Qaabacha Seera 20 - KITAABA WAAQA

¹ Hojja isani nyaapa keesanini wolhad'u d'at'ani, gaari fardi hirkisufi fardoole askarti heddu ta teesani ira jirtu argitani, worra insodaatina. AABBO Waaqi keesani, ka lafa Misiri keesaa isani baase, isani woliini jira.

² Hojja isani fulla had'iisati d'iaattani, qaallichi toko ha gabahe askartiini waan jed'u,

³ Worra Israeli ch'aqasa! Arra isani nyaapa keesanini woli haatani, garaa ilaafiina, worra sodaatani imudamiina.

⁴ AABBO Waaqi keesani isani wolindeeme, isani nyaapa keesani dabsattani.

⁵ Duuba worri gugurdaani askarti ha askartiti dubbate waan jed'uuni, Nami mana jaarate qara ineebisini isani keesa jira? Yo jiraate, ha worra ufiti deebiuti. Yo ka inni indeebiini isa lola keesati ijeesani, nama d'ibiti mana isaa eebisa.

⁶ Ammalle nami zabibu oobrate mid'aani qara inyaatini isani keesa jira? Yo jiraate, ha worra ufiti deebiuti. Yo ka inni indeebiini isa lola keesati ijeesani nama d'ibiti mid'aani isaa suni nyaata.

⁷ Nami dubra kad'ate fuud'u gahe isani keesa jira? Yo jiraate, ha worra ufiti deebiuti. Yo ka inni indeebiini isa lola keesati ijeesani, nama d'ibiti intala inni kad'ate suni fuud'a.

⁸ Ammalle worri gugurdaani askarti ha dubbate waan jed'uuni, Nami daafanaani wosodaatu isani keesa jira? Yo jiraate ha worra ufiti deebiuti. Yo inni deebiu baate, inni worra d'ibile garaa laafisa sodaachisa.

⁹ Eegi worri gugurdaani askarti dubbi suni buufate, nama gugurda askarti dura deemu ha tolfataniti.

¹⁰ Hojja dira had'u d'at'ani, qaraa fit'e worra suni iti lakisa, haga worri harka keennatuti.

¹¹ Yo worri fullo banate harka kennate, worri ch'ufti ha tisse isanii tahuti, irreeni hojachifad'a.

¹² Ammo yo worri dira suni harka kennachu dide isani had'e, dira suni marsa, had'a.

¹³ Duuba hojja AABBO Waaqi keesani dira suni harka keesaniti keenne, nama d'iira ka dira suni ch'ufa ijeesa.

¹⁴ Ammo nad'eeni, ijoolle, hori waan dira suni keesa jira ch'ufa boojia. Waan nyaapa keesani ira boojitani suni ch'ufa fud'ad'a, horad'a, AABBO Waaqi ya isanii kenne.

¹⁵ Aki isani dira lafa isani iti qubattani iraa fago tolchitani akana.

¹⁶ Ammo yo dira lafa AABBO Waaqi isanii kenne, haatani qabdani waan maqa nama fakaata tokole inhambisina ch'ufa fit'a.

¹⁷ Worra Hititi, ka Amoriti, ka Kanaaniti, ka Periziti, ka Hiviti, ka Yebusile, akuma AABBO Waaqi tolcha isaniini jed'e kaani,

¹⁸ worra suni ch'ufa fit'a, aka worri waan hamtu, hojja worri waaqa ufi kad'atu tolfatu, isani barsiise ch'ubbu hamtu keesa isani imbumne.

¹⁹ Hojja isani dira haga guyya heddu had'iisa marsitanile, mukha mid'aani tokole imurina. Mid'aani suni nyaad'a, ammo mukha imurina; mukhi isanii nyaapaniti.

²⁰ Ammo mukha nami mid'aani isa inyaanne, yo feetani mura, aka boota tolfad'a, dira suni had'a, haga dabsattani qabdaniti.