Nehemia 10 - KITAABA WAAQA

¹ Nami qara beesisa suni ira keeyate namicha gudda Nehemia ilma Hekalia jed'ani, isa gula Zedekiyati keeyate. Duuba eege jari kuni d'ibileeni keeyate:

^2-8 Qaalole: Seraya, Azaria, Yeremia, Pashuri, Amaria, Malkia, Hatushi, Shebania, Maluki, Harimu, Meremothi, Obadia, Danieli, Genethoni, Baaruki, Meshulamu, Abiya, Miyamini, Maazia, Bilgai, Shemaya.

^9-13 Worra Lawi: Yeshua ilma Azania, Benui ka balbala gosa Henadadi, Kadmieli, Shebania, Hodia, Kelita, Pelaya, Hanani, Mika, Rehobu, Hashabia, Zakuri, Sherebia, Shebania, Hodia, Bani, Beninu.

^14-27 Jaarole Gumii: Paroshi, Pahath-Moabu, Elemu, Zatu, Bani, Buni, Azgadi, Bebai, Adoniya, Bigwai, Adini, Ateri, Hezekia, Azuri, Hodia, Hashumu, Besai, Harifu, Anathothi, Nobai, Magapiashi, Meshulamu, Heziri, Meshezabeli, Sadoki, Yadua, Pelatia, Hanani, Anaya, Hoshea, Hanania, Hashubu, Haloheshi, Pilha, Shobeki, Rehumu, Hashbna, Maaseya, Ahiya, Hanani, Anani, Maluki, Harimu, Baana.

Kakhu worri kakhate

²⁸ Nu, worri Israeli, qaaloleefi worra Lawitifi worra Mana Waaqa eegufi sirbitufi, hojattu Mana Waaqatifi nami kaani d'ibiini ch'ufti, ka Seera Waaqa gula gosa d'ibi ta lafa teenna keesa teetu keesaa ufi baamne, nuufi nad'eeni teennafi ilmaani teenna gugurdoleni,

²⁹ jaarole teenna woliini, inkakhanna aka, hojja nu kakhu suni ch'absine abaarsa argannu. Kakhuuni suni tana: aka nu Seera Waaqi Musani nuu kenne jalati bullu. Ammalle aka nu waan AABBO Waaqi guddaani keenna nu barsiisu guunnu; ammalle aka nu seerafi waan inni fed'u ch'ufa jabeesinu.

³⁰ Nu nama gosa d'ibi, ka lafa teenna keesa tauni, woli infuunu.

³¹ Hojja worri gosa d'ibi mid'aanifi waan d'ibile guyya Sabatotifi guyya jila deebie nu gurgure, nu iraa imbinnu. Ganna torbeeso ch'ufa lafa qotu lakimne, nama gati teenna qabule ch'ufa yaala baanafi.

³² Ganna ch'ufa nuuni ch'ufti qarsi huji Mana Waaqati baasu malani baamna.

³³ Wonti nu huji Mana Waaqati baamnu tana: Qit'a Waaqaa baasani, mid'aani guyya ch'ufa Waaqaa baasani, hori gubani Waaqaa baasani, waan guyya Sabatotifi guyya jila baatitifi jila d'ibile baasanifi ammalle waan qulqullo d'ibi baasanifi, sorio daba Israelitini baasanifi waan d'ibi Mana Waaqati baasani ch'ufa.

³⁴ Nu, gumifi qaaloleefi worri Lawileeni, ganna ch'ufa hit'aa buufanne balbala gosa ta qoraani sorio AABBO Waaqa keennatiini gubani ch'absitu akasiini fohanna, akuma Seera keesati t'aafani gula.

³⁵ Nu ganna ch'ufa mid'aani qara muranifi mid'aani mukeeni teenna baaftu ka qara bilchaatu, Mana Waaqa geesina.

³⁶ Ilma angafa ka nuu d'alatu ch'ufa Mana Waaqa geesine qaaloleetini d'umna, aada seera keesati t'aafani gula. Ammalle nu watiyefi ilmoole ree, ta qara d'alatu ch'ufa, Waaqaa baamna.

³⁷ Nu mid'aani daakhani bukheesani, ka mid'aani qara muranitifi waan d'ibi baasani, daad'i taanaani, d'ad'a tanaani, mid'aani gosa heddu ka mukha taanaanile, ganna ch'ufa Mana Waaqati geesine qaaloleeti kennina. Ammalle qooda mid'aani oobruuni teenna baaftu, ka nu baasu male, worra Lawi ka qooda mid'aani olla keenna guuruti kennina.

³⁸ Qaaloleeni d'aloota Haruni worra Lawi, hojja qooda mid'aani guurani woliini jiraachu malte. Ammalle worri Lawi qooda guuru suni kud'ani keesa qooda toko ha mana keesa fulla woi olkayaniti geesu, aka Mana Waaqatini hojattani.

³⁹ Worra Israelitiifi worri Lawi mid'aanifi daad'ifi d'ad'a baasani ch'ufa ha mana keesati woi olkayaniti geesuti, fulla miha Mana Waaqa iti olkayanifi fulla qaaloleefi jara Mana Waaqa eegufi sirbituleni iti galtu. Nu Mana Waaqa keenna haga jiru illakimnuu.