Luqaas 7 - KITAABA WAAQA

¹ Yesoni dubbi namaani jed'e tana buufannaani kae Kapernaumu d'aqe.

² Duuba garbichi shumi toko ka shumini suni guddo jaalatu fayyad'abe ka lubbuu tahe.

³ Shumini suni waan Yeso d'ageennaani jaarole Yahudi isati erge kad'ate aka inni d'ufe garbicha isaa fayyisu.

⁴ Yesoti d'umnaani guddo kad'atani waan jed'aniini, Nama kana d'uguma waan kana tolchuufi malte.

⁵ Inni gosa teenna jaalata, ammalle mana Waaqa iti kad'atani toko ya nuu ijaare.

⁶ Jennaani Yesoni worra woliini deeme. Manati d'iaannaani shumini kaani jaalaani isaa Yesoti erge waan jed'eeni, Aabbo, ingaargaliini. Atini mana kiyya keesa seenu himmalle:

⁷ anileeni gara kanke d'ufu himmalle, ammo dubbuma ch'alla jed'i, garbichi kiyya imfaya.

⁸ Anileeni seera jala jira, askartileeni na jala jirti. Yo anini tokooni, Deemi jed'u, inni indeema; yo kad'ibiini, Kooti jed'u, inni ind'ufa; yo garbicha kiyyaani, Akana tolchi jed'u, inni intolcha.

⁹ Yesoni dubbi tana d'ageennaani guddo mame, garagale waan gumi isa gula yaatuuni jed'e, Waan anini isaniini jed'u, D'ugefacha akana tana anini taka Israeli keesaleti ingarre.

¹⁰ Jari ergani kaani manati dachaanaani garbicha fayye arge.

Yesoni ilma due kaasa

¹¹ Eegi suni Yesoni dira Naini jed'ani d'aqe; jara isaatiifi gumiini guddooni isa gula yaate.

¹² Fullo dirati d'iaannaani, nama reefa baate yauni arge. Nami due suni ilma tokocha niiti d'iirsa inqamne, nama hedduti ka dira suni isi woliini jira.

¹³ Aabbooni isi arginaani naheefi, Imbohiini jed'eeni.

¹⁴ Iti d'iaate sire reefaani baatani tuqe, jennaani jari baatu kaani ejaanje. Yesoni waan jed'eeni gurba waan anini siini jed'u kai.

¹⁵ Namichi due kaani kae tae dubbate. Duuba Yesoni haad'a isaati kenne.

¹⁶ Nami ch'ufti bakhakhe Waaqa faarse waan jed'ani, Raagi guddaani yayu jiddu teennaa gadibahe: Waaqi la gumi ufiti mullate.

¹⁷ Gurri isaa lafa Yudeatiifi arda suni ch'ufa gahe.

Yohana nama batisu

¹⁸ Jari Yohana odu tana ch'ufa iti hime.

¹⁹ Jennaani Yohanani jara isaa lama yaame Aabbooti erge waan jed'eeni, Atini ka ind'ufa jed'ani mo kad'ibi eenna?

²⁰ Jari kaani isa geennaani waan jed'ani, Yohanani nama batisu situ nu erge waan jed'e, Atini ka ind'ufa jed'ani mo kad'ibi eenna?

²¹ Hojuma suni Yesoni nama heddu fayyise ka d'ukuba garagara qabuufi ka jinniini gaargalchitele, nama balla heddule fayyise.

²² Inni waan ergattu Yohanatiini jed'e, D'aqa, waan argitaniifi waan d'ageetani Yohanati hima: ballaani lafa arga; naafi kae deema, nami qomaat'a qabu inqulqullaa, ka gurri duude ind'agaya; nama due inkaasani, Odu Dansa hiyyeeyiti odeesani.

²³ Ayyaana nama na imormanne.

²⁴ Ergattuuni Yohana yaannaani Yesoni waan Yohana gumiti dubbate waan jed'e, Isani lafa alo maal daawachu d'at'ani? Ilaadu bubbe chochositu mo maal barbaaddani?

²⁵ Yoosi maal daawachu d'at'ani? Nama woya dansa uyifatu? Hubad'a, nami shoobu, ka machi fed'u, mana hayyu keesa taa.

²⁶ Maal daawachu d'at'ani re? Raaga? Ee, ammo waan anini jed'u, Nama raaga ira jiru argitani.

²⁷ Yohanani sunuma ka t'aafi keesati Waaqi baane waan jed'e, Kunini ergattu tiyya; anini si durati isa erga aka inni d'aqe daandi tante si durati mid'aasu.

²⁸ Waan anini isaniini jed'u, Nama d'alate tokoleeni ka Yohana ira jiru injiru; ammo nami Finna Waaqa keesati nama ch'ufa ira diqa isa ira jira.

²⁹ Nama ch'ufaafi worri damoosa guruleeni waan kana d'agaye; worri suni worra Seera Waaqa ka d'uga guute jennaani Yohanani batise.

³⁰ Ammo Farisayoofi jari Seera beekhu mala Waaqaa didani batiso Yohana tuffatani.

³¹ Nama d'aloota kana maaniini wolti akheekha? Worri maal fakaata?

³² Ijoolle fulla gabaya teteete woli yaamtu fakaata, ta waan jettu, Dibbe fuud'aa isanii d'oomne ammo sirbu diddani! Lalalaani iyine ammo isani bohu diddani.

³³ Yohanani nama batisu d'umnaani qit'a inyaanne, farsole ind'unne, ammo isani, Inni maraata jettaniini.

³⁴ Ilmi Nama d'umnaani nyaate d'uge, duuba isaani waan jettani garaade kana ilaala ka farso d'ugu; inni jaala nama damoosa guuratifi ka nama daba jettani.

³⁵ Aka qalbiini Waaqa d'uga, worra d'ugefateeti agarsiisa.

Yeso mana Simoni ka Farisayo keesa

³⁶ Namichi Farisayo toko Yeso gololaa yaame, jennaani Yesoni mana isaa seene tae gololfate.

³⁷ Jennaani niitiini sharmut'itiini toko ta dira suni, aka Yesoni mana nama Farisayo keesa sagale nyaatu d'ageennaani dulo d'ad'a qayya qabduuni d'ufte.

³⁸ Isiini duuba fulla miila isaa ejatte boote imimaani miila isaa irati ch'och'obsite, rifeensa mata ufitiini haat'e, miila d'ungate, d'ad'a suni dibde.

³⁹ Jennaani namichi Farisayo ka isa gololche kaani garaa ufi keesati waan jed'e, Ato sila namichi kunini raaga tahe, aka niitiini isa tut'u tunini sharmut'atiifi nama daba imbeekha.

⁴⁰ Yesoni waan jed'eeni, Simoni, anini dubbi toko ta siini jed'u qaba. Inni waan jed'e, Aabbo, maal?

⁴¹ Yesoni waan jed'eeni, Nama tokoti jira ka nami lama gati ira fud'ate; toko shilingi kunki shani, kaani shilingi d'ibba shani.

⁴² Baasu dad'abani jennaani namichi kaani worra lachuyu lakise. Tanaafi, mala keeti, kamiti ira isa jaalata?

⁴³ Simoniini waan jed'eeni, Waan anini sehu, ka hori ira gudda lakisaniifi. Inni waan jed'eeni, D'uguma baanta.

⁴⁴ Niititi garagale waan Simoniini jed'e, Niiti tana agarta? Anini mana kanke seennaani atini bisaani miilale naa inkennine, ammo isiini imimaani ufitiini miila kiyya d'it'e, rifeensa mata ufitiini nara haat'e.

⁴⁵ Atini na ind'unganne, ammo isiini haga anini arma seene miila kiyya d'ungachu illakimne.

⁴⁶ Mata kiyya atini imuune, ammo isiini miila kiyya d'ad'a qayyaa dibde.

⁴⁷ Tanaafi anini siti hima, Daba isii heddu la araaramaniifi maro isiini guddo na jaalatteefi. Ammo ka diqo araaramaniifi sunini diqo jaalata.

⁴⁸ Waan inni isiini jed'e, Daba kanke la si araaramani.

⁴⁹ Jari isa woliini tatau garaa ufi keesati waan woliini jed'e, Eennu kunini ka dabale dandae namaa araaramu?

⁵⁰ Inni waan niiti taaniini jed'e, D'ugefachaani tante la si baafte; beeni, nagayaani gali.