Luqaas 23 - KITAABA WAAQA

¹ Gumiini ch'ufti kaate Yeso Pilatoti geesite.

² Himacha iti kaani waan jed'ani, Namichi kunini gosa teenna yake damoosa Kaisari imbaasina jed'e, Ammalle isaa, anini, hayyu ufiini jed'u d'ageenne.

³ Pilatoni isa gaafate waan jed'eeni, Atini hayyu Yahuditi? Yesoni waan jed'eeni, Atu ya jette.

⁴ Pilatoni waan qaalole gugurdofi gumiini jed'e, Anini wollaala nama kana irati ingarre.

⁵ Ammo worri isa d'owe waan jed'e, Inni biyya yake lafa Yahudi ch'ufa keesati barsiisa, haga Galilayatiifi haga armale.

Yeso Herode durati

⁶ Pilatoni dubbi tana d'ageennaani aka nami kuni nama Galilaya gaafate.

⁷ Aka inni hayyu Herode jala jiru d'ageennaani Herodeti erge, ka hojja suni Yerusalemu jiru.

⁸ Herodeni Yeso arginaani guddo gammade, waan haguma duri inni odu isaa d'agaye isa argu fed'eefi; ammalle inni akheekha Yesoni tolchu argu fed'e.

⁹ Duuba dubbi heddu isa gaafate, ammo Yesoni woma iti indeebimne.

¹⁰ Qaalole gugurdofi jari Seera beekhu bira ejaanjani, dubbi jabduuni Yeso himatani.

¹¹ Herodefi askartiini isaa Yeso tuffatani goyeesani, woya dansa iti uyisani Pilatoti deebisani.

¹² Guyyuma suni Pilatofi Herodeni wold'aqani jaala tahani; qara duri worri wolii nyaapa.

Yeso duisati murani

¹³ Pilatoni qaalole gugurdofi jara gugurdafi biyya yaame

¹⁴ waan jed'eeni, isani nama kana natiini d'uftani, inni nama wolti yake jettani isa himattani. Anini isani durati gaafannaani jallu isani isa himattanini tokole ingarre.

¹⁵ Yokhaani Herodeleeni woma ingarre, tanaafi inni isa nuti deebise. Wonti inni tolche ta duu maleefi tokoleeni injirtu.

¹⁶ Tanaafi anini isa d'aane galakisa. [

¹⁷ Pilatoni guyya jila Pasaka ch'ufa nama toko hiikhu male.]

¹⁸ Ammo gumiini ch'ufti ch'aarte waan jette, Nama kana nuraa balleesi, Baraba nu hiikhi.

¹⁹ Baraba, waan inni dira keesa lola baase nama ijeeseefi hid'ani.

²⁰ Pilatoni ammalle worraani dubbate, maro inni Yeso hiikhu fed'eefi.

²¹ Ammo gohani waan jed'ani, Maskali gubbati isa fannisi, isa fannisi.

²² Pilatoni maro sadeeso waan jed'eeni, Maafi akana? Waan hamtu maani tolche? Anini waan tokole ka inni duu maleefi ingarre. Tanaafi anini d'aane isa hiikha.

²³ Ammo jabaatani qonqo guddooni gohani, aka Yeso fannisani kad'atani. Eege gohanti worraa isa dabsate.

²⁴ Duuba Pilatoni aka waan worri fed'u tolchani mure.

²⁵ Inni nama worri fed'u, ka waan lolatiifi waan ijeechatifi hid'ani kaani hiikhe, Yeso harka worrati kenne aka waan fed'ani tolchani.

Yeso maskaliti fannisani

²⁶ Ato isa fuud'ani geesanu, namicha toko ka Simoni jed'ani ka lafa Kirene gara oobruti d'ufuu jiru, qabani maskali ira kayani, baachisani Yeso gula deemsisani.

²⁷ Gumiini nami hedduuni isa gula yaate. Gumi suni keesa nad'eeni isaa boote lalefate jira.

²⁸ Ammo Yesoni isiiti garagale waan jed'eeni, Dubra Yerusalemu, naa imbohiina, ammo ufiifi ilmaani teesani boha.

²⁹ Wonti akanatiifi guyyaani ind'ufa, ka nami ayyaana maseenatifi ka nad'eeni taka d'alte ilmaani inhoosisini jed'u.

³⁰ Gaafasi waan gaareeniini jed'ani. Nurati jiga, ammalle waan kubileeni jed'ani, Nu d'ossa.

³¹ Wonti akanatiifi yo waan kana ato mukhi dotaatu tolchani, gaafa mukhi goge maani taati?

³² Ammalle nama lamati jira, ka wo yake, ka isa woliini ijeechaa geesani.

³³ Fulla Buqe mata jed'ani geennaani, achiti maskaliti isa fannisani. Jara lamaani toko ka wo yakele, toko gama mirgati kanile gama bitati fannisani.

³⁴ Yesoni waan jed'e, Aabbo, worra kana araarami, waan tolchu jirani imbeekhani. Woya isaa hit'a buufatani qoodatani.

³⁵ Biyyiti oliejanjite daawatte; jari gugurdaani Yahudi isa goyeese waan jed'e, inni nama d'ibi baase ha ufi baasu yo inni Kristo Waaqi fohate tahe.

³⁶ Askartileeni isa akeesite daad'i isati kennite,

³⁷ waan jetteeni, yo atini hayyu Yahudi taate ufi baasi.

³⁸ Dubbi tana isa gararoti t'aafani, Kunini hayyu Yahudi jed'ani.

³⁹ Jara wo yake ka fannisani keesa toko Yeso goyeese waan jed'eeni, Atini Kristoniti? Ufi baasi, nule bassi.

⁴⁰ Ammo kaani waan jed'eeni, Atini Waaqa insodaatu? Sifi isale muraani teesani taka.

⁴¹ Nu d'uga arganna, nu gati d'uguma ta huji teenna arganna; ammo namichi kunini woma iyakine.

⁴² Inni waan jed'eeni, Yeso, na qaabad'u, hojja guddinna kanke seentu.

⁴³ Inni waan isaani jed'e, D'uguma, waan anini siini jed'u, Arra atini fulla dansa na woliini teeta.

Duisa Yeso

⁴⁴ Lafti guyya gudda geennaani haga saafa dukanoofte.

⁴⁵ Golli Mana Waaqa jiddu tarsae.

⁴⁶ Yesoni qonqo guddooni lalabe waan jed'e, Aabbo, lubbu tiyya harka kanketi lakisa! Akasi jed'e ch'iche.

⁴⁷ Guddaani askarti waan tahe arginaani Waaqa faarse waan jed'e, D'uguma namichi kunini nama d'ugaati!

⁴⁸ Gumiini ch'ufti ta daawachu d'ufte waan tahe arginaani mata gingilfatte galte.

⁴⁹ Jaalaani isaa ch'ufaafi nad'eeni Galilaya ta isa gula d'ufte fago ejaanjatte waan kana daawate.

Awaala Yeso

⁵⁰ Nama toko jira ka Yusufu jed'ani. Inni nama dansa, ka d'uga, ka kora worra ke jiru,

⁵¹ ammo heregafi huji worra inquufu. Inni nama dira Arimathaya, diri suni, ka Yahudi; ammalle inni Finna Waaqa eegata.

⁵² Duuba namichi kunini gara Pilato d'aqe, reefa Yeso kad'ate.

⁵³ Jennaani maskali ira gabuuse, woya booftatiini mamare, goda d'akha ka taka nama iti inawaaliini keesati awaale.

⁵⁴ Guyyaani suni guyya Kurfefacha, guyyaani Sabatoleeni la d'iaate.

⁵⁵ Nad'eeni haga lafa Galilaya isa gula d'ufte d'at'e awaala agarte, aka reefa ch'iifsisanile ilaalte.

⁵⁶ Jennaani dachaate, waan urgooftufi d'ad'a qayya qabu mid'aasite. Akuma Seeri jed'u guyya Sabato boqatani.