Nahumu 1 - KITAABA WAAQA

¹ Tunini waan dira Ninawi, ka Nahumuuni, nami gosa Elkoshi, daayyani arge.

Dallansu AABBO Waaqi Ninawiti dallane

² AABBO Waaqi nama isaani morku inoobsu; inni nama isaani morku gaargalche, nyaapa ufii dallansuuni eegata.

³ AABBO Waaqi hurre indallanu, ammo humna jabdu qaba, ta nama wo yakeeni gaargalchu. Fulla AABBO Waaqi deemu bubbeeni kaate, dumansileeni aka awaara miila isaa jala kaa!

⁴ Inni baariini yau d'owe, galaanale gogosa! Oobruuni Bashani qanch'ooratte, gaari Karmeli diimate, daraaraani Lebanoni bada.

⁵ Gaareeni isa durati chochoote, kubileeni isa durati, bat'i. Hojja AABBO Waaqi d'ufu, lafti lelet'e, nami isi keesa jiru ch'ufti mudame hollata.

⁶ Yo inni dallane, eenuti dandae iraa hafa? Dallansuuni isaa hamtu, eenuti dandae jalaa baha? Inni dallansu isaa ta aka ibida gubbaa gabuuse, d'akhaayeleeni isa durati ch'ach'abde, bulloofte awaara taati.

⁷ AABBO Waaqi dansa; guyya gaargala gumi ufii jabeese qorqorata; nama qarqaarsa isa ira fed'atu ch'ufa inuma tissa.

⁸ Akuma bisaani lolaa ka fach'aati, inni nyaapa ufii ch'ufa hobaase, nama isaani morku ch'ufa fit'a.

⁹ Isani maani AABBO Waaqati malattani? Inni isani fit'e balleesa. Nami tokoleeni iti deebie maro lameeso isaani immorku.

¹⁰ Aka hot'e qoraatitiifi gaga buuyo gogodde isani gubani hobaasani!

¹¹ Ee Ninawi, si keesaa nami hameenna mariate AABBO Waaqati malatu bahe.

¹² AABBO Waaqi waan worra Israelitini jed'u: Ato worri Ashuru jabaate yokhaani heddatele, worra balleesani lafaa d'abani. Gumi tiyya, ato qara isani gaargalchele, amma deebie isani ingaargalchu.

¹³ Anini irre worri Ashuru isaniini dabsate ch'abse, haada worri isaniini hid'u kuta.

¹⁴ AABBO Waaqi waan worra Ashuru akana jed'e: Worri deebie ilmaani ind'alu, tanaafi maqaani worraa imbada. Anini waan worri harkaani boch'e mid'aasu, ka mana waaqoota worraa keesa jiru, ka worri kad'atu, imballeesa. Anini worra Ashuruti awaala qotuu jira — worri jiraachu himmalle!

¹⁵ Me ilaala, nami ergaani d'ufu, ka odu dansa ta nagaya namati odeesu, gaareeni ira gad'ufuu jira! Worra Yuda, jila teesani tolfad'a, kakhu isani Waaqati kakhattani guuta. Worri ch'ubbu qabu suni deebie lafa teesani inhad'u; ya worra balleesani fit'ani!