Mariko 15 - KITAABA WAAQA

¹ Lafti bariinaani, qaalole gugurdofi jaarolefi jara Seera beekhufi jaaroleeni kora ch'ufti koratte, Yeso sibiilaani hid'ani, geesani harka Pilatoti kennani.

² Pilatoni isa gaafate waan jed'e, Atini hayyu Yahuditi? Inni waan jed'eeni, Atu ya jette.

³ Qaaloleeni gugurdooni waan hedduuni isa himatte.

⁴ Pilatoni ammalle isa gaafate waan jed'e, Atini woma indeebiftu? Me, waan heddu ka siini himatani kana ilaali!

⁵ Yesoni ammalle woma indeebimne, tanaafi Pilatoni guddo mame.

Yeso duisati murani

⁶ Jila keesa aadaani isaa nama toko ka hid'aansa keesa jiru hiiti.

⁷ Bara suni namicha toko ka Baraba jed'ani, jara lafa garagalchu fed'e nama ijeese woliini hid'ani.

⁸ Gumiini Pilatoti d'ufte, aka inni aada ufi guutu kad'atte.

⁹ Inni waan worraani jed'e, Aka anini hayyu Yahudi isanii hiikhu feetani? jed'eeni.

¹⁰ Inni aka qaaloleeni gugurdooni d'iibifi Yeso harka isati kennite imbeekha.

¹¹ Ammo qaaloleeni gugurdooni gumi gorsite aka inni fulla Yeso Baraba hiikhu.

¹² Pilatoni ammalle waan worraani jed'e, Nama hayyu Yahudi jettaniini, kana maani tolcha re?

¹³ Worri ammalle gohe waan jed'e, Isa fannisi jed'ani.

¹⁴ Pilatoni waan worraani jed'e, Maafi akana jettani? Inni hameenna maani tolche? Ammo worri guddise gohe waan jed'e, Isa fannisi.

¹⁵ Tanaafi Pilatoni, maro inni gumi gammachiisu fed'eefi, Baraba hiikhe, Yeso lichooni d'aane, Fud'ad'a, fannisa jed'eeni.

Askartiini Yeso goyeesiti

¹⁶ Askartiini mana hayyu, ka Praitoria jed'ani, keesa isa seensifte, duuba askarti ch'ufa wolti yaamani.

¹⁷ Woya diimtu iti uyisani, qoraati aka sure tolchani, mata isaa ira kayani.

¹⁸ Duuba iti d'iaannaani, Hayyu Yahudi, lubbuuni tante ha d'eeratuuti jed'aniini.

¹⁹ Jennaani mata isaa harch'umeeni d'aanani, hanch'ufa iti tufani, durati jilbifatani, aka waan isa guddisani.

²⁰ Goyeesinaani, woya diimtu iraa baasani, woya isaa uyisaniifi. Ammalle isa fannisitifi alati geesani.

Yeso maskaliti fannisani

²¹ Duuba nama toko ka lafa oobruti bahe dabru jiru qabani, mukha maskali Yeso baachisani. Inni Simoni Kirene jed'ani, abba Iskandafi Rufo.

²² Fulla toko ta Golgotha jed'ani d'ufaniini. (Golgotha jechaani Buqe Mata jecha.)

²³ Daad'iifi qumbi wolti naqani iti kennu fed'ani, ammo inni d'ugu dide.

²⁴ Jennaani maskali irati isa fannisani, woya isaa qoodatani, hit'a buufatani, waan namu argatu ilaalani.

²⁵ Hojja isa fannisani suni saa sadi.

²⁶ Hayyu Yahudi jed'ani, waan isaani himatani t'aafani.

²⁷ Isa bira shifta lama fannisani, toko gama mirga, kaani gama bita. [

²⁸ Kara kanaani t'aafiini guutamte ta, Nama hamama isa woliini heregani jettu.]

²⁹ Nami d'aatu isaa yau isa arabse, mata iti irbe waan jed'ani, Lee! Atini ka sila Mana Waaqa ch'ach'absite, guyya sadi keesati jaartu,

³⁰ ufi baasi, maskali iraa bui!

³¹ Akasuma qaalole gugurdofi jara Seera beekhuleeni isa goyeesani waan woliini jed'ani, Inni ka nama d'ibi baase, dandae ufi imbaasu.

³² Kristoni, hayyuuni Israeli, ha amma maskali ira gadi buu, aka nu argine d'ugefannu. Jari isa woliini fannisanileeni isa arabse.

Duisa Yeso

³³ Saa jaa geennaani, lafti ch'ufti dukanoofte haga saa sagali.

³⁴ Ammalle saa sagali geennaani, Yesoni qonqo guddooni iye waan jed'e, Eli, Eli, lama sabakthani? Akasi jechaani, Waaqa kiyya, Waaqa kiyya, maafi na lakifta?

³⁵ Jari gari ka bira ejaanju akasi d'ageennaani waan jed'e, Me ilaala, inni Eliya yaamu jira.

³⁶ Namichi toko utaale, bututu laaftu toko daad'i keesa kaye, hokoti fannise. Jennaani aka inni d'ugu iti kenne waan jed'e, Eega! Aka Eliyaani d'ufe maskali ira isa buusu laala.

³⁷ Yesoni qonqo guddooni lalabe, hafuura baafate ch'iche.

³⁸ Golli Mana Waaqa fulla lamati gubbaa gadi tarsae.

³⁹ Guddaani askarti ka isa dura eju, aka inni akasi hafuura baafatu arginaani waan jed'e, D'uguma nami kunini Ilma Waaqaati.

⁴⁰ Nad'eeni garileeni waan kana fagoo ilaalte. Worra keesa, Mariamu Magdalenefi Mariamu haad'a Yakobo maand'ichafi Yose, ammalle Salometi jira.

⁴¹ Isiini gaafa Yesoni Galilaya jiru isa gula yaate hojateefi. Ammalle nad'eeni heddu d'ibiti, ta isa woliini Yerusalemu olqabatte achi jira.

Awaala Yeso

⁴² Lafti galgaloomnaani Yusufuni, ka dira Arimathaya d'ufe.

⁴³ Inni nama gurra qabu, kora Yahudi keesa, ka d'ufiisa Finna Waaqa eegu. Guyyaani suni guyya Kurfefacha (akasi jechaani guyya Sabato dura jecha); tanaafi Yusufuni garaa jabaate, gara Pilato d'aqe, reefa Yeso kad'ate.

⁴⁴ Pilatoni, aka Yesoni yoosu due mame, gudda askarti yaame, aka Yesoni yoosu due gaafate.

⁴⁵ Gudda askarti ira d'ageennaani, inni reefa Yusufuti kenne.

⁴⁶ Yusufuni woya boofta bite, isa gadi buuse, woya taaniini mamare, goda d'akha keesaa boch'ani keesati awaale, d'akha toko afaanti gangalche.

⁴⁷ Mariamu Magdalenefi Mariamu haad'a Yose, fulla Yeso iti awaalani argani.