Matayo 11 - KITAABA WAAQA

¹ Eegi Yesoni barsiisiti jara ufi kud'ani lamaani hobaase, inni achii kae dira lafa suni keesati nama barsiisafi dubbi odeesu d'aqe.

² Yohanani, ato mana hid'aansa keesa jiru, waan huji Kristo d'agaye jennaani jara ufi Yesoti erge

³ waan jed'eeni, Nami ind'ufa jed'ani si mo ka d'ibi eenna?

⁴ Yesoni waan worraani jed'e, Beena, waan d'ageetanifi waan argitani Yohanati hima:

⁵ ballaani lafa arga, naafi indeema, nami qomaat'a qabu inqulqulla, duudaani ind'agaya, reefale kaasani, Odu Dansa hiyyeeyiti odeesani.

⁶ Ayaana nama diqole na ind'arefanne.

⁷ Worri kaani yaanaani, Yesoni waan Yohana biyyati dubbate waan jed'e, Lafa gamooji keesa maani daawachu d'at'ani? Ilaadu qilleensi tabsiisu wo taate?

⁸ Nama woya lalaaftu uyifatu daawachu d'at'ani? Worri woya lalaaftu uyifatu mana hayyoota keesa tataa.

⁹ Maafi alati yaatani re? Raaga daawachu d'at'ani? Ee, ammo waan raaga ira jira daawachu d'at'ani.

¹⁰ Nami kunini ka waan isaa akana t'aafani, Kuno, anini ergattu tiyya si dura erga, aka kara si durati mid'aasu.

¹¹ D'uguma, waan anini isaniini jed'u, Nami garaa nad'eeni keesaa bue tokoleeni ka Yohana nama batisu ira jiru injiru. Ammo nami Finna gubba ch'ufa keesa ira maand'a isa ira jira.

¹² Haga, bara Yohana nama batisu haga arra Finna gubba ya had'ani, worri irre qabu irreeni had'a.

¹³ Raaga ch'ufaafi Seeri Musa haga Yohana ch'alla woi hime.

¹⁴ Yo sila isani d'ugefattani, Yohanani Eliya, ka d'ufiisa isaa himani.

¹⁵ Yo gurra qabaattani d'agaya.

¹⁶ Duuba d'aloota kana maanti akheekha? Aka ijoolle gabaya keesa teteete jaalaani ufi yaamtu jira, ta waan woliini jettu.

¹⁷ Nu dibe isani d'oomne, ammo isani sirbu diddani; ammalle nu iyinnaani isani bohu diddani.

¹⁸ Yohanani nyaate d'ugu ind'umne, ammo isani, inni jinni qaba jettani.

¹⁹ Ilmi Nama nyaate d'ugu d'ufe, ammo waan jed'ani, Kunini sabdifi nama farso d'ugu, jaala nama, damoosa guurufi nama daba. Tatule, qalbi Waaqa d'uga, waan isiini tolchituuni beekhani.

Gaargala dira ind'ugefanne

²⁰ Jennaani Yesoni worra dira qaraa inni keesati waan mama tolche, waan worri daba iraa deebiu dideefi, wollaala iti mure waan jed'e,

²¹ Gaargala keti, Korazini! Gaargala keti, Bethsaida! Ato sila waan mama ta isani keesati tolchani Tirofi Sidoni keesati duri tolchani, worri arra kale ch'arqi naqate, daara dibate, daba ufi inhimatiini!

²² Ammo anini isaniti hima, guyya qorisa Waaqi isani ira worra Tirotiifi ka Sidoniti naha.

²³ Kapernaumu, waan gubba oldeemtu ufi seeta? Fulla ekhera si buusani. Yo sila waan mama ka si keesati tolchani Sodoma keesati tolchani, diri suni haga arra injira.

²⁴ Ammo waan anini siini jed'u, Guyya muumme diri Sodoma sira gooma!

Nati koota boqod'a

²⁵ Hojja suni Yesoni waan jed'e, Anini galata sii deebisa, Ee Aabbo, Abba lafafi gubba, waan atini waan kana worra qalbi qabuufi worra wo barate d'ossite ijoolle didiqoti mullifteefi.

²⁶ Ee Aabbo, tunini fed'i teeti.

²⁷ Waan ch'ufa Aabbooni ya harka kiyyati kenne. Abba male, nami Ilma beekhu injiru, ammalle nami Abba beekhu injiru, Ilmaafi nama inni iti mullisu fed'u male.

²⁸ Nati koota, nami dad'abefi ka baa ulfo baatu anini isani boqachiisa.

²⁹ Qaampara kiyya keyad'a, naraa barad'a, anini nama laana, ka mata inguddifanne; duuba boqota argattani.

³⁰ Qaampari kiyya sabla, baani tiyya inulfaattu.