Mariko 7 - KITAABA WAAQA

¹ Farisayoofi jari Seera beekhu ka gari, ka Yerusalemu d'ufe, gara Yeso d'aqani.

² Worri aka jari isaa ka gari, ato harka ind'iqatiini yokhaani t'uri qabanu sagale nyaatani arge.

³ Wonti akanatiifi Farisayoofi Yahudiini ch'ufti, haga harka d'iqatuuti sagale inyaattu, aka aada jaarole ira baratani gula;

⁴ ammalle yo gabaya galanile ufi qulqulleesani male sagale inyaatani; ammalle aada d'ibi hedduti jira, ta worri qabu, ta aka d'iqaansa mudunutiifi okote, eele, sire.

⁵ Tanaafi Farisayoofi jari Seera beekhu isa gaafatani waan jed'ani, Jari kanke maafi aada jaarole gula iyaane, harka t'urichaani sagale nyaatani?

⁶ Inni waan jed'eeni, Isani kiyyibdoole, Isayani ka waan keesani fage, d'uga dubbate waan jed'e, Gumiini tuni afaani ufitiini na guddifti, ammo garaani worraa nara fago jira.

⁷ D'araani na guddisani; wonti akanatiifi seera nama aka dubbi Waaqa barsiisani.

⁸ Yesoni waan jed'e, Isani Seera Waaqa lakiftani, aada nama gula yaatani.

⁹ Ammalle waan worraani jed'e, Isani Seera Waaqa akuma dansa lakiftani, aada teesani jabeesitani!

¹⁰ Musani waan jed'e, Abbeetiifi haateti saalfad'u, nama abbaafi haad'aani dubbi hamtu jed'u ha ijeesani jed'e.

¹¹ Ammo isani waan jettani, Yo nami abbaafi haad'a isatiini, Waan isani sila nara argattani Korbani jed'e (akasi jechaani Waaqaa kennani jecha),

¹² duuba isani iti deebitani, aka inni abbaafi haad'a ufi qarqaaru ee injettani.

¹³ Isani akasi dubbi Waaqa maro aada teesanitiifi lakiftani, ammalle waan akana kana heddu tolchitani.

Waan nama t'ureesa

¹⁴ Jennaani Yesoni gumi ufiti yaame waan jed'eeni, Isani ch'ufti na ch'aqasa, dubbi tiyya hubad'a.

¹⁵ Wonti ala nama seena ka nama t'ureesa injirtu, ammo waan nama keesa bahati nama t'ureesa. [

¹⁶ Yo nami gurra qabaate ha d'agayu.]

¹⁷ Inni biyya lakise mana seene jennaani jari isaa waan mammaasa suni isa gaafate.

¹⁸ Inni waan jed'eeni, Isanileeni imid'aafanne? Isani inargitani, aka wonti ala nama seena dandeete nama int'ureesine,

¹⁹ maro qalbi isaa inseenne, ammo gaara isaa seente keesa baatuufi. (Jecha kanaani Yesoni aka sagaleeni ch'ufti qulqullo garsiise.)

²⁰ Inni waan jed'e, Waan nama keesaa bahati nama t'ureesa.

²¹ Wonti akanatiifi heregi hamaani nama keesaa baha, yokhaani garaa nama keesaa baha: ch'abanoomafa, hannafa, ijeechafa, d'iirafi nad'eeni wolbarachafa,

²² d'araafa, jallumafa, sobafa, ch'eera d'abafa, d'iibifa, arabafa, ufi saaditifi daalluma —

²³ wonti kuni ch'ufti nama keesaa baati, ammalle nama t'ureesiti.

D'ugefacha niiti toko

²⁴ Inni achii deeme, lafa Tirofi Sidoni d'aqe. Mana seennaani, aka nami tokoleeni isa beekhu imfeene, ammo ind'okhanne.

²⁵ Niitiini toko ta intalti isi diqooni jinni qabdu waan isaa d'ageete jennaani d'ufte miila isaati jidde.

²⁶ Niitiini tuni gosa Griki, d'alooti isii Sirofoinike. Isiini Yeso kad'atte aka jinni intala isi keesaa baasani.

²⁷ Yesoni waan jed'eeni, Eegi, qara ha ijoolle gololchaniti, aki sagale ijoolle duraa fuud'ani sareti darbatani fullaaniti.

²⁸ Ammo niitiini waan jette, D'uguma, Aabbo, ammo sareleeni mesa jala hamba ijoolle inyaatti.

²⁹ Inni waan isiini jed'e, Maro jecha kanatifi beeni gali, jinniini yayu intala tante keesaa baate.

³⁰ Isiini kaate galte, intala sire ira ch'iiftu ta, jinniini keesaa baate agarte.

Fayyisa duuda bopisu

³¹ Jennaani Yesoni lafa Tiroti gale, lafa Sidoni keesa dabre, gara galaana Galilaya d'aqe, kara lafa Dira Kud'ani jed'aniini bahe.

³² Biyyiti nama duuda bopisu isatiini d'ufte, isa kad'atte, aka inni harka isaa ira kayu.

³³ Yesoni isa kobati gumi biraa fuud'e, quba ufi gurra isaa keesa kaye, hanch'ufa tufe, araba isaa tuqe,

³⁴ gubba olmillate, hafuura baafate waan jed'e, Efatha, akasi jechaani, Banami jecha.

³⁵ Jennaani gurri isaa baname, hid'aansi araba isaa furame, inni aka dansa dubbate.

³⁶ Yesoni worra jabeese seere, Nama tokoleti inhimina worraani jed'e; ammo worri hagasi ira odeese.

³⁷ Nami waan kana d'agaye ch'ufti guddo mame waan jed'e, Inni waan ch'ufa yayu aka dansa tolche! Nama gurri duudele ind'ageesiisa, ka afaani duudanile indubbachiisa jed'ani.