Nehemia 13 - KITAABA WAAQA

¹ Seera Musa lalabani biyyaa soomnaani fulla worri Amonitifi ka Moabu gumi Waaqa seenu himmalle jed'aniini bahani.

² Wonti akasi jed'anifi worra Amonitifi ka Moabuti duri, gaafa worri Israeli lafa Misiri keesaa bahe, sagaleefi bisaani d'owate, Baalamu beese kenne, kooti, worra Israeli abaari jed'eeni; ammo Waaqi keenna abaarsa suni garagalche eeba tolche.

³ Worri Israeli seera kana d'agaye jennaani nama gosa isaani intahini ch'ufa ufi keesaa baase.

Aka Nehemiani waan qara bade mid'aase

⁴ Qaallichi Eliashabu jed'ani, ka mana miha Waaqa keesati olkayaniti mataa, Tobiani bara heddu woli jaala.

⁵ Inni Tobia qarqaare, mana gudda sila waan Waaqaa baasani keesati olkayani kenneefi, wonti baasani qara duri mana suni keesati olkayani tana: mid'aani, hit'aana, miha Mana Waaqa keesani hojattani, waan qaalolee baasani, qooda mid'aanitifi daad'i, d'ad'a ka worra Lawitifi sirbitufi worra Mana Waaqa eeguu baasani.

⁶ Gaafa mana suni isaa kennani, anini Yerusalemu keesa injiru, wonti akanatiifi ganna sodomi lameeso ka Artashartani lafa Babiloni fide keesa anini gara isa d'aqe. Diqo wo bule jennaani, Yerusalemuti deebiu fed'a,

⁷ na gadid'iisi jed'eeni. Artini baannaani aka Eliashabuni Mana Waaqa keesa Tobia fulla inni bulu kenneefi arge aka male iraa rifad'e.

⁸ Guddo dallane miha Tobia ch'ufa mana suni keesaa d'id'imati d'ae.

⁹ Duuba biyya yaame, Mana kana qulqulleesa, miha Mana Waaqatifi mid'aani Waaqaa baasanifi hit'aanale iti deebisa jed'eeni.

¹⁰ Ammalle wonti anini d'agaye, worri Lawitifi sirbituni Mana Waaqa qooda, sila baasanifi kaani d'abde jennaani, namu kae oobru ufiti gale.

¹¹ Anini jaaroleti kae waan jed'eeni, Isani maanifi Mana Waaqa balleesitani akana tolchitani? Duuba worra Lawitifi sirbitu suni Mana Waaqati deebise hojachiise.

¹² Jennaani worri Yuda ch'ufti qooda mid'aanitifi daad'ifi d'ad'ale Mana Waaqatini d'ufe.

¹³ Duuba anini jara kana fohad'e, huji maneeni keesati woi olkayani suni harka isaaniti kenne: Qaallicha Shelemia; Sadoki, ka Seera beekhu; Pedaya, ka gosa Lawi. Nami worra qarqaaruleeni, Hanani, ilma Zakuri, ka ilma Matania. Anini imbeekha, jari kunini nama d'uga, ka qooda kana d'uga gula biyyaa qoodu.

¹⁴ Ee Waaqa kiyya, waan anini Mana keeti tolcheefi huji isaa ta anini tolche tana qaabad'i.

¹⁵ Bara suni anini worra Yuda ka guyya Sabato zabibu ch'ach'arase mid'aanifi daad'ifi zabibufi odafi waan d'ibile harreleti fae Yerusalemu geesu arge; duuba anini worra gorse waan jed'eeni, guyya Sabato woma ingurgurina.

¹⁶ Nami gari ka duri dira Tiroti d'ufe Yerusalemu keesa tau qurt'umifi miha aka heddu diraani d'ufe guyya Sabato worra keennati gurgure.

¹⁷ Jennaani anini jaarole Yudati kae waan jed'eeni, woni hamtuni isani tatani guyya Sabato t'ureesitani kunini maani?

¹⁸ Ababooti teesani duri akana taate, maro waan sunitifi — Waaqi keenna nu imballeesine? Ammo isani guyya Sabato t'ureesitani dallansu Waaqa hagasile ira nutiini d'uftani.

¹⁹ Tanaafi anini seera baase, galgala, hojja ayyaani Sabato, maru ch'ufa balbala diraa ch'ufad'a, haga Sabatoni dabartuti imbanina, biyyaani jed'e. Ammalle anini jara kiyya haga toko fulla fullo ch'ufa kaye, guyya Sabato waan tokole nami armaani oliinseeniini, jabeesa eega jed'eeni.

²⁰ Maro lamafi sadi daldaltuni ta waan aka heddu gurgurtu, halkani gumata naabo dira gama ala bulte.

²¹ Anini waan worraani jed'e, Isaani maanifi naabo gama bultani? Yo isani iti deebitani, anini isani qaba. Guyya suni asi worri taka iti deebie guyya Sabato ind'umne.

²² Anini waan worra Lawitini jed'e ufi qulqulleesa, beena, balbala eega, aka nami guyya Sabato int'ureesine. Ee Waaqa kiyya, maro waan kanatifi na qaabad'i jaalala tante guddooni badi na d'owi.

²³ Bara suni anini, aka nami Yahudi hedduni dubra gosa Ashdoditifi Amonitifi ta Moabu fuud'e d'agaye.

²⁴ Ijoolleeni worraa hedduni afaani Ashdodi yokhaani afaani d'ibi barate afaani keenna wollaalte.

²⁵ Jennaani anini jara suniti kae abaare d'aane, rifeensale ira bubuqise. Duuba anini aka worraafi ijoolleeni worraleeni iti deebite nama gosa dibitini woli infuune, maqa Waaqatini kakhachiise,

²⁶ waan jed'eeni, Nami Solomoni duri ch'ubbu keesa buuse nad'eeni gosa d'ibitiniti? Gosa d'ibi keesa hayyuuni aka isaa tokoleeni injiru, ka Waaqi isa jaalate hayyu worra Israeli ch'ufa isa tolche; ammo inni garagale ch'ubbu akasi suni tolche.

²⁷ Nu amma tana isani gula baane, waan hamtu Waaqa keenna durati tolchine, nad'eeni nyaapaa fuuna re?

²⁸ Yoiyadani ilma qaallicha gudda, Eliashabu, ammo ilmi yoiyada toko dubra Sanbalati, ka worra Beth-Horoni, fuud'e; tanaafi anini isa Yerusalemu keesaa gusse.

²⁹ Ee Waaqa kiyya, aka worri kunini huji qaalomatifi wold'aqisa atini qaaloleefi worra Lawi woliini tolfate t'ureese qaabad'i.

³⁰ Akanaani anini waan gosa teenna aada intahini ch'ufa balleese akasiini gosa teenna qulqulleese qaaloleefi worra Lawi aada worri gula hojachu male garsiise.

³¹ Anini, qoraani sorioni gubani guyya fed'ani ch'ufa kootani jed'e, ammalle, mid'aani qara bilchaatale biyyaani kootani jed'e. Ee Waaqa, waan anini tolche kana ch'ufa fa fa qabad'i, naa eebisi.