Matayo 18 - KITAABA WAAQA

¹ Hojja suni jari Yesoti d'ufe waan jed'eeni, Eennuti Finna gubba keesa nama ch'ufa ira jira?

² Yesoni gurba diqa toko yaame, jiddu worra teesise

³ waan jed'e, Ilaala, yo jijiramtani aka ijoolle didiqo tana taatani male, Finna gubba diqole inargattani.

⁴ Nama aka daima kana ufi diqeesuti Finna gubba keesati nama ch'ufa ira gudda.

⁵ Nami maro maqa kiyyatiifi daima akana fud'atu ch'ufti na fud'ata.

Gorsa waan nama wollaalchisa

⁶ Ammo nama ijoolle didiqo akana tana wollaalchise, ira dansa yo sila d'akha daakhu morma isati hid'ani, d'immu galaana keesa buusani.

⁷ Gaargala lafati, maro wonti nama gufachiisa hedduuni jirtuufi. Wonti akana kunini hojja ch'ufa injirti, ammo gaargala worra waan kanaani d'ufeeti.

⁸ Yo harki kanke yokhaani miili kanke si wollaalchise, ufira kuti gati! Ira dansa yo hokolte, yokhaani naafatte jireenni argatte, fulla harka lamafi miila lamaani ibida hegeri keesa si buusani.

⁹ Yo ilti tante si wollaalchifte, ufi keesaa baasi gati! Ira dansa yo ila tokooni jireenni argatte, fulla ila lamaani ibida keesa gadi si gatani.

Mammaasa hoola bade

¹⁰ Eegad'a, aka ijoolle didiqo tana tokole intufanne. Anini isaniti hima, malaikaani isii gubbati hojja ch'ufa fuula Abba kiyya dura ejaanjiti. [

¹¹ Wonti akanatiifi Ilmi Nama ka bade baasu d'ufe.]

¹² Maani seetani? Nami hooliye d'ibba toko qabu, yo toko bade, sagaltami sagalaani taani d'eedati lakise, tokocha bade kaani barbaadu ind'aqu?

¹³ Duuba yo argate, d'uguma, waan anini isaaniini jed'u, inni hooliye sagaltami sagalaani ta taka imbadiini taani ira, hoola tokocha bade kanaafi gammada.

¹⁴ Akasuma fed'i Abba keesani ka gubbati, aka ijoolle didiqo tana keesa tokoleeni imbanne.

Gorsa oboleesa wollaala tolche

¹⁵ Yo oboleesi kanke siti dabe, kobati yaami gorsi. Yo inni dubbi tante d'agaye, atini ya oboleesa keti waan guddo taate.

¹⁶ Ammo yo inni si d'agayu d'ibaate, nama toko lama yaami, aka dubbini ch'ufti d'uga nama lama sadiini taatu.

¹⁷ Yo inni dubbi worra d'agayu d'ibaate gumiti himi; ammalle yo inni gumi Waaqa ch'aqasu dide, nyaapafi aka nama damoosa guuruti heregi.

¹⁸ Ilaala, waan anini isaniini jed'u, Waan isani lafa tana keesati diddani, gubbaleti ya didani; ammalle waan isani lafati ee jettani gubbaleti ya ee jed'ani.

Waan wold'aqisa kad'acha keesa

¹⁹ Ammalle waan anini isaniini jed'u, Yo isani nami lama lafa tana irati wold'at'ani, Abbaani kiyya ka gubba waan isani kad'attani isanii kenna.

²⁰ Yo nami lamaa sadi wolwoldae maqa kiyyaani kad'atu, anini jiddu worra jira.

Mammaasa garbicha galata inqamne

²¹ Petroni d'ufe waan jed'eeni, Aabbo, yo oboleesi kiyya nati dabe, anini maro hagami araaramaafi? Maro torba?

²² Yesoni waan jed'eeni, Anini maro torba siini injed'u, ammo torba maro torbaatama.

²³ Finni gubba hayyu toko fakaata, ka henna garboole ufi hobaafachu fed'e.

²⁴ Herennaani namicha toko ka gati isaa hori muumme inqamne qabu isaatiini d'ufani.

²⁵ Inni baasu dad'amnaani, hayyuuni kaani aka isaafi waan inni qabu ch'ufa, niiti isaatiifi ijoolle isaale gurgurani mure, aka gati suni baasani.

²⁶ Garbichi kaani miila abba ufi durati jige waan jed'eeni, Aabbo kiyya na nahi, waan ch'ufa sii baasa, diqo na eegi.

²⁷ Abbaani kaani naheefi gati ch'ufa lakisefi, Beeni deemi jed'eeni.

²⁸ Nami kaani achii deemnaani, garbicha wahela isaa toko ka gati isaa diqo toko qabu arge, hud'e waan jed'eeni, Gati tiyya naa baasi.

²⁹ Waheli isaa kaani miilati jige, kad'ate waan jed'eeni, Na nahi, sii baasa, diqo na eegi jed'eeni.

³⁰ Ammo inni dide, hid'aansa keesa isa buuse, haga inni gati baasuuti.

³¹ Garbichi d'ibiini waan kana arginaani guddo dalane, d'aqe abbaati hime.

³² Abbaani kaani garbicha kaani yaame: Atini garbicha woma imbaane, anini gati tiyya ta atini qabdu ch'ufa si lakise, maro atini na kad'attefi.

³³ Garbicha wahela keti sule nahu malte, akuma anini sii nahe.

³⁴ Abbaani guddo dalane, garbicha kaani mana hid'aansa keesa buuse, haga inni gati ch'ufa baasuuti.

³⁵ Duuba Yesoni waan jed'e, Abbaani kiyya ka gubbaleeni akasuma isani tolcha, yo isani ch'ufti garaa keesani keesati oboleyaani teesani inaraaramne.