Qaabacha Seera 21 - KITAABA WAAQA

¹ Yo lafa AABBO Waaqi isanii kennu keesati reefa namaa ka diiduma keesa ch'iisu, ka nama isa ijeese imbeenne argitani,

² jaaroleefi jaallabooti teesani ha d'ufte, fulla reefa iti argani sunifi haga dira d'aatu suni jira ch'ufa fageenna isaa ha biimituti.

³ Duuba jaaroleeni diri isaani dira kaani ch'ufa ira reefa suniti d'iaatu ha goromsa looni, ka taka ileenjisini, fuute,

⁴ bale bisaani keesaa yaani, ta taka nami qote infach'aasinitini d'ufte, achiti ha lume ch'absituti.

⁵ Qaaloleeni gosa Lawileeni ha achi d'at'uti; wonti akanatiifi nami dubbi hamtu, hojja nami harkaani wolgahu, qoru worra. AABBO Waaqi keesani worra fohate aka worri isaa hojatte, maqa isaatini namaa eebisu.

⁶ Duuba jaaroleeni diri isaani dira kaani ch'ufa ira fulla reefa suni iti arganiti d'iaatu ha goromsa looni suni irati harka d'iqatte,

⁷ waan jettu, Harki kenna d'iiga isaa imbumne yokhaani ilti teennaleeni nama d'iiga isaa buusa ingarre.

⁸ Ee AABBO Waaqa, worra kanke ka Israeli ka atini lafa Misiri keesaa baafte, araarami. Nu araarami, d'iiga nama woma intahini, ka due kana, nura inkayini.

⁹ Duuba akanaani waan isani waan AABBO Waaqi isani iraa fed'u guutanifi, inni d'iiga nama suni isani ira inkayu.

Waan nad'eeni lola keesati qabani

¹⁰ Hojja isani nyaapa keesani had'u d'at'ani AABBO Waaqi keesani harka keesaniti worra kenne isani worra qabdani,

¹¹ ka isani nad'eeni mimid'aadu worra boojitani keesati agartani fuud'u feetani,

¹² worra keesanitini galla, mata ira haada, qeench'a qoraafi.

¹³ Nad'eeni sunini ha woya ufi baafate ta d'ibi keeyate mana keesani keesati galte, jia toko worra isaaniiti bootuti; eegi suni dandeetani fuutani.

¹⁴ Yo eegi suni jibbitani yalabaatani ha fulla feetu yaatuti. Maro isani worra irreeni fuutanifi, isani worra tisse tolfatani yokhaani namaleti ingurgurina.

Waan angafi d'aalu

¹⁵ Yo nami nad'eeni lama qabu, ka ta inni jaalatufi taaleeni ilma d'aalteefi, ammo ka ilmi angafa sunini ka niiti inni ira jaalatu intahini,

¹⁶ guyya inni ilmaani isaati d'aala qoodu, inni ilma niiti inni ira jaalatu taani ira ch'iise, qooda angafa kennuufi himmalle.

¹⁷ Inni ilma angafa waan inni sila argatu ira ha maro lama kennuu, ato inni ilma niiti inni ira jaalatu taani tahu baatele. Nami ilma angafa angaftiti isaa jabeese d'aala isaa ch'ufa kennuufi male, waan inni qara d'alateefi.

Waan ilma ch'eera inqamne tolchani

¹⁸ Yo nami ilma mataa jaba, ka dubbi nama ind'ageenne yokhaani ka haad'afi abba ufi ato d'aananile insaalfaneefi qaabate,

¹⁹ abbaafi haati isaa ha fuute, jaarole dira isaani duraani d'ufte himatuti.

²⁰ Duuba waan jaarole dira sunitini jed'ani, ilma keenna kana mataani isaa jaba, nama ind'agayu, nule insaalfatu. Inni saabdi, ammalle aka hama farso d'uge machaa.

²¹ Duuba nami d'iira ka dira suni ch'ufti, ha woltibahe d'akhaani isa d'aane ijeesuti; akanaani hameenni akasi duraa baatani. Nami gosa Israeli ch'ufti, yo waan akana kana d'agaye, insodaata.

Seera aka heddu

²² Yo nami waan guddo hamtu ka isaa ijeesa tolche isa fannisani ijeesani,

²³ reefi isaa mukha suni gubba bullu himmalle. Guyyuma suni ha awaalaniti, wonti akanatiifi reefi mukha irati fannisani abaarsa Waaqa lafatini d'ufa. Reefa suni awaala, aka lafa AABBO Waaqi keesani isanii kennu int'ureesine.