Qaabacha Seera 28 - KITAABA WAAQA

¹ Yo isani AABBO Waaqa keesani saalfattani seera isaa ka anini arra isanii kennu kana garaa tokooni jabeesitani, inni gosa d'ibi lafa keesa jirtu ch'ufa ira isani guddisa.

² Yo isani AABBO Waaqa keesani saalfattani, eebiti tunini ch'ufti isani d'aqabde teesanii taati.

³ AABBO Waaqi dirafi oobru teesani eebisa.

⁴ AABBO Waaqi isani eebise, nama taanaani mid'aani oobru taanaani, loonifi ree taanaani isanii horsiisa.

⁵ AABBO Waaqi mid'aani isani muratanifi sagale isani mid'aani suniini d'aabdani isanii eebisa.

⁶ AABBO Waaqi fulla isani baatanifi ta isani seentanile isanii eebisa.

⁷ AABBO Waaqi nyaapa keesani, yo inni isani had'u, isani qarqaare isani dabsachiisa. Worri gama toko d'ufe isani had'e, ammo gamuma ch'ufa fulla deefate isani baqata.

⁸ AABBO Waaqi keesani huji teesani eebise kod'o teesani mid'aaniini guuta. Lafa inni isanii kennule keesati isani eebisa.

⁹ Yo isani AABBO Waaqa keesani saalfattani seera isaa guuttani, akuma inni kakhate inni gumi isaa qulqullo isani tolcha.

¹⁰ Duuba gochiti lafaa ch'ufti aka AABBO Waaqi, worri kunini kiyya jed'e isani fohate argite isani sodaatti.

¹¹ AABBO Waaqi isani horsiise, isani daraarse, ilmaani heddu, isanii kenne, loonifi mid'aani heddu lafa inni ababoota teesaniti kakhateti isanii kenna.

¹² Inni bokaya gannaafi hagayya gubbaa isani bane, isani bad'aase, huji teesani ch'ufa eebisa. Duuba isani gosa heddu woi liqeesitani ammo namu iraa iliqefattani.

¹³ AABBO Waaqi gosa ch'ufa keesa eege isani intolchu ammo mata isani tolcha. Isani guyya tokole oldeemtani male gadi indeemtani, yo isani seera anini arra isani kennu kana jabeesitani guuttani,

¹⁴ ammalle dubbi tana tokole mirgaafi bita iraa goru diddani yokhaani waaqa d'ibi inkad'anne.

Waan nama dubbi Waaqaa didu tolchani

¹⁵ Ammo yo isani AABBO Waaqa keesani saalfachu diddani, seerafi aada isaa, ta anini arra isanii kennule jabeesitani guutuu diddani, abaarsi kunini ch'ufti isani d'aqabe isani qabata.

¹⁶ AABBO Waaqi dirafi oobru teesani abaara.

¹⁷ AABBO Waaqi mid'aani isani muratanifi sagale isani mid'aani suniini d'aabdani inabaara.

¹⁸ AABBO Waaqi isani abaare hormaata isani d'owa, nama taanaani, mid'aani oobru taanaani, loonifi ree taanaani waan ch'ufa isaniti diqeesa.

¹⁹ AABBO Waaqi fulla isani seetaniifi ta isani baatanile inabaara.

²⁰ Yo isani waan hamtu tolchitani AABBO Waaqa diddani inni abaarsafi d'ibafi, d'ipu isanitini d'ufa, haga isani balleesani Yoosu fit'aniti.

²¹ Inni d'ukuba isaniti buuse, d'ukubi sunini isani ira bahuu dide, lafa amma isani fud'attani iti qubachu geetani tana nama tokole hafu d'owe, ira isani balleesa.

²² AABBO Waaqi d'ukuba akana kana isaniti buusa: d'ukuba aka hiiqafa, nafa nama iitaufi qand'o fa, ammalle d'ulla; inni oolafi bubbe hamtu, ta mid'aani keesani gubde balleesitule, isaaniiti buusa, gaargali kunini isani iraa imbahu, haga isani hobaataniti.

²³ Bokaya isanii irroobu, biyyeeni teesanileeni godde aka d'akha taati.

²⁴ Fulla bokaya AABBO Waaqi awaarafi hobombolati isaniti buusa, haga isani hobaataniti.

²⁵ AABBO Waaqi harka nyaapa keesaniti isani kenne, nyaapi keesani isani dabsata. Isani qajeela toko d'uftani worra haatani, qajeela torba duraa baqattani, ammalle gochiti lafa ch'ufti, yo waan isani tolchani kana agarte, mudamte isani ira naati.

²⁶ Yo isani dootani, reefa keesani allaatifi bineensa alati nyaata, nami isani ira d'owu injiru.

²⁷ AABBO Waaqi d'ulla isaniti buusa, akuma inni worra Misiri tolche, isani ch'itoftani, gillindooftani mimiyo guurtani fayyu dad'abdani.

²⁸ AABBO Waaqi maraache, ila isani d'owe, woi isani wollaalchisa.

²⁹ Guyya gudda aka balla jaanjurtani, duuba kara gula yaatanile wollaaltani, wonti keesani tokoleeni eeba inqabdu. Yo ch'ufa isani gaargalchani, isani saamani, ammo nami isani qarqaaru injiru.

³⁰ Isani dubra kad'attani, ammo nama d'ibiiti isani dura buta. Isani mana jaarratani, ammo keesa inteetani, isani zabibu oobritani ammo mid'aani isii inyaatani.

³¹ Looni keesani isani durati qalani, ammo fooni isaani inyaatani. Harre teesani, ato isani agartanu, isani duraa fud'atani, ammalle isanii indeebisani. Hooliye teesani nyaapa keesanii kennani nami isanii deebisu injiru.

³² Ato isani gartanu ilmaani teesani d'iirafi dubrale nyaapati gurgurani. Isani guyya ch'ufa ila baaftani aka ilmaani teesani isanii galtu eeddani, ammo inagartani.

³³ Gosa isani imbeenneti mid'aani isanii iti gaargaltani qotattani isani iraa saame nyaata, ka nami hojja ch'ufa isani dabse aka hama isani gaargalchu.

³⁴ Gaargali kunini qalbi isani d'owe isani maraacha.

³⁵ AABBO Waaqi d'ullaa isani haguma jirtani infayyine jilbaafi miila keesaniti buusa, d'ullaani sunini miilaafi gubbee matale isani qabata.

³⁶ AABBO Waaqi isanifi hayyu keesani lafa nyaapa, ta isanifi ababooti teesani taka inargini, isani geesa; achiti isani waaqa mukhaafi d'akha iraa mid'aasani kad'attani.

³⁷ Lafa AABBO Waaqi iti isani geesuti, biyyiti isani ira rifate, isani goyeesite, isani tufati.

³⁸ Isani mid'aani guddo lafati fach'aaftani ammo diqo murattani, wonti akanatiifi mid'aani keesani ch'ufa awaanisati balleesa.

³⁹ Isani zabibu oobritani aka dansaa qorqorattani, ammo mid'aani ira inguuratani yokhaani daad'i ira ind'uddani, wonti akanatiifi raamoti balleesa.

⁴⁰ Ejersi lafa teesani ch'ufati baha, ammo d'ad'a ejersa tokole ira inargani, wonti akanatiifi mid'aani ch'ufti iraa jigani.

⁴¹ Isani ilmaani dubrafi d'iira d'altani, ammo teesani intaatu, wonti akanatiifi imboojiani.

⁴² Mukhaafi mid'aani keesani ch'ufa awaanisati balleesa.

⁴³ Keessumani lafa teesani keesa teetu hormaata gula oldeemti, ammo isani gadi deemtani.

⁴⁴ Worri waan isani liqeesu qaba, ammo isaani waan liqeesitani inqabdani. Worri mata keesani tahe, isani eege worra taatani.

⁴⁵ Abaarsi kunini ch'ufti isani d'aqabe isani qabate isani balleesa, waan isani AABBO Waaqa keesani saalfachu diddani, seerafi aada isaa, ta inni isanii kenne guutu diddaniifi.

⁴⁶ Abaarsi kunini akheekhafi qaabacha isanifi d'aloota keesani haga jiru jireenna taha.

⁴⁷ Waan isani AABBO Waaqa keesani gammadafi qilit'amani hojachu diddaniifi, ka inni waan ch'ufa keesa isanii eebise.

⁴⁸ Isani nyaapa keesani ka AABBO Waaqi isaniti ergu, qullafi beelafi d'eebuuni hojattani, waan ch'ufa d'abdani. Ammalle qaampara sibiila isaniti kayani, isani balleesani.

⁴⁹ AABBO Waaqi gosa isani afaani isii ind'ageenne muumme lafati isaniti erge, worri aka risa isani ira bua.

⁵⁰ Worri sunini worra fuula hamama, ka naasu inqamne, ka, nami kunini diqa yokhaani gudda injenne.

⁵¹ Worri kunini loonifi mid'aani keesani nyaate, hormaata isaani d'owe isani hobaasa. Worri mid'aani, daad'i, d'ad'a, loonifi reele tokole isanii inhambisu, haga isani hobaataniti.

⁵² Worri dira lafa AABBO Waaqi isanii kennu kana marse had'e, d'akha jaba dira sunini marsani jaarani, ka isani abdattani, jissa.

⁵³ Hojja nyaapi keesani dira keesani marse had'e isani beeloftani waan nyaatani d'abdani gaargaltani, ilmaani AABBO Waaqi keesani isanii kennele nyaatani.

^54-55 Nami dureesi, ka bulti dansa qabu ka t'uri ch'ufa lagatuleeni gaafa dira keesani marsani isaani had'ani ufi jibbaate, ilmaani ufii nyaata, maro inni sagale inqamneefi. Inni oboleesafi niiti isaa ta inni jaalatufi ilmaani isaa ta haftule ingahuuni.

^56-57 Niitiini dureetiini, ta bulti dansa qabdu, ta t'uri ch'ufa lagatu, ta taka miilaani garu indeeminileeni, akasuma taati. Hojja nyaapi dira isii marse had'e, isiini beelofte, ufii jibbaate, d'ossani ilmaani isii ta d'alteefi aka ufile nyaati. Isiini d'iirsa isii ka jaalatufi ilmaani isiileeni ingeetu.

⁵⁸ Yo isani dubbi seera, ta kitaaba kana keesati t'aafani, jabeesitani guutu diddani, ammalle maqa jaba ka AABBO Waaqa keesani ka guddisani ulfeesani sodaachu diddani,

⁵⁹ inni isanifi d'aloota keesani d'ukuba nami haguma jiru infayyinefi gaargala nami haguma jiru keesaa imbaane, isaniti buusa.

⁶⁰ Inni ammalle d'ukuba hama isani lafa Misiriti agartani, ka isani sodaatani, isaniti buuse fayyu dad'abdani.

⁶¹ Ammalle d'ukubafi gaargala, ka kitaaba seera kana keesati int'aafinile, isaniti buusa, haga isani balleesaniti.

⁶² Ato isani lafa ira dabartani urji gubba fakaatanile isani namuma diqaati hafa, waan isani dubbi AABBO Waaqa keesani ch'aqasu diddaniifi.

⁶³ Akuma AABBO Waaqi qara isani jaalate isani horsiise daraarse, akasuma inni isani jibbe, isani balleese daara isani baasa. Lafa isani fud'attani iti qubachu geetanile ira isani godaansisani.

⁶⁴ AABBO Waaqi lafa ch'ufa keesa haga muumme lafaa gargari isani firfirse, achiti waaqa d'ibi, ka mukhafa d'akha iraa mid'aasani kad'attani, ka isanifi ababooti teesani taka inkad'atiini.

⁶⁵ Fulla isani baatani tokoleti nagaya ingargattani, fullaani tunini tiyya dandeetani injettani. Ammo Waaqi achiti onne wosodaatufi ila woma ingarrefi garra sagale infeene isanii kenna.

⁶⁶ Guyya keesani imbeetani; halkani guyya wosodaatani, haguma jirtani bulti inargattani.

⁶⁷ Waan isani agartani ch'ufa sodaattani, onneeni isani hargufamti. Diirama ch'ufa, galgali yoomi gaha jettani, galgalale, diirami yomi gaha jettani.

⁶⁸ AABBO Waaqi hobolooni lafa Misiriti isani deebisa, ato qara inni, Deebie achiti isani indeebisu jed'ele. Achiti isani tissooma ufi gurgurtani, ammo nami tokoleeni ka isani bitatu injiru.