Qaabacha Seera 24 - KITAABA WAAQA

¹ Yo nami niiti fuud'e, waan infaakanne irati arge isi jibbe tatabe lakisuni iti kenne ufi jalaa baase isiini deemte;

² ammalle yo isiini deemte niiti nama d'ibi taate,

³ ka ammalle nami sunileeni isi jibbe, tatabe lakisuni iti keenne, ufi jala baase, yokhaani yo nami isii fuud'e sunini due,

⁴ duuba d'iirsi isii ka qara kaani, ka isi ufi jalaa baase isiini akasi taate, deebie maro lameeso niiti intolfatini. Wonti akanatiifi, yo inni maro lameeso deebie fuud'e ya AABBO Waaqa durati waan hamtu tolche. Isani waan hamtu akana kana lafa AABBO Waaqi isanii kennu keesati tolchu himmalle.

Seera aka heddu

⁵ Hojja nami d'io nad'eeni fuud'e, huji askarti yokhaani huji ala d'ibi, ta worra ira isa fageesitu, intolchini; isa ganna toko huji iti inkennina, ha worra keesa tae niiti isaa woliini gammadani.

⁶ Nama woergiftani, d'akha daakhu qabdo ira infud'atina. Yo iraa fuutani ya worra suni waan worri sagaleeni mid'aafatu d'owaitani ijeeftani.

⁷ Yo nami nama gosa isaa ka Israeli hatte tisse tolfate gurgurate hatticha suni ha ijeesani, akanaani hameenna akasi duraa baatani.

⁸ D'ukuba hama aka qomaat'a yo fuutani, waan qaaloleeni gosa Lawi tolcha isaniini jette tolcha, jabeesa; akuma anini worrani jed'e, jabaad'a tolcha

⁹ waan AABBO Waaqi keesani, gaafa isani lafa Misiri keesaa baatani, karaati Miriamu tolche qaabad'a.

¹⁰ Hojja isani nama d'ibi woergiftani, mana isaa seentani woya inni qabdo isanii kennu infud'atina;

¹¹ alati eega, ha inuumani isaanii d'ufuuni.

¹² Yo inni hiyyeesa tahe, woya suni imbulchina halkanuma suni deebisaafi;

¹³ galgala ch'ufa akasuma tolcha, aka inni woya sunini rafu duuba inni sii eebise, AABBO Waaqileeni sii eebisa.

¹⁴ Nama hiyyeesa isani hojattu ka gosa teesani yokhaani nama gosa d'ibi ka dira keesani keesa tau taanaani, waan inni sila isani ira argachu male d'owartani indabsina.

¹⁵ Guyya ch'ufa, ato aduuni ind'iine, beese guyya suni inni hojatteefi kennaafi; wonti akanatiifi inni hiyyeesa, beese suni male woma inqabu, guddo heregata. Hojja isani kennuufi baatani, inni maro teesaniifi AABBO Waaqati bohe, isanileeni wollaala argattani.

¹⁶ Wollaala ijoolleeti jettani abba inijeesiina, ka abbaale jettani ijoolle inijeesiina. Nama, wollaaluma inni tolche ch'allaani, ijeesani.

¹⁷ Nama gosa d'ibitifi ilmaani hiyyeeyi indabsina, ammalle woya niiti hiyyeeti qabdo infud'atina.

¹⁸ Qaabad'a, aka isani duri lafa Misiriti tisse taatani, ammalle aka AABBO Waaqi achii isani baase: Tanaafi anini arra seera kana isanii kenna.

¹⁹ Hojja mid'aani galfatani, ammo ka gari oobruti isani ira hafani ka hafe suni iti deebitani infud'atina, keessumafi, ilmaani hiyyeeyitifi nad'eeni hiyyeeyiti lakisa, aka AABBO Waaqi keesani, waan isani tolchitani ch'ufa keesa, isani eebisu.

²⁰ Hojja oobru teesani ta ejersa mid'aani isii guurattani, mid'aani isani iraa hafe iti dachaatani inguuratina: ka hafe sunini sagale keessumatifi, ilmaani hiyyeeyitifi nad'eeni hiyyeeyiti.

²¹ Hojja mid'aani zabibu guurattani, ka hafe iti dachaatani inguuratina; sagale keessumatifi ilmaani hiyyeeyitifi, nad'eeni hiyyeeyiti.

²² Haguma jirtani aka isani duri lafa Misiriti tisse taatani inded'ina; tanaafi anini arra seera kana isanii kenna.