqo iyyanna Balbala Qurt'umi jed'aniti d'ageetani. Ammalle isani boha gama dira Yerusalemu hareesa keesati d'ageetani dibbeesa gara kubile d'ageetani.

¹¹ Hojja waan kana d'ageetani, isani ka gama dira dullacha keesa teetani, boha iyya, wonti akanatiifi bunnat'uuni ch'ufti hobaate, nami qarsiini bunaqu ch'ufti lafa ira bada!

¹² Gaafasi anini ifse fuud'e dira Yerusalemu soqe nama ufi d'aabate ufumaa tae kiyyibe, garaa ufii keesati Waaqi waan hamtufi toltu intolchu ufiini jed'u, ingaargalcha.

¹³ Hori worraa iraa saamani mana worrale ch'ufa balleesani. Worri haguma jiru mana jaarate kana keesa intau yokhaani oobru zabibu ta oobratani tana daad'i iraa ind'ugani.

¹⁴ Guyyaani jabaani AABBO Waaqaa ya d'iaate — arifate d'ufu jira! Guyyaani sunini guyya laalala taha, askartiini jannileeni guyya suni ufi jibbaatte iyiti!

¹⁵ Guyyaani sunini ka dallansu, ka gaargalafi d'ipu, ka balleesafi badi, ka dukanaafi bolgoda, ka dumansaafi huri,

¹⁶ guyya magalata lolaa d'aani askartiini dira jajabaafi doofi d'ed'eertu iyyite haatu taha.

¹⁷ AABBO Waaqi waan jed'u, Anini gaargala namatiini d'ufa, aka nami ch'ufti balla tahe jaanjuru. Waan worri nati ch'ubbamefi, d'iiga worraa aka bisaani lafati jissani, reefa worrale aka d'oqe lafati d'opani.

¹⁸ Guyya AABBO Waaqi dallanu, qarsifi worqiini worraleeni dandeete worra imbaaftu. Lafti ch'ufti dallansu isaatiini gubati. Inni nama lafa keesa jiru ch'ufa yoosu maro tokotu hobaasa.