Nahumu 3 - KITAABA WAAQA

¹ Diri d'artichi d'iiga namaa buusu ya bade. Inni waan heddu qaba, ka saamani fud'atani!

² Ch'aqasa, d'uqeesa lichotiifi kokeesa miila gaaritiifi gulubsu fardatiifi dibbeesa gaarile!

³ Yaabattuuni farda gussite, goraadeefi woraani bibiliqa! Reefi namaa ka muumme inqamne wolti tuulame, nami iti gugufata!

⁴ Dira Ninawi sharmut'icha balleesu jirani. Inni mid'aaga, ammalle aka hama sobe nama balleesa. Inni duri gosa heddu sharmut'omaani sosobe tisse tolche balleese.

⁵ AABBO Waaqi Guddaani waan jed'u, Ee Ninawi, anini si gaargalcha. Anini woya siraa baase, qulla si d'aabe, ch'eera kanke gosa ch'ufaa garsiisa.

⁶ Anini guddo si tufad'e t'uri hamtu si d'iba. Namileeni fuula yakate aka hama si laala.

⁷ Nami si argu ch'ufti siraa rifate waan jed'u, Ninawi ya balleesani ona tolchani! Eenti nahe bohafi?

⁸ Ninawi, atini dira Misiri ka Thebe jed'ani ira jirta? Innileeni galaana ufii d'aatu qaba, ka aka naabo isa marsu, ka galaana Nile jed'ani.

⁹ Diri suni lafa Kushitiifi lafa Misiri mohate, motumti isaa haga inqabdu, worri Libia goli worraati.

¹⁰ Ammo worra Thebe boojiani lafa d'ibi geesani. Kara ch'ufa keesati ijoolle worraa d'aanani fit'ani. Jara worraa gugurda sansalataani wolti hid'ani boojiani gargari qoodatani.

¹¹ Ee Ninawi, atinileeni farso d'udde machoofte daalloofta! Atini nama si boojie kaani iraa baqachu feeta.

¹² Maneeni teesani jajabduleeni mukha oda, ka mid'aani isaa bilchaatani, fakaati: mukhi suni yo chochoosani mid'aani isaa afaani keesaniti jigani!

¹³ Askartiini teesani nad'eeni fakaati, fullooni dira keesanileeni ya nyaapa keesanii banamte. Ibidi sibiila balbala fullo naabotiini jaarani ch'ufa inguba.

¹⁴ Bisaani woraabad'a, nyaapa isani marsu durati kurfefad'a maneeni teesani jajabdu jabefad'a! D'oqe supa, matofaara mid'aasa!

¹⁵ Yo akasi taatanile, ibidaafi goraadeeni inuma isani balleesiti. Akuma awaanisi mid'aani lafa ira sossu, isanile sossani. Isani ya akuma awaanisi hortani!

¹⁶ Isani bunat'u heddu ta urji gubbaa ira jirtu ya d'altani! Ammo worri amma ya bade, aka awaanisi koola ballise barise badu.

¹⁷ Worri keesani gugurdaani tuuta awaanisaa, ta naabo ira guyya qabbana ch'iiftu, fakaata. Ammo isiini, hojja aduuni baatu, imbarifti, fulla isiini yaatu nami imbeekhu!

¹⁸ Ee hayyu Ashuru, jaaroleeni tante ta biyya tissitu ya raawatte, worri keesani gugurdaaleeni ya d'umate! Amma gumiini tante ya gaara gubbati gargari bitinoofte, nami worra worrati deebisu tokoleeni injiru.

¹⁹ Madaani tante qorsa inqabdu, nami si fayyisuleeni tokoleeni injiru. Nami badi tante d'agaye ch'ufti harka d'ae gammada. Nami tokoleeni waan hamtu atini guyya ch'ufa tolchitu ka jalaa bahe injira?