Matayo 9 - KITAABA WAAQA

¹ Yesoni hobolo keesa seene galaana taake, dira lafa ufi d'aqe.

² Namicha naafa toko ka sire gubba ch'iisu isatiini d'ufani. Yesoni d'ugefacha worraa arginaani waan namicha naafa kaaniini jed'e, Garaa jabaad'u, gurba kiyya; daba kanke ya sii araaramani.

³ Jari Seera beekhu toko waan woliini jed'e, Nami kunini Waaqa abaara!

⁴ Yesoni herega worraa beennaani waan jed'e, Maafi garaa keesani keesati hameenna akana kana hereddani?

⁵ Tamiti ira laaftu, Daba kanke ya si araaramani jecha mo, kai deemi jecha?

⁶ Ammo aka Ilmi Nama lafa keesati jabeenna daba nama araaramuuni qabu hubad'a. Jennaani inni waan namicha naafa kaaniini jed'e, Kai, sire tante fud'ad'u, worrati gali.

⁷ Duuba inni kae worrati gale.

⁸ Biyyiti waan kana arginaani sodaate, Waaqa ka jabeenna akana kana namaa kenne guddifte.

Yaamicha Matayo

⁹ Yesoni achi deemnaani, nama toko ka Matayo jed'ani, ka fulla mana damoosa tau arge, Na gula kooti jed'eeni. Jennaani Matayoni kae, isa gula deeme.

¹⁰ Inni sagale nyaataa teennaani, jara damoosa guurufi nami daba hedduuni isaafi jara isaa woliini tatae.

¹¹ Duuba Farisayooni waan kana arginaani waan jara isatiini jette, Qaallichi keesani maafi nama damoosa guurufi nama daba qabu woliini sagale nyaata?

¹² Yesoni dubbi tana d'ageennaani waan jed'e, Nami fayya qabu ch'ireesa imbarbaadu, ammo nama fayyad'abe ch'allati barbaada.

¹³ Beena, waan jecha kana hubad'a, Anini naasu fed'a, sorio imfed'u. Anini nama daba male, nama d'uga yaamu ind'umne.

Waan agabu

¹⁴ Jennaani jari Yohana gara Yeso d'ufe waan jed'eeni, Nuufi Farisayooni maafi Waaqaa jenne ufi agabsina, ka jari kanke ufi inagabsine?

¹⁵ Yesoni waan worraani jed'e, Keessumaani fuud'aa haga abbaani fuud'a worra woliini jiru lalefachu dandeeti? Guyyaani abba fuud'a worra biraa fuud'ani ind'ufa, duuba hojja suni worri ufi agabsa.

¹⁶ Nami woya hareeti kooti dullatiti erbu injiru; erbaani suni woya dullati taani intarsaafti, tarsaaleeni ira guddatti.

¹⁷ Daad'i hareeti gorjo dullatiti inaqani. Yo akasi tolchani, gorjooni intarsaati, daad'iini jidde gorjooni baddi. Daad'i hareeti gorjo hareetiti naqani, duuba lachu guyya heddu teeti.

Fayyisa intala Yairotiifi niiti d'ibi

¹⁸ Ato Yesoni waan kana dubbatu, motichi toko d'ufe, durati jilbifate waan jed'e, Intalti tiyya ammumatana doote; ammo kooti, harka isi ira kayi, isiini injiraatti.

¹⁹ Jennaani Yesoni kae, jara ufi woliini isa gula deeme.

²⁰ Niitiini toko, ta d'iigi ganna kud'ani lama keesaa yae, isa duddaduubaani d'ufte, handaara woya isaa tut'e.

²¹ Isiini waan ufiini jette, Yo anini woya isaa ch'alla tuqele imfaya.

²² Yesoni ufira garagale, isi arginaani waan jed'eeni, Intala, garaa jabaad'u, d'ugefachaani tante la si fayyifte. Hojuma suni fayyite.

²³ Yesoni mana moticha kaani seennaani jara fuludo tabatufi biyya bohu jirtu arginaani

²⁴ waan jed'e, Alati baha, intalti indoone, ammo rafu jirti. Jennaani worri isa koble,

²⁵ ammo, eegi biyyiti alati baate, inni olseene harka intala olfuud'e, intalti kaate.

²⁶ Oduuni tunini lafa suni ch'ufa keesa fulla ch'ufa geete.

Fayyisa balla lama

²⁷ Yesoni achi deemnaani jari ballaani lama isa gula yae waan jed'eeni, Ilma Daudi, nuu nahi.

²⁸ Inni mana olseennaani jari ballaani kaani gara isaa d'ufe. Yesoni waan worraani jed'e, Aka anini waan kana tolchu dandau ind'ugefattani? Jari, Ee Aabbo ind'ugefanna jed'eeni.

²⁹ Jennaani Yesoni ila worra tuqe waan jed'eeni, D'ugefacha teesani gula ha isanii taatu.

³⁰ Duuba ilti worra banamte, Ammo Yesoni nama tokoleti inhimina jed'e, worrati seere.

³¹ Ammo worri yae, waan isaa lafa suni ch'ufa keesati odeese.

Fayyisa nama jinni duuda qabu

³² Ato worri yau nama jinni duuda qabu Yesotiini d'ufani.

³³ Inni jinni keesaa baase jennaani namichi duudaani kaani dubbate. Biyyiti maadefatte waan jette, Waan akana kana taka Israeli keesati ingarre.

³⁴ Ammo Farisayooni waan jette, Inni jabeenna gudda jinnitiini jinni baasa.

Naasu Yeso gara gumi ch'ufa

³⁵ Duuba Yesoni achi deeme diraafi ollowaanifi maneeni Waaqa iti kad'atani keesati Odu Dansa ta Finna odeese, d'ukubafi fayyad'aba ch'ufa fayyise.

³⁶ Gumi arginaani naheefi, maro isiini dad'abde qarqaarsa d'abde hooliye tissitu inqamne fakaatefi.

³⁷ Jennaani Yesoni waan jara isatiini jed'e, Mid'aani murani guddo, ammo nami mid'aani muru diqa.

³⁸ Tanaafi abba mid'aani suni kad'ad'a aka inni nama mid'aani muru oobruti ergu.