Mariko 11 - KITAABA WAAQA

¹ Worri Yerusalemufi gaara Bethfagefi Bethaniati d'iaannaani, fulla gaara Ejersa jed'ani, Yesoni jara ufi keesa nama lama erge

² waan jed'eeni, Olla isani dura jiru olduuda, duuba yo olduuddani, bukhura harree, ka hid'aansa qabu, ka taka illenjisiini argitani, hiikha, kootaani.

³ Yo nami, Maafi hiitani? jed'e, Aabbooti fed'a, ammalle inni indeebisa jed'aani.

⁴ Worri kae yae, bukhura harre, ka hid'aansa qabu argani, duuba hiikhani.

⁵ Nami achi ejaanju waan jed'eeni, Bukhura maafi hiitani, maani tolchitani? jed'e.

⁶ Ammo worri waan Yesoni jed'e, iti himnaani, worra gadi lakise.

⁷ Jennaani worri bukhura harree kaani Yesotiini d'ufe woya ufi raro tolchani Yesoni yaabate.

⁸ Nami hedduuni woya ufi kara keesa afe, ka gari dame mukha ch'ire, kara keesa afani.

⁹ Nami isa dura jiruufi ka isa duuba yauleeni waan jed'ani, Waaqa faarsa, Nami maqa Aabbootiini d'ufu la eebifame!

¹⁰ Waaqi finna Aabbo keenna Daudi, ka d'ufu jiru eebisinna! Waaqa faarsa!

¹¹ Yesoni Yerusalemu seene Mana Waaqa d'aqe. Waan ch'ufa mimillate, maro aduuni d'iiteefi, jara ufi kud'ani lamaani woliini Bethania d'aqe.

Yesoni mukha odaa abaara

¹² Boriyya, worri Bethaniani baanaani, inni beelae.

¹³ Duuba mukha oda toko, ka baala qabu, fagoti arge, mid'aani ira laalu d'aqe. Achi geennaani, baala male, woma iraa d'abe; wonti akanatiifi hojjaani odaani bilchaatu ingeenne.

¹⁴ Inni waan jed'eeni, Nami tokoleeni iti deebie mid'aani sira inyaatini! Jari isaa waan kana d'agaye.

Yesoni Mana Waaqa qulqulleesa

¹⁵ Yerusalemu gahani jennaani Mana Waaqa seene, gumi Mana Waaqa keesati wo gurgurattufi ta bitattu achi had'e, mesa nama hori jijiratufi barch'uma nama sabaliisa gurgurule garagalche,

¹⁶ nama d'aatu Mana Waaqa kara tolfate miha baate dabruuni yau d'owe.

¹⁷ Duuba worra barsiise waan jed'eeni, Mani kiyya mana eeba gosa ch'ufa jed'ani t'aafaniiniti? Ammo isani goda hattu tolchitani.

¹⁸ Qaalole gugurdofi jari Seera beekhu akasi d'ageennaani kara isaani ijeesani malatani. Ammo maro gumiini ch'ufti barsiisa isaa maadefatteefi isa sodaatani.

¹⁹ Lafti galgaloomnaani, Yesofi jari isaa dira keesaa bahani.

Jabeenna d'ugefacha

²⁰ Ato ganamaani dabranu, oda hiddi gogeeni bahani.

²¹ Petroni waan tahe qaabate waan jed'eeni, Aabbo, ilaali, odaani atini abaarte kaani ya gogoge.

²² Yesoni waan worraani jed'e, Waaqa d'ugefad'a.

²³ D'uguma, waan anini isaniini jed'u, Nami gaara kanaani, Arma buqai, galaana keesa bui jed'eeni, yo garaa ufi keesati ind'arefanne, ammo aka wonti inni jed'u taatu d'ugefatu, wonti suni inguutamtiifi.

²⁴ Tanaafi waan anini isaniini jed'u, Waan isani Waaqa kad'attani ch'ufa, d'ugefad'a, aka qara d'uguma argattani, duuba inuma argattani.

²⁵ Ammalle, hojja ejattani Waaqa kad'attani ch'ufa, namaa araarama, yo nami isani dabse jiraate, aka Abbaani keesani ka gubba wollaala keesanile isanii araaramu. [

²⁶ Yo isani namaa araaramu diddani, Abbaani keesani ka gubbaa jiru wollaala keesanile isanii araaramu dida.]

Waan jabeenna Yeso

²⁷ Duuba Yerusalemuti deebiani. Ato Yesoni Mana Waaqa keesa deedeemu qaalole gugurdofi jara Seera beekhufi jaaroleeni isati d'ufte

²⁸ waan jetteeni, Jabeenna kamiini waan kana tolchita? Yokhaani, eentu jabeenna kana sii kenne, aka waan kana tolchitu?

²⁹ Yesoni waan jed'eeni, Anileeni waan toko isani gaafad'a; nati hima, duuba anileeni jabeenna anini waan kana tolchuuni isaniti hima.

³⁰ Batisooni Yohana gubbaa baate mo lafaa baate? Nati hima.

³¹ Worri wolmorme waan woliini jed'e, Yo gubbaa jenne, inni, Isani maafi isa ind'ugefatiina? jed'a.

³² Ammo yo Lafaa jenne (gumi sodaatani, waan nami ch'ufti Yohana raaga sehuufi).

³³ Tanaafi waan Yesoni jed'ani, Nu imbeennu. Yesoni waan jed'eeni, Yoosi, anileeni jabeenna waan kanaani tolchu isaniti inhimu.