Mariko 14 - KITAABA WAAQA

¹ Guyya lamati hafe ato Pasakafi jilti Qit'a bukho inqamne ingahiini. Qaalole gugurdofi jari Seera beekhu aka d'ossaani Yeso ijeesani mariatani.

² Worri waan woliini jed'e, Jila keesati isa inqamnu, aka biyyiti garagalte lafa imballeesine.

D'ad'a mata Yesoti naqani

³ Ato Yesoni Bethania jiru, mana Simoni ka qomaat'a qabu keesa tae sagale nyaatu, niitiini toko d'ad'a qayya urgaa, ka gati guddo qabu, dulo dooqati nat'e d'ufteeni. Dulo taani ch'absite, d'ad'a mata isaa dibde.

⁴ Ammo nami gari dalane waan woliini jed'ani, D'ad'a kana maafi akana balleesani?

⁵ D'ad'a qayya kana sila shilingi d'ibba jaa ira jirtuti dandaani gurgurani, hiyyeeyi qoodani jed'ani.

⁶ Yesoni waan jed'eeni, Isii iraa ch'allisa, maani iraa qabdani? Isiini waan dansa naa tolchite.

⁷ Hiyyeeyiini guyya ch'ufa isani woliini jirti, ammo anini guyya ch'ufa isani woliini injiru.

⁸ Isiini waan dandeetu naa tolchite, nafa kiyya d'ad'a dibde, awaala kurfeesite.

⁹ D'uguma, waan anini isaniini jed'u, fulla Odu Dansa iti odeesani ch'ufa, waan isiini tolchitele inodeesani, aka isi qaabatani.

Yudani Yeso gurgurata

¹⁰ Jennaani Yudani Iskariote, ka jara kud'ani lama kaani keesa jiru, gara qaalole gugurdo d'aqe, aka harka worrati Yeso kennu.

¹¹ Waan kana d'ageennaani, worri guddo gammade, hori isaa kenniti buufatani. Duuba inni qoomni barbaade, aka harka worrati kennu.

Yesoni jila Pasaka nyaata

¹² Guyyaani qara ka jila Qit'a bukho inqamne geennaani, hojja ilme hoola ta Pasaka qalani, jari isaa waan jed'eeni, Atini nu eesa deemne Pasaka mid'aasinu feeta, aka nyaannu?

¹³ Inni jara isaa keesa lama erge waan jed'eeni, Dira keesa seena, nama d'iira ka bute bisaani baatu argitani. Isa gula yaa,

¹⁴ mana inni seenu olduuda, waan abba manatiini jettani, Aabbooni waan jed'e, Mani keessuma me, aka anini jara kiyya woliini Pasaka keesati nyaad'u? jed'aani.

¹⁵ Namichi suni mana gudda, ka gubbaa, ka miha qabu, ka kurfeesani isani garsiisa, artiti nuu mid'aasa.

¹⁶ Jari isaa kae yae, waan inni jed'e argani, sagale Pasaka mid'aasani.

¹⁷ Lafti galgaloomnaani, inni jara ufi kud'ani lamaanu woliini d'ufe.

¹⁸ Ato worri tatae sagale nyaatu, Yesoni waan jed'e, D'uguma, waan anini isaniini jed'u, Isani keesa, nama toko ka na woliini tae sagale nyaachu jiruti harka nyaapa kiyyati na kenna.

¹⁹ Worri guddo lalefate, toko tokooni waan isaani jed'ani, Na wo taate?

²⁰ Yesoni waan worraani jed'e, Jara kud'ani lamaani kana keesa, toko ka na woliini qit'a qori keesa tuqate nyaatu isa.

²¹ Ilmi Nama akuma t'aafani deema, ammo gaargala isaati, ka Ilma Nama harka nyaapa isati kennu! Nami suni, yo sila ind'alatiini, ira dansa!

Sagale Aabbo

²² Ato worri sagale nyaatu, Yesoni qit'a fuud'e, eebise, ch'ach'abse, worrati kenne waan jed'e, Hood'a, kunini nafa kiyya.

²³ Inni mudunu fuud'e, galata deebise, worrati kenne, worri ch'ufti d'uge.

²⁴ Inni waan jed'e, Kunini d'iiga kiyya, ka wold'aqisa, ka nama hedduu jige.

²⁵ D'uguma, waan anini isaniini jed'u, Anini deebie bisaani zabibu ind'ugu, haga Finna Waaqa keesati hareesa d'uguuti.

²⁶ Duuba eegi sirba toko sirbani, worri gaara Ejersa jed'ani d'aqe.

Yesoni mormacha Petro hima

²⁷ Yesoni waan worraani jed'e, Isani ch'ufumaani ingufattani; wonti akanatiifi t'aafiini duri waan jettu, Anini tissitu ijeese, hooliyeeni gargari firfirfamti jetti.

²⁸ Ammo eegi na kaasani, anini isani durati Galilaya d'aqa.

²⁹ Petroni waan isani jed'e, Yo nami ch'ufti gufatele, anini ingufad'u.

³⁰ Yesoni waan isaani jed'e, D'uguma, waan anini siini jed'u, Halkanuma kana, ato kormi luku maro lama iniyine, atini maro sadi na mormatta.

³¹ Ammo inni afaani guutate waan jed'e, Yo si woliini duele anini si imormad'u. Ch'ufumaanu akasi jed'ani.

Kad'acha Yeso Gethsemane keesa

³² Fulla toko ta Gethsemane jed'ani d'ufani; Yesoni waan jara ufitiini jed'e, Arma tataa, haga anini Waaqa kad'ad'u.

³³ Jennaani inni Petrofi Yakobofi Yohana yaame, guddo rifate gaargale

³⁴ waan worraani jed'e, Lubbuuni tiyya guddo oodi, diquma na keesaa imbaane, arma tataa, eega.

³⁵ Diqo dura deemnaani, lafati jige, Waaqa kad'ate, aka yo taate, hojjaani tuni isa bira dabartu.

³⁶ Inni waan jed'e, Ee Aabbo, atini waan ch'ufa indandeeta, mudunu tana naraa fuud'i, ammo fed'i tiyyaaniti, fed'i tantetiini.

³⁷ Jennaani inni deebie, worra rafu arge waan Petroni jed'e, Simoni, atini irrafta? Saati toko dandeete ineeddu?

³⁸ Irrafiina, kad'ad'a, aka ilaalachaa keesa inseenne. Lubbuuni d'uguma imfeeti, ammo nafi laafa.

³⁹ Inni ammalle deeme kad'ate, dubbuma qara dubbate.

⁴⁰ Ammalle deebinaani, worra rafu arge, ilti worraa mugatiini ulfaatte, worri ammalle waan deefatu imbeekhu.

⁴¹ Maro sadeeso deebie waan worraani jed'e, Isani ammalle ch'ich'iiftani raftani? Ya geete, hojjaani ya d'iaatte, Ilma Nama harka nama dabati kennani.

⁴² Kakaa, nu yaasa, ilaala, nami harka nyaapa kiyyati na kennu d'aatu tana jira.

Qabisa Yeso

⁴³ Ato Yesoni dubbatu, Yudani, ka jara isaa kud'ani lamaani keesa jiru d'ufe; ammalle isa woliini gumiini bilaafi bokuuni yaatu, ta qaalole gugurdofi jara Seera beekhufi jaaroleeni ergite isati d'ufte.

⁴⁴ Namichi harka nyaapa isaati Yeso kennu kaani waan gumiini jed'e, Nami anini d'ungad'u isa, qaba, armaa fuud'a, tissa.

⁴⁵ D'umnaani, inni maro tokotu gara Yeso d'aqe, Aabbo jed'e d'ungate.

⁴⁶ Jennaani Yeso qabani eegani.

⁴⁷ Ammo namichi toko ka bira eju, sheefti ufi qalqala keesaa luqise, tisse qaallicha gudda d'ae, gurra toko iraa kute.

⁴⁸ Yesoni waan worraani jed'e, Isani aka waan shifta qabu yaatani, sheeftifi bokuuni gara kiyya d'uftani?

⁴⁹ Anini guyya heddu Mana Waaqa keesa isani woliini jira, aka nama barsiisu, ammo isani na inqamne. Ammo t'aafiini ha guutamtu.

⁵⁰ Jennaani jari isaa ch'ufti isa lakise baqate.

⁵¹ Kaimi toko, ka woya boofta ch'alla uyifatu, isa gula deeme. Ammo worri isa qabu feenaani

⁵² inni woya boofta suni keesaa bahe, qulla baqate.

Yeso Kayafa durati

⁵³ Jennaani gara qaallicha gudda Yeso geesani; qaalole gugurddofi jaarolefi jari Seera beekhuleeni wolwoldaani.

⁵⁴ Petroni fago isa hordofe, haga ch'icha qaallicha gudda. Achiti hojattu woliini tae ibida qanqaamate.

⁵⁵ Qaalole gugurdofi jaaroleeni koraa nama Yeso himatu barbaadani, aka ijeecha iti murani, ammo d'abani.

⁵⁶ Nami hedduuni waan d'aratiini isa himate, ammo afaani worra wolind'anne.

⁵⁷ Jennaani nami gari olejate waan d'aratiini isa himate waan jed'e,

⁵⁸ Nu isa, Anini Mana Waaqa kana, ka nami ijaare, ch'abse, guyya saditi kad'ibi ka nami inijaariini ijaara jed'u d'ageenne jed'ani.

⁵⁹ Ammo taatule, dubbini worraa wolind'anne.

⁶⁰ Qaallichi guddaani jiddu worraa ejate, Yeso gaafate waan jed'e, Atini woma indeebiftu? Worri kuni maafi si himata?

⁶¹ Ammo Yesoni dubbachu dide. Ammalle qaallichi guddaani isa gaafate waan jed'e, Atini Kristo, Ilma Waaqa ka guddisani mo?

⁶² Yesoni waan jed'e, Ee, Ana; ammalle Ilma Nama ka harka mirga Waaqaa tau argitani, ka dumansa gubbatiini d'ufu!

⁶³ Qaallichi guddaani woya ufi tarsaase waan jed'e, D'uga d'ibi maani iraa qamna?

⁶⁴ Isani isa Waaqa arabsu ya d'ageetani. Maani murtani? Worri ch'ufti ijeecha iti mure.

⁶⁵ Nami gari hanch'ufa iti tufe, ila qabani, d'abanaasani waan jed'aniini, Fagi! Hojattuleeni tontomooni isa d'aante.

Petroni Yeso mormata

⁶⁶ Ato Petroni ch'icha tau, garbitiini qaallicha gudda toko d'ufte.

⁶⁷ Petro ibida qanqaamatu argite, isa ilaalte waan jetteeni, Atileeni Yeso Nazareti woliini jirtayu?

⁶⁸ Ammo inni mormate waan jed'e, Hiyyo, anini waan atini dubbattu kana taka ind'ageenne jed'e, kae fullooni bahe. Hojuuma suni kormi luku iye.

⁶⁹ Ammalle garbitiini taani isa argite, waan worra isi bira ejaanjuuni jette, Kunini nama isaati.

⁷⁰ Ammo Petroni ammalle mormate. Diqo toko teennaani, worri achi ejaanju waan Petroni jed'e, Laki abbo, dandeete imormattu, worri keesani Galilaya, atini d'uguma nama isaati.

⁷¹ Jennaani Petro ufi abaare, khakhate waan jed'e, Anini nama isani baantani kana imbeekhu.

⁷² Hojuma suni kormi luku maro lameeso iye. Petroni dubbi Yesoni isaani jed'e qaabate, ta inni, Ato kormi luku maro lama iniyine, maro sadi na mormatta jed'e taani. Inni guddo lalefate bohe.