Mariko 9 - KITAABA WAAQA

¹ Ammalle inni waan worraani jed'e, D'uguma, waan anini isaniini jed'u, Nami gari ka arma jiru induu, haga Finna Waaqa ka humnaani d'ufu arguuti.

² Eegi guyya jaa, Yesoni Petrofi Yohanafi Yakobo mogati fuud'e, gaara d'eera gubbaa koba korsiise.

³ Fuula worra durati bifti isaa jijiramte, woyaani isaa bibilit'e, adi ch'aama taate, aka nami dandae miich'e inadeesine.

⁴ Eliyafi Musani worrati mullatani, Yeso woliini hasaani.

⁵ Jennaani Petroni waan Yesoni jed'e, Aabbo, aki nu arma jiru dansa, hoosa sadi mid'aasina, toko keeti, toko ka Musati, kaleeni ka Eliyati.

⁶ Petrofi worri wahela isa guddo sodaate, jennaani Petroni waan jed'u wollaale akasi jed'e.

⁷ Dumansi d'ufe, worrati gaadiseese, qonqooni dumansa suni keesaa baate waan jette, Kunini Ilma kiyya tokocha, isa ch'aqasa.

⁸ Hojuma suni worri ufi bira mimillannaani nama d'ibi d'abani, Yeso male.

⁹ Ato worri gaara iraa gadibuu, inni worra d'owe waan jed'e, Nama tokoleti waan argitani kana inhimina, haga Ilmi Nama duisa keesaa kauti.

¹⁰ Worri dubbi suni qaabate, duisa keesa kaisi maani? jed'e wolgaafate.

¹¹ Jennaani worri isa gaafate waan jed'e, Worri Seera beekhu maafi qara Eliyaani d'ufu male jed'a?

¹² Yesoni waan jed'eeni, Eliyaani d'uguma qara d'ufa aka waan ch'ufa mid'aasu. Ammo t'aafi keesati maafi Ilma Nama tuffatani guddo gaargalchu malani jed'ani?

¹³ Ammo waan anini isaniini jed'u, Eliyaani qaraa d'ufe, waan fed'ani isa tolchani, akuma t'aafiini jettu.

Fayyisa gurba jinni qabu

¹⁴ Fulla jara ufi kaani geennaani, Yesofi jari sadeenu gumi guddo ta worra marsitu argani, ammalle jara Seera beekhu wolmormani.

¹⁵ Gumiini ch'ufti isa arginaani guddo mamte, isati orite nagaya fuute.

¹⁶ Inni, Maani wolmormitani? jed'e gaafate.

¹⁷ Nami toko gumi keesaa waan jed'eeni, Aabbo, anini ilma kiyya, ka jinni duuda qabu, sitiini d'ufe.

¹⁸ Yo isa qabattu ch'ufa lafaani d'oofte, homachi afaani yae, inni ilkaani qare gogoga. Anini jara kanke aka keesaa baasani kad'ad'e, ammo worri indad'abe.

¹⁹ Yesoni waan worraani jed'e, Isani diqole d'ugefacha inqabdani; guyya hagami isani woliini taa? Guyya hagami isani obsa? Natiini koota.

²⁰ Gurba isatiini d'ufani. Jinniini Yeso arginaani hojuma suni gurba hahargufte, inni lafa d'ae, gangalate, hoomachi afaani yae.

²¹ Yesoni abba isatiini waan jed'e, Ganna hagami akana tahe? Inni waan jed'eeni, Haguma ijoolluma isaati.

²² Maro heddu jinniini ibidafi bisaani keesa isa buufte, aka isa ijeeftu. Yo dandeete, nuu nahi, qarqaari.

²³ Yesoni waan isani jed'e, Yo atini dandeete jetta? Nama d'ugefatu wonti ch'ufti intaati.

²⁴ Hojuma suni abbaani gurbaa iye waan jed'e, D'ugefacha inqaba, yo ingeennele, na qarqaari.

²⁵ Yesoni aka gumiini wolti oritu arginaani, jinniini lole waan jed'eeni, Jinni duuda, isa keesaa bahi, iti indeebiini jed'eeni.

²⁶ Jinniini iyite, hargufte, keesaa baate. Gurbaani kaani aka reefaa tahe, tanaafi nami hedduuni, Gurbaani yayu due jed'e.

²⁷ Ammo Yesoni harka isaa qabe, olfuud'e jennaani inni kae.

²⁸ Eegi Yesoni gale, jari isaa kobati isa gaafate, Nu maafi jinni isa keesaa baasu dad'amne? jed'ani.

²⁹ Inni waan jed'eeni, Ta akana tana kad'acha male dandaani imbaasani.

Yesoni ammalle waan duisa ufi dubbata

³⁰ Achi kanaani Galilaya keesaa yaani. Inni aka nami fulla inni jiru beekhu infeene.

³¹ Wonti akanatiifi inni jara ufi barsiisu jira. Inni waan worraani jed'e, Ilma Nama harka namati kennani ijeesani. Eegi due inni guyya sadeeso inkaa.

³² Ammo worri jecha kana inhubanne, isa gaafachule sodaatani.

Akheekha ufi diqeesa

³³ Kapernaumu geennaani, ato mana keesa jiru, inni worra gaafate, Kara keesati maani wolhasooftani? jed'e.

³⁴ Ammo worri inch'allise, waan kara keesati, Nu keesa, eentu ira gudda? jed'ani wolmormaniifi.

³⁵ Inni gadi tae, jara kud'ani lamaanu yaame waan jed'eeni, Nami nama qara tahu fed'u nama eegetifi hojattu nama ch'ufa tahu male.

³⁶ Daima toko hampaare jiddu worraa teesise waan worraani jed'e,

³⁷ Nami daima akana toko maro maqa kiyyatiifi jabeesu naa jabeesa; nami naa jabeesu naa injabeesu, ammo ka na erge jabeesa.

Nami nuuni imorkine goli teenna

³⁸ Yohanani waan jed'eeni, Aabbo, nu nama toko ka maqa kanketiini jinni baasu agarre. Inni nama keennaaniti, tanaafi isa d'owarre.

³⁹ Yesoni waan jed'eeni, Ind'owiina, wonti akanatiifi nami huji mama maqa kiyyaani tolchu, ka eegi suni hameenna kiyya barbaadu injiru.

⁴⁰ Nami nuuni imorkine goli teenna.

⁴¹ D'uguma waan anini isaniini jed'u, Nama, waan isani nama Kristo taataniifi, bisaani isani obaasu, galata ufi inuma argata.

Gorsa waan nama wollaalchisani

⁴² Nami ijoolle didiqo tana ta na d'ugefattu guufachiisu, sila dansa yo d'akha daakhu morma isati hid'ani, galaana keesa buusani.

⁴³ Yo harki kanke si wollaalchise ufira kuti, gati! Yo atini naafatte jireenna seente ira sii jirti, fulla harka lamaaniini naarti keesa buutu, fulla ibidi ind'aamne. [

⁴⁴ Achiti fulla raamooni indoone yokhaani ibidi ind'aamne.]

⁴⁵ Ammalle yo miili kanke si wollaalchise ufira kuti, gati! Yo atini naafatte jireenna seente ira sii jirti, fulla miila lamaaniini naarti keesa si buusani. [

⁴⁶ Achiti fulla raamooni indoone yokhaani ibidi ind'aamne.]

⁴⁷ Yo ilti tante si wollaalchifte, ufi keesaa baasi. Yo atini ila tokooni Finna Waaqa argatte ira si jirti, fulla ila lamaaniini naarti keesa si buusani.

⁴⁸ Achiti fulla raamooni indoone yokhaani ibidi ind'aamne.

⁴⁹ Akuma sorio sooddani qulqulleesani, nama ch'ufa ibidaani qulqulleesani.

⁵⁰ Sooddi dansa, ammo sooddileeni, yo kuraa d'abe, maaliini kurefatani? Soodda ufi keesati horad'a, nagayaani woliini taa.