Mudhii Yohaannisii 2 - KITAABA WAAQA

¹ Gara malaika gumi Efeso waan kana t'aafi: Tunini dubbi nama urji torba harka mirgicha qabuufi ka jiddu ifse worqi torbaani dedeemu.

² Anini waan atini tolchite imbeekha, aka atini guddo hojatte imbeekha, ammalle aka atini guddo obsitele imbeekha. Aka atini dandeete worra daba inobsinne imbeekha, ammalle aka atini worra ergattu ufiini jed'u, ammo ergattu intahiini ilaalte, aka worri kiyyibe agartele imbeekha.

³ Atini obsa qabda, ya maro maqa kiyyatiifi guddo gaargalte, ammo ya ufi jibbaachu didde.

⁴ Ammo wonti anini sii quufu dide tana: atini aka duri na injaalattu.

⁵ Aka guddo jidde qaabad'u, daba iraa deebii, waan duri hojatte hojad'u. Yo daba iraa deebiu baate, anini d'ufeti ifse tante fulla isiiti fuud'a.

⁶ Ammo fulla tana goomta: huji worra Nikolai jed'ani akuma anini jibbe aatileeni jibbita.

⁷ Nami gurra qabu, waan Lubbuuni gumiini jettu ha d'agayu! Nama dabsatu anini mid'aani mukha jireenna, ka oobru Waaqa keesati bahu, nyaachisa.

Tatabe gara gumi Smirna

⁸ Gara malaika gumi Smirna waan kana t'aafi: Tunini dubbi nama qaratiifi ka eegeeti, nama due kae.

⁹ D'ipufi hiyyuma tante imbeekha. Ammo atini guddo dureeti. Anini d'ara ta jari Yahudi intahiini ka ammo Yahudi ufiini jed'u suni jed'u imbeekha. Worri gumi Sheet'anaati.

¹⁰ Gaargala d'ufu insodaatiini! Ch'aqasi, Sheet'ani isani gari mana hid'aansa keesa buuse isani ilaalata; haga bulti kud'ani d'ipatani gaargaltani. Haga dootuuti nama d'ugefatani tahi, duuba anini eebafi jireenna sii kenna.

¹¹ Nami gurra qabu, waan Lubbuuni gumiini jettu ha d'agayu! Nami dabsatu duisa lameesotiini ingaargalu.

Tatabe gara gumi Pergamo

¹² Gara malaika gumi Pergamo waan kana t'aafi: Tunini dubbi nama aflameedi qara qabdu qabu.

¹³ Anini fulla atini teetu imbeekha, fulla barch'uma guddinna Sheet'anaati. Atini maqa kiyya jabeesite qabatte, gaafa Antipa ka guddo na d'ugeese fulla Sheet'ani tauti ijeesanile, atini d'ugefacha na d'ugefatte illakimne.

¹⁴ Ammo waan diqo toko ch'alla si quufu d'abe nama haga toko ka barsiisa Baaluma gula yau qabda, inni Balaki, aka ijoolle Israeli gufachiisu barsiise, ammalle sagale waan harkaani boch'ani baasani nyaataniifi aka sharmut'oma deemani.

¹⁵ Akuma suni nama barsiisa worra Nikolai gula yau qabda.

¹⁶ Daba iraa deebii yoosi. Yokhaani anini hurrise siti d'ufe, worra suni sheefti afaani kiyya keesa jirtuuni had'a.

¹⁷ Nami gurra qabu waan Lubbuuni gumiini jettu ha d'agayu! Nama dabsatu anini sagale manna jed'ani ta d'ossani kennaafi. Ammalle ch'abbi adi ta maqa hareesa irati t'aafani, ka nama argatu male nami d'ibiini imbeenne kennaafi.

Tatabe gara gumi Thiatira

¹⁸ Gara malaika Thiatira waan kana t'aafi: Tunini dubbi Ilma Waaqa, ka ilti aka ibida bobeetu, ka miili isaa aka sibiila qulqulleesani biliqu.

¹⁹ Anini waan atini tolchitu imbeekha, jaalalafi d'ugefachaafi hujifi obsa kanke imbeekha. Ammalle aka hujiini tante ta eege ta qara ira jirtu imbeekha.

²⁰ Ammo wonti anini si quufu dide tana; dubbi niiti Yezebel jed'ani ta raaga Waaqa ufiini jettu obsita; isiini hojattu tiyya aka worri huji sharmut'oma tolche, sagale waan harkaani boch'ani baasani nyaatu barsiifte akasiini balleesite.

²¹ Anini guyya qabeefi, aka isiini daba iraa deebitu, ammo isiini sharmut'oma suni iraa deebiu didde.

²² Tanaafi anini sire gubba isi buusa, achiti isiifi jara isi woliini sharmut'u gaargalcha, yo worri huji isi woliini tolchu tana iraa deebiu baate.

²³ Anini ijoolle isile d'ae fit'a, duuba gumiini ch'ufti aka anini heregafi garaa nama ch'ufa ilaalu baratti. Ammalle anini isanii ch'ufa, huji teesani gula, woi isani kenna.

²⁴ Ammo isaniini kaani Thiatira keesa, ka barsiisa hamtu tana gula indeemne, yokhaani waan nami gari baddi Sheet'ana jed'uuni imbaratiini, anini baa d'ibi isani ira inkayu.

²⁵ Ammo waan harkaa qabdani suni jabeesa, haga anini d'ufuti.

²⁶ Nama dabsate huji tiyya haga muumme tolchu, anini jabeenna gosa ch'ufaani fidani kennaafi, jabeenna anini Aabbo ira argad'e.

²⁷ Inni ule sibiilatiini worra fida, duuba akuma okote faara ch'absani gargari worra ch'ach'absa.

²⁸ Ammalle anini bakalcha bari worraa kenna.

²⁹ Nami gurra qabu, waan Lubbuuni gumiini jettu ha d'agayu!