Mariko 5 - KITAABA WAAQA

¹ Yesofi jari isaa moga galaana Gerasene geennaani,

² akuma inni hobolo keesaa bueni, nami jinni hamtu qabu toko,

³ ka awaala keesati galu, ka nami tokoleeni dandae sibiilaleeni inhiinne isaani bahe.

⁴ Maro heddu harkafi miila isaa sibiilaani hid'ani, ammo sibiila ch'ufa gargari maaqe, ammalle sibiila miilaani hid'ani kute. Nami tokoleeni isa eegu dad'abe.

⁵ Halkani guyya inni awaalafi gaara gubba dedeeme, iye, d'akhaani ufi d'aane.

⁶ Yeso fagoti arginaani, utaale, durati jige,

⁷ qonqo olfud'ate, lalabe waan jed'eeni, Atini maani nara qabda, Yeso, Ilma Waaqa ka gubba jiru? Anini si kad'ad'a, maqa Waaqatiini, na ingaargalchiini.

⁸ (Wonti inni akasi jed'eefi, Yesoni qara jinni sunini, Jinni, namicha kana keesaa bahi jed'e.)

⁹ Duuba Yesoni waan jed'eeni, Maqaani kanke eennu? Inni waan jed'e, Maqaani kiyya Gumi, nu heddu.

¹⁰ Inni guddo Yeso kad'ate aka lafa suni keesaa inni jinni suni imbaamne.

¹¹ Booyyeti laaga gaara d'eedu jira.

¹² Jinniini Yeso kad'atte waan jetteeni, Booyye suniti nu ergi, aka nu d'anne ke duunnu.

¹³ Tanaafi Yesoni gadi lakise; jinniini namicha keesaa yaate, booyye ke duudde, duuba booyyeeni ta haga kunki lama orite, galaana duudde, galaani liqimse.

¹⁴ Tissituuni baqatte, odu tana diraafi reerati odeesite. Jennaani biyyiti dawachu d'ufte.

¹⁵ Yesoti d'ufani, namicha jinni gumi qabu kaani, ka achi tau argani, ka woya uyifate, qalbi ufi qabu.

¹⁶ Worri arge kaani waan namicha jinni Gumi jed'ani qabutiifi waan booyyeeni taate worrati odeese.

¹⁷ Duuba worri Yeso kad'ate, aka inni lafa worraa keesaa deemu.

¹⁸ Ato inni hobolo keesa seenu jiru, namichi qara jinni qabu kaani Yeso kad'ate, aka isa woliini deemu.

¹⁹ Ammo Yesoni dide, waan jed'eeni, Beeni, worra ke gali, waan Aabbooni sii tolcheefi aka inni sii nahe worrati himi.

²⁰ Inni kae gale, lafa Dira Kud'ani ch'ufa keesati waan Yesoni isaa tolche hasae; nami isa d'agaye ch'ufti mame.

Fayyisa intala Yairotiifi niiti d'ibi

²¹ Yesoni galaana gama kaaniti taakinaani, gumiini guddooni ammalle isati baate, ato inni galaana bira jiru.

²² Namichi toko, ka Yairo jed'ani, guddaani mana Waaqa iti kad'atani, isati d'ufe. Yeso arginaani, inni miila isati jige,

²³ guddo kad'ate waan jed'eeni, Intalti tiyya diquma induiini, kooti, harka kanke isi ira kayi, aka isiini fayyitu.

²⁴ Jennaani Yesoni kae isa woliini deeme, gumiini guddooni isa gula d'ufte isa gaargalchite.

²⁵ Niiti tokoti jira, ta d'iigi ganna kud'ani lama keesaa yae;

²⁶ isiini guddo harka ch'ireeyiti gaargalte, hori hobaafte, ammo fayyu dad'abde haga qarale ira d'ibamte.

²⁷ Odu Yeso d'ageennaani, gumi keesaa isa duuba d'ufte, woya isaa qabatte.

²⁸ Isiini waan ufiini jette, Yo anini woya isaa qabad'ele, anini imfaya jette.

²⁹ Hojuma suni d'iigi yaasuma lakise, aka fayyite nafa keesati ufi beete.

³⁰ Maro tokotu Yesoni aka humniti isa keesaa baate arginaani, gumi keesa garagale, Eentu woya tiyya qabate? jed'e gaafate.

³¹ Jari isaa waan jed'eeni, Gumi si d'iibdu, ato argitu, Eentu na qabate jetta?

³² Ammo inni worra millate aka nama isa qabate argu.

³³ Niitiini taani waan taate beete, sodaatte, holatte, d'ufte, isa durati jidde, diideesite waan ch'ufa iti himte.

³⁴ Inni waan isiini jed'e, Intala, d'ugefachaani tante la si fayyifte, nagayaani deemi, d'ukuba kanke fayyi jed'eeni.

³⁵ Ato Yesoni dubbachu jiru, nami gari ka mana nama gudda suniti d'ufe waan jed'eeni, Intalti tante la doote; maafi moticha ammalle gaargalchita?

³⁶ Ammo Yesoni dubbi worraa ch'aqasu dide, waan gudda mana Waaqatiini jed'e, Insodaatini, ammo d'ugefachuma d'ugefad'u.

³⁷ Yesoni nama ch'ufa ufi jala rare, Petrofi Yakobofi Yohana oboleesa Yakobo male.

³⁸ Worra nama gudda mana Waaqa iti kad'atani geennaani, Yesoni biyya lalalaani ch'aarte boote iyitu arge.

³⁹ Mana seennaani inni waan worraani jed'e, Isani maafi bootani? Intalti indoone, ammo ufumaa rafti.

⁴⁰ Worri isa koble, ammo inni worra ch'ufa alati arie, jennaani abba intalatiifi haad'a isitiifi jara isa woliini jiru woliini fulla isiini ch'iiftu seene.

⁴¹ Harka isii qabe, waan jed'eeni, Talitha, kumi, akasi jechaani, Intala, anini kai siini jed'a jecha.

⁴² Hojuma suni intalti kaate deemte. Ganni isii kud'ani lama. Worri duuba aka taka inargiini maadefate.

⁴³ Ammo Yesoni nami tokoleeni waan kana ind'againi jed'e worrati seere.