Nehemia 8 - KITAABA WAAQA

¹ Ato jii torbeeso ingahiini nami Israeli ch'ufti dira ufiitini bahe iti qubate. Guyya qara ka jia torbeeso worri ch'ufti Yerusalemu keesa fulla Fullo Bisaaniti wolti bahe. Duuba qaallicha Ezra jed'ani, ka waan Seera Waaqa, ka AABBO Waaqi Musani worra Israeliiti kenne, beekhu yaamani, Kitaaba Seera nuu fuud'i jed'aniini.

² Jennaani inni kitaaba suni fulla gumiini iti baatu sunitini d'ufe — d'iira, nad'eeni, ijoolle gugurdo wohubatu.

³ Duuba achiti Fulla Fullo Bisaani, ta biyyiti woltibaateti, inni Seera haguma ganama iti keeyate guyya guddati d'aabe worraa soome, nami ch'ufti aka dansa qalbi tokooni ch'aqase.

⁴ Ezrani waan mukhaani mid'aasani, ka guyya suni jed'ani jaarani, gubba eja. Jari kuninileeni mirga isa ejaanja: Matithia, Shema, Anaya, Uria, Hilkia, Maaseya; jari kunileeni bita isaa ejaanja: Pedaya, Misaeli, Malkia, Hashumu, Hashbadani, Zekaria, Meshulamu.

⁵ Ato Ezrani waan jaarani kaani gubba biyya dura eju, biyyiti ch'ufti ila iti qabde isa ilaalte, inni kitaaba bane jennaani nami ch'ufti olkakae.

⁶ Ezrani waan jed'e, AABBO Waaqa gudda ha faarsani! Jennaani gumiini ch'ufti harka olfud'ate waan jette, Amini! Amini! Duuba jilbifatani gajed'ani addaani lafa tuqani Waaqa kad'atani.

⁷ Jennaani olkakaani, fulla ufi ejaanjani, worri Lawi kunini waan Seera worra barsiise: Yeshua, Bani, Sherebia, Yamini, Akubu, Shabethai, Hodai, Maaseya, Kelita, Azaria, Yozabadi, Hanani, Pelaya.

⁸ Kitaaba Seera Waaqa soomani, dubbi isaa biyyaa garagalchani barsiisani hubachiisani.

⁹ Biyyiti waan Seeri jed'u d'ageennaani laalefate boote. Duuba namicha gudda Nehemia jed'anifi, qaallicha Ezra jed'ani, ka waan Seera beekhufi, worri Lawi ka dubbi Seera Waaqa nama barsiisu waan biyyaani jed'ani, guyyaani kunini AABBO Waaqa keesani guyya qulqullo, tanaafi lalefattani imbohina.

¹⁰ Amma beena gala jila tolfad'a, daad'ifi sagale d'ad'a qabdu soorad'a, nama inqamnelee keenna. Guyyaani kunini Aabbo Waaqa keenna qulqullo, tanaafi ilaalefatina. Gammadi AABBO Waaqi isanii kennu isani jabeesa.

¹¹ Worri Lawi biyya keesa yae waan jed'eeni, ch'allisa laalefatani imbohina guyyaani kunini qulqullo.

¹² Duuba biyyiti ch'ufti kaate, worra ufiti galte, nyaate d'udde, waan qabdu woliini geete, waan worri dubbi soomanifi taani ch'ufa hubateefi.

Jila Hoosa

¹³ Boriyyaate jari balbala gosati mataa qaaloleefi worra Lawi woliini, gara Ezra dubbi Seera barachu d'aqani.

¹⁴ Jennaani Seera AABBO Waaqi Musani namaa kenne keesati, aka jia torbeeso keesa worri Israeli hoosati gale jila tolfatu, argani.

¹⁵ Tanaafi worri qonqo tana Yerusalemufi dira d'ibi ch'ufa keesa erge: Gaareeni d'aqa, dameele ejersa fa, ta dambi fa, ta meet'i fa, yokhaani mukha d'ibi obeensa qabu ch'ira, akuma Seera keesa t'aafani gula hoosani jaara.

¹⁶ Jennaani biyyiti dameele ch'irte, mana worra gubbafi d'aatu mana worraatifi d'aatu Mana Waaqatifi ballinna d'aatu fulla Fullo Bisaanitiifi ka fulla Fullo Efraimuti hoosa jaarte.

¹⁷ Worri Eegi boojiani gale kaani ch'ufti hoosa jaare keesa qubate. Jila suni taka haga bara Yoshua ilma Nuniti asi akasi intolfanne, duuba guyya suni guddo gammadani.

¹⁸ Haguma jila qarati iti keeyatani guyya hobaati jilati d'aabani, Seera suni ch'ufa biyyaa soomani. Guyya torba jila tolfatani, guyya saddeeteeso, akuma Seeri jed'u wolti bahani jila suni hobaasani.