Mariko 13 - KITAABA WAAQA

¹ Ato Yesoni Mana Waaqa keesaa bahu, jara isaa keesa nami toko waan jed'eeni, Aabbo, D'akhaye dadansa manaani jaarani tana dawad'u!

² Yesoni waan isaani jed'e, Maneeni gugurdo tana agarta? D'akhaani tokoleeni woli irati inhafu; ch'ufa gargari jissani.

Yesoni gaargala d'ufu hima

³ Ato inni gaara Ejersa jed'ani gubba tau, ka Mana Waaqa moga suni jiru, Petrofi Yohanafi Yakobofi Andareani kobati isa gaafatani.

⁴ Gaafa wonti kunini taatu nuti himi; ammalle, akheekha kamiti d'ufa, yo wonti kunini d'iaatte? jed'aniini.

⁵ Yesoni waan worraani jed'e, Eegad'a, aka nami tokoleeni isani insoomne.

⁶ Nami hedduuni maqa kiyyaani d'ufe, Anini Kristo jed'e nama heddu soba.

⁷ Ammo yo isani waan lola yokhaani gurra lola d'ageetani iriifatiina. Wonti kuni qara d'ufu malte, ammo guyyaani muumme qara ingeenne.

⁸ Gochi kaate gosaani wolhaati, lafti lafaani wolhaati; lafti fulla hedduuni chochoti, beeltileeni ind'ufti, wonti kuni gaargala qaraati.

⁹ Ammo isani eegad'a. Wonti akanatiifi nami isani qaqabe kora isani geesa, Mana Waaqa iti kad'atani keesati isani d'aanani maro tiyyaafi; jaallabafi hayyu dura ejaanjitani, aka worra durati d'ugeesitani.

¹⁰ Odu Dansa qara gosa ch'ufaati odeesu malani.

¹¹ Ammalle hojja isani guurani qorsuma geesani ch'ufa, waan jettani durati iyaadiina, ammo waan gaafasi isaniti kennani jed'a. Wonti akanatiifi ka dubbatu isaniiniti, ammo Lubbu Qulqullo.

¹² Oboleesi oboleesa ufi ijeechaati kenna, ammalle ijoolleeni aka abbooti ijeesani feeti.

¹³ Nami ch'ufti maro tiyyaafi isani jibba. Ammo abbaani obse haga muumme tau imbaafama.

Waan jibbani ta nama rifachiisa

¹⁴ Ammo hojja waan jibbani ta nama rifachiisa, ta fulla tau himmalini teetu argitani (nami soomu ha hubatu), nami Yudea keesa jiru ha gaareeniti baqatu.

¹⁵ Nami mana gubba jiru gadi bue, mana seene woma mana keesaa imfud'atiini.

¹⁶ Nami oobru keesa jiruleeni, aka woya fud'atu ingaliini.

¹⁷ Guyya suni gaargala nad'eeni garaacha qabduufi ta hoosiftu!

¹⁸ Kad'ad'a aka wonti kuni bara qabana intaane.

¹⁹ Wonti akanatiifi guyya suni gaargala haga Waaqi lafa uume haga arrale nami taka inargiiniti d'ufa. Wonti akasi iti deebite lafa ind'uftu.

²⁰ Yo sila Aabbooni guyya suni gabaabsu d'ibaate, nami tokoleeni imbahu; ammo maro nama inni fohate suniifi inni ya guyya gabaabse.

²¹ Duuba, yo nami tokoleeni, Me ilaala, Kristoni arma jira! yokhaani, Me ilaala, inni achi jira! jed'e, ind'ugefatiina.

²² Kristo d'aratiifi raagi d'ara mullate, akheekhafi mamisa d'ara nama agarsiisa, aka yo dandaani, nama Waaqi fohatele sobani.

²³ Ammo isani eegad'a, anini waan ch'ufa durati yayu isaniti hime.

Waan guyya muumme

²⁴ Bara suni eegi gaargala suni, aduuni indukanoofti, jii iti deebie infisu.

²⁵ Urjiini ch'ufti gubba gadi harch'aati, jabeenna gubba ch'ufa fulla isaati chochoosani.

²⁶ Jennaani Ilma Nama ka dumansa keesa jabeennaafi guddinnaani d'ufu argani.

²⁷ Inni malaika erge nama inni fohate gama ch'ufa wolti guura, haga muumme lafatiifi ta gubba ch'ufa.

Mammaasa oda

²⁸ Mammaasa toko oda iraa barad'a. Yo dameeni isaa latte baala baafte, imbeetani aka ch'aamsaani d'iaate.

²⁹ Akasuma, yo waan kana ka tahu argitani, beekha, aka guyyaani diquma ingahiini.

³⁰ D'uguma, waan anini isaniini jed'u, d'alooti kuni indabru, haga wonti kuni ch'ufti guutamtuuti.

³¹ Gubbafi lafti indabarti, ammo dubbini tiyya indabartu.

Yesoni, Kurfo eega jed'a

³² Ammo guyyafi hojja suni nami tokoleeni imbeekhu, malaikaani gubbaleeni, yokhaani Ilmileeni, Abba male.

³³ Isani guyya suni imbeetani, tanaafi eegad'a, irrafiina.

³⁴ Wonti kunini aka nama imaltu deemu jirti. Inni worra ufi lakise jabeenna tissele isaati kenne, kamu huji kenneefi, duuba nama balbala eeguleeni balbala aka dansa eegi jed'a.

³⁵ Tanaafi aka dansa eega, wonti akanatiifi hojja abbaani mana d'ufu imbeetani, yo galgala taatele, yo halkani guddo taatele, yo baraaqa taatele, yo afaani bari taatele,

³⁶ aka inni d'ufe isani raftani inargine.

³⁷ Tanaafi waan anini isaniini jed'u ani nama ch'ufaani jed'a: Eega!