Qaabacha Seera 10 - KITAABA WAAQA

¹ Jennaani AABBO Waaqi waan naani jed'e, D'akha hahafalicha lamaani aka ka qara kaani boch'i sanduqa keesa nat'ule mukhaani mid'aasiifi, gaara gubbati natiini kooti,

² anini dubbuma d'akha hahafalicha atini ch'absite ka qara kaani irati t'aafe kanale irati t'aafa; duuba atini maro tana sanduqa keesa kayu malte.

³ Jennaani anini sanduqa mukha d'adachatiini mid'aase, d'akha hahafalicha lama, ka akuma d'akha qara kaani jiru boch'e, gaarani kore.

⁴ Jennaani AABBO Waaqi d'akha hahafalicha kaani irati dubbuma duri inni d'akha qara kaani irati t'aafe, Seera kud'annaani ka inni gaafa ibida keesa isaniini dubbate, guyya isani fulla gaarati woltibaatani isani kenne, irati t'aafe. AABBO Waaqi d'akha hahafalicha suni naa kenne,

⁵ anini gargale gaara iraa gabue. Jennaani akuma AABBO Waaqi naani jed'e, sanduqa anini mid'aase kaani keesa kaye arti asile artuma keesa jira.

⁶ Worri Israeli eellani worra Yakaniiti godaane Moserani bahe, artiti Harunini due, awaalani, jennaani ilmi isaa Eleazarini huji qaalluma iraa fuud'e.

⁷ Artilee kaani Gudgoda qubatani achii kaani Yorbatha lafa madda guddo qabdu qubatani.

⁸ Gaafasi AABBO Waaqi worra gosa Lawi fohate, aka worri Sanduqa Wold'aqisa baate, huji qaallu isaa hojatte maqa isaatini namaa eebisu. Arrale hujiini worraa sunuma.

⁹ Wonti gochiti Lawi qooda lafa aka gosa taani, inargatiinifi waan kana: Akuma AABBO Waaqi worraa kakhate, qoodi worraa huji qaallu.

¹⁰ Anini akuma gaafa qara kaani guyyaafi halkani afurtama gaara ira tae. AABBO Waaqi ammalle na ch'aqase, badi qara isani balleesu fed'e lakise.

¹¹ Jennaani AABBO Waaqi waan nami jed'e, Beeni, worra kana dura deemi, aka worri lafa anini ababoota worraati kenne fud'atu.

Waan Waaqi nama iraa fed'u

¹² Amma worra Israeli AABBO Waaqi maani isani iraa fed'a? Wonti inni isani iraa fed'u, aka isani AABBO Waaqa keesani sodaatani, kara isaa ch'ufa gula yaatani, isa jaalatani, AABBO Waaqa keesani garaafi onne teesani ch'ufaani hojattani,

¹³ ammalle aadaafi seera, ka anini AABBO Waaqi ara isanii kenne, guutani akanaani eeba argattani.

¹⁴ Gubbaleeni haguma geetunu ta AABBO Waaqa keesaniti: lafafi wonti isii keesa jiraleeni ch'ufti ka isaati,

¹⁵ Ammo jaalalti AABBO Waaqa, ta inni ababoota teesani jaalate, guddo jabdu, tanaafi inni gosa d'ibi keesaa isani fohate haga arrale gumi ufi isani tolfate.

¹⁶ Tanaafi deebitani mata injabaatiina armaa achi AABBO Waaqa d'agaya.

¹⁷ AABBO Waaqi keesani Waaqa Waaqa ch'ufa ira jirufi jabeenna, jabeenna ch'ufa ira jiru. Inni gudda jaba ka nami sodaatu: ka nama gargari infillee yokhaani ka gumbo inyaanne.

¹⁸ Inni haad'a hiyyeesatifi hiyyeeyile qorqorate dubbataafi: Inni keessuma teennale jaalate beelafi daara baasa.

¹⁹ Tanaafi keessuma jaalad'a, isanileeni duri lafa Misiriti keessuma.

²⁰ AABBO Waaqa keesani sodaad'a, isuma ch'alla kad'ad'a. Isa biraa indeemina, maqa isaa ch'allaani kakhad'a.

²¹ Isaa faarsa, inni Waaqa keesani, isanileeni waan mama jabdu inni isani tolche ya iluma teesaniini agartani.

²² Gaafa ababooti teesani lafa Misiriti godaante, worri nama torbatama ch'alla, ammo amma AABBO Waaqi keesaani ya isani daraarse, aka urji garaa waaqa isani tolche.