Luqaas 21 - KITAABA WAAQA

¹ Yesoni olmillate jennaani dureeyi ta hori Waaqa baaftu arge,

² ammalle niiti hiyyeeti d'iirsa inqamne toko ta dururu lama achi keesa buuftu arge.

³ Inni waan jed'e, D'uguma waan anini isaaniini jed'u, Niitiini hiyyeetiini tuni nama ch'ufa ira wo baafte.

⁴ Wonti akanatiifi jari kaani ch'ufti hori ufi gudda keesaa baase; ammo isiini hiyyuma ufi keesa hori qabdu ch'ufa baafte.

Yesoni muumme Mana Waaqa hima

⁵ Ato nami gari waan Mana Waaqa hasau, aka d'akhaye dansaafi waan Waaqaa baasaniini bareesani, Yesoni waan jed'eeni,

⁶ Waan kana ka isani argitani, guyyaani d'akhaani tokoleeni woli irati inhamne ind'ufa; ch'ufa gargari jissani.

Yesoni gaargala d'ufu hima

⁷ Worri isa gaafate waan jed'eeni, Aabbo, wonti kuni yoomi taati? Akheekha kamiti mullata hojja wonti kuni d'iaattu?

⁸ Inni waan jed'eeni, Eegad'a, aka isani insobamne. Wonti akanatiifi hedduti maqa kiyyaani d'ufe waan jed'u, Anini isa, ammalle, Hojjaani, ya d'iaatte. Worra akana kana gula indeemina.

⁹ Lolafi had'iisa, yo d'ageetani, insodaatiina; wonti kuni qara d'ufu malte, ammo muummeeni diqo ingeenne.

¹⁰ Jennaani inni waan worraani jed'e, Gochiti gosaani wolhaati, lafti lafaani wolhaati;

¹¹ lafti guddo chochoti, fulla heddu beelafi d'ukubati d'ufa; waan nama mudamsisatifi akheekha guddati gubba mullata.

¹² Ammo waan kana ch'ufa durati isani qabani gaargalchani, maneeni Waaqa iti kad'atani duraani isani d'ufani, mana hid'aansa keesa isani buusani; maro tiyyaafi hayyootafi jaallaba dura isani geesani.

¹³ Yoi kuni yo isani Odu Dansa odeesitani.

¹⁴ Tanaafi garaa kutad'a, aka durati waan deebiftani ind'ind'insine;

¹⁵ anati afaanifi qalbi isanii kenna, ta nyaapi keesani tokoleeni dandae morkeeni intufanne.

¹⁶ Abbaafi haad'afi oboleyaanifi gosafi jaalaani teesanileeni isani gurguratti; nama gari isani keesa inijeesani.

¹⁷ Nami ch'ufti isani jibba, maro tiyyaafi.

¹⁸ Ammo rifeensi mata keesani tokoleeni imbadu.

¹⁹ Obsa akasi ch'allaani lubbu teesani baaftani.

Yesoni badii Yerusalemu hima

²⁰ Ammo hojja duula Yerusalemu marsu argitani, aka badiini isii d'iaate beekha.

²¹ Hojja suni nami lafa Yahudi keesa jiru ha gareeniti baqatuti; nami dira keesa jiruleeni ha keesaa bahu; nami ala jiruleeni dira inseeniini.

²² Wonti akanatiifi kunini guyya haalo baafatani, ka waan t'aafani ch'ufa guutani.

²³ Gaargala nad'eeni gaafasi garaacha qabdu, yokhaani ta hoosiftu. Gaargali guddaani lafa tana d'ufe dalansuuni Waaqa gosa tana balleesiti.

²⁴ Worra gari sheeftini fit'ani, ka hafele boojiani lafa d'ibi geesani. Gochiti d'ibiini d'ufte Yerusalemu ira ejaanjatti haga guyyaani isii hobauti.

Waan guyya muumme

²⁵ Akheekhati mullata adufi jiafi urji keesa. Lafa keesaleti gochiti ch'ufti ufi jibbaatti, maro gohannaafi d'awa galaana sodaataniifi waan tahani wollaalaani.

²⁶ Nami naasuuni gagaba, yo waan lafati d'ufu heregu; wonti akanatiifi wonti gubba jira ch'ufti kara ufi iraa gorti.

²⁷ Gaafasi Ilmi Nama, ka jabeennaafi guddinnaani dumansa keesa d'ufu argani.

²⁸ Hojja wonti kuni qara taatu, mata olfud'ad'a, olmillad'a, baafami keesani ya d'iaate.

Mammaasa oda

²⁹ Jennaani Yesoni mammaasa kana worrati hime waan jed'e, Odafi mukha ch'ufa ilaala.

³⁰ Hojja baala baase, imbeetani aka ch'aamsaani d'iaate.

³¹ Akasuma, hojja waan kana ka tahu argitani, aka Finni Waaqa d'iaate beetani.

³² D'uguma waan anini isaniini jed'u, D'aloota kuni indabru, haga wonti kuni ch'ufti guutamtuuti.

³³ Gubbafi lafti indabarti, ammo dubbini tiyya indabartu.

Yesoni, Kurfo eega jed'a

³⁴ Ammo eegad'a, aka garaani keesani waan quuftaniifi waan, machitiifi d'ipu lafa tana inqulqulle, aka guyyaani suni aka t'urura tassa isani ira imbuune.

³⁵ Wonti akanatiifi guyyaani suni nama ch'ufati d'ufa ka lafa ch'ufa keesa tau.

³⁶ Hojja ch'ufa eegad'a, kad'ad'a, aka waan d'ufa kana ch'ufa jalaa baatani, Ilma Nama dura ejaanjattani.

³⁷ Guyya ch'ufa Yesoni Mana Waaqa keesati nama barsiise, ammalle lafti halkani geennaani inni d'aqe Gaara Ejersa jed'ani gubbaa bule.

³⁸ Ganama nami ch'ufti kae Mana Waaqa d'aqe aka isa ch'aqasu.