Matayo 19 - KITAABA WAAQA

¹ Dubbi tana buufannaani, Yesoni Galilaya keesaa bahe, lafa Yudea ta moga galaana Yordani d'aqe.

² Gumiini guddooni isa gula yaate, achiti inni worra fayyise.

³ Farisayooni gari isati d'ufte waan jetteeni, Yo nami niiti ufi lakise fullaa mo fullaaniti?

⁴ Yesoni waan jed'eeni, Isani t'aafi keesati insoomne? Qaraa fiit'e Waaqi d'iirafi uwa uume

⁵ waan jed'e, Maro waan kanatifi d'iirti abbaafi haad'a ufi lakifte niiti ufitiini taka taati, worri lamaani takaa taha.

⁶ Worri amma nama lamaaniti, ammo taka quba ch'iteeti. Waan Waaqi takaa tolche nami gargari baasu himmalle.

⁷ Farisayooni waan jetteeni, Musani maafi, Nami tatabe lakisiti niiti ufiti kenne dandae niiti ufi illakisa jed'e re?

⁸ Inni waan worraani jed'e, Maro jabeenna mata keesanitiifi Musani aka lakisani ee jed'e; ammo gaafa uumama akanaaniti.

⁹ Waan anini isaniini jed'u, Yo nami niiti ufi ta d'iira d'ibi imbaratiini lakise nad'eeni d'ibi fuud'e, ya seera Waaqa ch'abse.

¹⁰ Jari isaa waan isaani jed'e, Yo wonti d'iirsafi niitiyu akana taate, ira dansa yo nami nad'eeni imfuune.

¹¹ Yesoni waan jed'eeni, Nami ch'ufti dandae barsiisa tana gula indeemu, ammo isiini ta worra Waaqi kenneefi ch'alla.

¹² Wonti nami nad'eeni imfuuneefi hedduti jira: hagi gari maro akasuma d'alateefi; ka gari maro nami akasi worra tolcheefi; ka gari maro Finna gubbatiifi nad'eeni imfuune. Nami dandau ha barsiisa tana fud'atuuti.

Yesoni ijoolle didiqo eebisa

¹³ Nami gari ijoolle didiqo Yesoti d'ufeeni, aka inni harka ira kaye kad'atuufi. Ammo jari isaa worra d'owe.

¹⁴ Yesoni waan jed'e, Ijoolleeni ha nati d'uftuuti, ind'owiina, Finni gubba ka nama akana kana.

¹⁵ Harka ijoolle ira kaye duuba kae iti d'aabate.

Kaimi dureesi jireenna barbaada

¹⁶ Gaafa toko, namichi toko Yesoti d'ufe waan jed'e, Aabbo, anini waan dansa akami tolchu male aka jireenna hegeri argad'u?

¹⁷ Yesoni waan jed'eeni, Waan dansaa maafi na gaafatta? Nami dansaani toko ch'alla. Yo jireenna argachu feete, seera ch'ufa guuti.

¹⁸ Namichi kaani waan jed'eeni, Seera kami? Yesoni waan jed'eeni, Inijeesiini d'iirafi nad'eeni wolbarate gaarayu wolintolfatini; inhatiini; inkiyyibiini;

¹⁹ abbeetiifi haateti saalfad'u oboleesa kanke aka ufi jaalatu jaalad'u.

²⁰ Namichi kaani, Anini seera kana ch'ufa ya guute; wonti d'ibiini anini tolchu male maani? jed'eeni.

²¹ Yesoni waan jed'eeni, Yo d'uguma qit'e tahu feete, waan qabdu ch'ufa gurguri, hiyyeeyi qoodi, duuba durooma gubba argatta, kooti na gula deemi.

²² Namichi kaani waan kana d'agaye jennaani aka hama lalefate kae iti d'aabate, waan inni guddo dureesatiifi.

Gaargala dureesaati

²³ Yesoni waan jara ufitiini jed'e, Waan anini jed'u, Guddo jabaatti, aka dureeyiini Finna gubba argattu.

²⁴ Ammalle isaniti hima, Ira laaftu aka gaali qaa lime seenu, fulla dureeyiini Finna Waaqa argattu.

²⁵ Jari isaa waan kana d'ageennaani guddo mame waan jed'e, Eentu dandae baafama re?

²⁶ Yesoni worra ilaale waan jed'eeni, Nami indandau, ammo Waaqi waan tokole indad'abu.

²⁷ Petroni waan jed'e, Ilaali, nu ya waan ch'ufa lakimne si gula yaane, maani arganna?

²⁸ Yesoni waan worraani jed'e, Waan anini isaniti himu, Gaafa Ilmi Nama barch'uma guddinna ufi ira tau, isaniini kud'ani lamaani kunileeni barch'uma guddinna ira teteetani, dubbi gosa kud'ani lama ta Israeli ch'ufa qortani.

²⁹ Ammalle nami maneenifi oboleesafi oboleetifi, abbaafi haad'afi, ilmaaniifi oobru, maro tiyyaafi lakise, maro d'ibba toko deebisaniifi, jireenna hegerile argata.

³⁰ Ammo nami hedduuni ka amma qara ka eege taha, ka amma eege ka qara taha.