Qaabacha Seera 16 - KITAABA WAAQA

¹ Jia Abibu qaabad'a, jila Pasaka jed'ani AABBO Waaqa keesani tolcha; wonti akanatiifi halkani toko, jia suni keesa, inni lafa Misiri keesaa isani baase.

² Fulla AABBO Waaqi aka isa iti kad'attani fohate d'aqa, loonifi ree teesani toko jila Pasakati qala, aka akasiini AABBO Waaqa guddiftani.

³ Hojja sagale jila suni nyaattani, qit'a bukho qabu inyaatina. Haga guyya torba qit'a bukho inqamne nyaad'a akuma gaafa lafa Misiri keesaa baqatani tolchitani. Qit'a kana, ka qit'a gaargala jed'ani, nyaad'a, aka isani haga jirtani guyya lafa Misiri, ta isani keesati gaargaltani, keesaa baatani qaabattani.

⁴ Haga guyya torba, mana keesani keesa, nama tokole bukho irati inargini, ammalle fooni hori halkani qara suni qalani imbulchina, halkanuma suni fit'a.

^5-6 Hori jila Pasaka fulla AABBO Waaqi keesani fohatu, ka isa iti kad'attaniti qala, fulla d'ibi tokoleti inqaliina. Isani duri hojja aduuni d'iite lafa Misiri keesaa baatani, tanaafi hojja aduuni d'iitu qalad'a.

⁷ Fooni suni d'aaba, fulla AABBO Waaqi keesani fohatuti nyaad'a: boriyyaate worrati dachaa.

⁸ Haga guyya jaa qit'a bukho inqamne nyaad'a; ammalle guyya torbeeso wolwoldaa, AABBO Waaqa keesani kad'ad'a; guyya suni huji tokole inhojatina.

Jila gaafa mid'aani murani

⁹ Haga gaafa mid'aani haamtaaniiti asi torbaani torba heda;

¹⁰ duuba jila gaafa mid'aani murani tolfad'a AABBO Waaqa keesani guddisa; aka inni isani eebise gula waan fed'i teesaniini isaa baaftani baasaafi.

¹¹ AABBO Waaqa keesani durati gammada, isani, ilmaani teesani, hojattu teesani, worra gosa Lawiti, keessuma teesani, hiyyeeyifi nad'eeni hiyyeeyi ta dira keesani keesa teetu. Jila suni fulla AABBO Waaqi fohateeti tolfad'a.

¹² Isani aka gaafa duri lafa Misiriti tisse taatani qaabattani, seera kana guutu maltani.

Jila Hoosa

¹³ Eegi isani mid'aani keesani ch'ufa d'aanatani mid'aani keesani ka zabibu ch'ufa miich'itani, jila Hoosa haga bulti torba tolfad'a.

¹⁴ Jila suni keesa isanifi ilmaani teesani, hojattu teesani, worra gosa Lawiti, keessuma teesani, hiyyeeyefi nad'eeni hiyyeeyi ta dira keesani suni keesa jirtu woliini gammada.

¹⁵ Haga guyya torba fulla AABBO Waaqi keesani fohateeti jila tana tolfad'a AABBO Waaqa keesani guddisa. Gammada, waan AABBO Waaqi keesani huji teesanifi mid'aani keesanile eebiseefi.

¹⁶ Ganna keesa maro sadi nami keesani ka d'iira ha AABBO Waaqa fulla inni fohateeti dura d'ufuti: Jila Pasaka taanaani, jila gaafa mid'aani murani taanaani, ammalle jila Hoosa taanaani, worri d'iira suni tokoleeni harka duwa ind'ufini;

¹⁷ ammo nami ch'ufti, haga dandau, waan AABBO Waaqi isaa kenne gula, ha wo baasuti.

Aka dubbi d'uga gula qorani

¹⁸ Dira AABBO Waaqi keesani isani kenne ch'ufa keesati, jaallabafi jaarole dubbi qortu tolfad'a. Worri kunini ha d'uga gula dubbi qore muruti.

¹⁹ Worri d'ara gula dubbi qore, yokhaani nama ira inch'iisini. Ammalle gumbole inyaatini, wonti akanatiifi, gumbooni ila nama qalbi qabule duuchite, nama d'ugale kiyyibsifti.

²⁰ Waan d'ibi lakisa, d'uga ch'alla gula deema, aka lafa AABBO Waaqi keesani isanii kennu fud'attani iti qubattani.

²¹ Hojja fulla AABBO Waaqa iti kad'attani mid'aafattani, akheekha mukha ka waaqa Ashera jed'ani bira ind'aabiina.

²² D'akha woyyuma olind'aad'abiina, AABBO Waaqii waan suni guddo jibba.