Mariko 4 - KITAABA WAAQA

¹ Ammalle d'aatu galaana Galilaya Yesoni nama barsiise. Maro gumiini guddooni isati d'ufteefi, inni hobolo toko ta galaana gubba teetu keesa seene tae. Gumiini ch'ufti afaani galaana teteete.

² Inni waan heddu mammaasaani biyya barsiise, barsiisa ufi keesati waan jed'e,

³ Dubbi tana ch'aqasa! Nami toko mid'aani fach'aafachu d'aqe.

⁴ Ato inni fach'aasu, mid'aani gari dandi keesati jigani, simpirreeni d'ufte nyaatte hobaafte.

⁵ Mid'aani gari lafa d'akha gubbaa jigani, fulla biyyeeni guddo injirre; duuba hure bahani, ammo maro biyyeeni guddo gadi injirrefi,

⁶ aduuni baanaani gubatani, waan hidda inqamneefi gogani.

⁷ Mid'aani gari qoraati keesati jigani. Duuba qoraatiini baate, mid'aani qanch'arsite, mid'aani baasu d'owiti.

⁸ Mid'aani gari fulla biyye dansa jigani, bahani, mid'aani dansa baasani, ka gari sodoma, ka gari jaatama, ka gari d'ibba d'alani.

⁹ Yesoni waan jed'e, Nami gurra qabu ha d'agayuuti.

Waan mammaasaani dubbataniifi

¹⁰ Ato inni koba jiru, jara isa gula yaufi jari kud'ani lamaani kaani waan mammaasa kana isa gaafate.

¹¹ Inni waan jed'e, Waan qara d'ossani ta Finna Waaqa ya isani kennani; ammo ka gari ka ala jiru mammaasa ch'alla d'agaya,

¹² aka, Ato jabeesani ilaalanile woma inagarre, ato jabeesani ch'aqasanile woma inhubanne; wonti akanatiifi, yo akasi tolchani, sila Waaqaati deebiani, Waaqi nama araarama.

Mammaasa abba oobru diigani

¹³ Jennaani Yesoni waan jed'eeni, Mammaasa kana mid'aafattu? Mammaasa tokole akami mid'aafattani re?

¹⁴ Nami fach'aasu dubbi Waaqa fach'aasa.

¹⁵ Mid'aani gari dandi keesati jigani. Kunini nama d'agaye, akuma d'agayeeni Sheet'ani d'ufe, dubbi ta keesati fach'aasani iraa fud'atu.

¹⁶ Ka gari lafa d'akha gubbaa jigani. Kunini nama dubbi d'ageennaani gammadaani fud'atu.

¹⁷ Ammo waan hidda inqamneefi, bulti diqo ch'alla taani; duuba yo d'ipufi gaargali maro dubbi Waaqatiifi d'ufu, hojja suni yoosu jigani.

¹⁸ Ka gari qoraati keesati jigani. Kunini nama dubbi d'agaye,

¹⁹ ammo d'ipu lafa tanaatiifi gammada horitiifi d'araani gosa ch'ufaa seente, dubbi qanch'arsitu, aka mid'aani imbaamne.

²⁰ Ka gari biyye dansati jigani. Kunini nama dubbi d'agaye fud'ate, mid'aani ka gari sodoma, ka gari jaatama, ka gari d'ibba baasu.

Barsiisa waan ifse

²¹ Yesoni waan worraani jed'e, Isiyii, d'uguma ifse d'ufaniini qori yokhaani sire jala inkayani? Gubbati fannisaniiniti?

²² Wonti d'ossani ta imullimne injirtu, yokhaani wonti daboolaani ta imbuqimne injirtu.

²³ Nami gurra qabu ha d'agayu.

²⁴ Ammalle inni waan worraani jed'e, Waan d'ageetani mid'aafad'a! Waan isani namaa kennitani isanile kennani, iti isani daranile.

²⁵ Nama wo qabu iti daraniifi, ammo ka woma inqamne waan inni qabule iraa fuud'ani.

Mammaasa waan mid'aani fach'aasani

²⁶ Jennaani inni waan jed'e, Finni Waaqa aka nama mid'aani oobru ufi keesa harch'aasu jira.

²⁷ Halkani rafe, guyya kaa, mid'aleeni bahani guddatani, ato inni imbeekatiini.

²⁸ Lafti ufiini mid'aani baafti, qara lata, duuba gurra, eege dargaye bilchaattu.

²⁹ Yo mid'aani bilchaatani, inni maro tokotu mura, waan mid'aani bilchaataniifi.

Mammaasa guma dambi

³⁰ Ammalle inni waan jed'e, Finni Waaqa nu maani wolfakeesina? Mammaasa kamiini himna?

³¹ Inni guma dambi fakaata, ka hojja oobrani mukha ch'ufa ira diqa.

³² Ammo eegi fach'aasani guddate, mukha ch'ufa ira d'eerate, dame baasa, aka simpirreeni keesati mana ijaaratte teetu.

³³ Mammaasa akana hedduuni inni dubbi biyyati hasae, haga worri dandae mid'aafatu ch'ufa.

³⁴ Inni mammaasa male worrati inhasoomne; ammo kobati jara ufi waan ch'ufa barsiise.

Yesoni bubbe ch'allisiisa

³⁵ Guyyuma suni, lafti galgaloomnaani, Yesoni waan worraani jed'e, Koota, gama kaaniti taakina.

³⁶ Duuba worri kae gumi bira yae, ergattuuni hobolo qara Yesoni keesa jiru keesa duudde isa fuute kaate iti d'aabate.

³⁷ Jennaani bubbeeni guddooni bubbifte, d'awaani galaana hobolo seente, diquma bisaani inguutiini.

³⁸ Ammo Yesoni hobolo duuba, saabo gubba rafuu jira. Beenni isa kaase waan jed'eeni, Aabbo, atini woma iyaaltu yo nu hobaanu?

³⁹ Yesoni kae, bubbe d'owe waan galaanaani jed'e, Ch'allisi! Bubbeeni ch'allimnaani lafti ch'aqali jette.

⁴⁰ Jennaani inni waan worraani jed'e, Maafi akana d'eetani? D'ugefacha inqabdani ammalle?

⁴¹ Worri guddo sodaate, waan woliini jed'e, Eennu kunini, ka bubbeefi galaani sarmuufi? jed'ani wolgaafatani.