Nehemia 6 - KITAABA WAAQA

¹ Sanbalatifi Tobiafi Geshemufi jari nyaapa keenna kaani ch'ufti aka nu naabo jaare fulla ch'ufa duuchine huji isi ch'ufa hobaamne d'agaye. Ammo taatule balbala Fullo keesa innanne.

² Jennaani Sanbalatifi Geshemuni qonqo nati ergani waan nani jed'ani, kooti, olla toko ka diida Ono keesati woli argina. Ammo worri sobe na balleesu fed'e.

³ Anileeni qonqo worrati erge waan jed'eeni, Anini huji jabdu harkaa qaba, aka achi d'ufu inqabu. Anini agarta teesani jed'e huji tiyya illakisu.

⁴ Worri maro afuri qonquma suni nati erge, aninileeni qonquma suni worraa deebise.

⁵ Jennaani Sanbalatini hojattu isa maro shaneeso tatabe inch'ufinini nati erge.

⁶ Tatabe suni keesati akana t'aafani: Geshemuni waan nani jed'e, gochiti d'ibiini waan jettu, Nehemiafi gochiti Yahudi aka finna hayyu kana diddu mala d'aachu jirti, tanaafi worri tae naabo jaara. Ammalle waan jed'ani, Nehemiani hayyu ufi tolchu fed'e,

⁷ tanaafi inni raagoota Yerusalemu keesati isa lalabde hayyu Yuda tolchitu fohate. Jecha kana hayyuuni inuma d'agaya, tanaafi kooti, mala woliini d'oomna.

⁸ Anini qonqo iti erge waan jed'eeni. Wonti atini jette suni ch'ufti d'ara, woma atini herega keetiini baafte ch'alla.

⁹ Worri nu sodaachise, huji ejachisu fed'afi akasi taha. Ammo anini Waaqa kad'ad'e waan jed'e, Ee Waaqa, na jabeesi!

¹⁰ Gaafasi anini kae mana Shemaya, ilma Delaya, ka ilma Mehetabeli, ka dandae mana ufi keesaa imbaane d'aqe. Jennaani inni waan nani jed'e, Anaafi sii yaane, Mana Waaqa keesati d'okhanne balbala ch'umna, wonti akanatiifi worri halkaniini d'ufe si ijeesa.

¹¹ Anini waan jed'eeni, Anini nama wo baqate d'okhatuniti d'iira aka kiyya tana Mana Waaqati baqachaani infakati? Anini Mana Waaqati imbaqad'u, akasi naa infakatu.

¹² Anini waan kana herege jennaani, aka Waaqi Shemayani indubbatini, ammo Tobiafi Sanbalatini isa gumbo nyaachisani akasi dubbisani arge.

¹³ Woni worri gumbo isa nyaachisefi, aka na sodaachisani, ch'ubbu keesa na buusani akanaani na ch'eersani gurra na balleesani.

¹⁴ Anini Waaqa kad'ad'e waan jed'e, Ee Waaqa, waan Tobiafi Sanbalatini tolchani qaabad'i — worra balleesi. Ammalle niiti Nodia jed'anifi raagoota na naasisu feete taanile akasuma tolchi.

Aka ijaarsa naabo hobaasani

¹⁵ Guyya shantami lama hojattani, guyya diddami shaneeso ka jia Eluli jed'ani huji ijaarsa naabo hobaasani.

¹⁶ Nyaapi keenna, ka d'aatu teenna jiru kaani, dubbi suni d'ageennaani aka hama ch'eere; wonti akanatiifi nami ch'ufti, aka hujiini suni qarqaarsa Waaqatini hobaate, ya beekhe.

¹⁷ Bara suni ch'ufa jaaroleeni Yahuditiifi Tobiani tatabe wolti ergani.

¹⁸ Nami Yuda hedduni gama Tobia jira, waan inni dubra Shekani, ka ilma Ara, ka gosa Yahudi, fuud'eefi. Tana malele, ilmi isaa Yehohanani dubra Meshulamu, ilma Berekia, fuud'e.

¹⁹ Biyyiti dansuma Tobia nati haasofte, waan ani jed'e ch'ufa isati haasofte. Duuba inni tatabe naani sodaachisu nati t'aafe.