Luqaas 17 - KITAABA WAAQA

¹ Duuba Yesoni waan jara ufitiini jed'e, Gufuuni daba keesa nama buuftu inuma d'ufti, ammo gaargala nama d'ufuuni!

² Sila ira dansa yo daakha daakhu morma isaati hid'ani galaana keesa buusani, fulla inni worra didiqa kana gufachiisu.

³ Ufi eegad'a! Yo oboleesi kanke dabe gorsi, yo inni daba iraa deebie araaramiifi.

⁴ Yo inni guyya toko keesa maro torba siti dabe ammo maro torba, Na araarami siini jed'e, araaramiifi.

Waan d'ugefacha

⁵ Ergattuuni waan Aabbooni jette, D'ugefacha teenna iti nuu dari.

⁶ Aabbooni waan jed'eeni, Yo sila d'ugefacha haga mid'aani dambi toko qabaattani, oda kanaani, Hiddaani armaa buqai, galaana keesa ufi d'aabi, jettani, duuba inni intaha.

Waan hojattu

⁷ Yo sila nami toko isani keesa hojattu toko ta oobru qote yokhaani ree tissitu qabaate, yo inni huji gale, inni, Hurrisi, kooti, tai sagale nyaad'u wo jed'a?

⁸ Dandae injed'u, ammo, Hurrisi, kooti, sagale naa d'aabi, mart'ifad'u na golochi, haga anini gololfad'uuti; eegi suni nyaatte d'udda jed'a.

⁹ Abbaani hojattu suni mala keeti maro waan inni fed'u tolcheefi galata deebisa? Hiyyo.

¹⁰ Isanileeni akasuma; hojja waan ch'ufa ka Tolcha jed'ani tolchitani, waan jettani, Nu tissele ta woma imbaane; nu waan tolchu malle ch'alla tolchine jed'a.

Yesoni nama qomaat'a qabu kud'ani fayyisa

¹¹ Ato Yesoni Yerusalemuti deemu, lafa Samariatifi ta Galilaya jiddu dabre.

¹² Ato inni olla toko seenu jiru, nami kud'ani ka qomaat'a qabu isati d'ufe, fago ejaanje,

¹³ qonqo olfud'atani waan jed'ani, Yeso, Aabbo, nu nahi.

¹⁴ Worra arginaani Yesoni waan jed'eeni, Beena, qaalole ufi agarsiisa. Ato kara yaanu fayyani.

¹⁵ Jennaani nami toko aka fayye ufi arginaani, deebie qonqo guddooni Waaqa faarse.

¹⁶ Miila Yeso jalati jige galata deebiseefi. Namichi sunini gosa Samariati.

¹⁷ Jennaani Yesoni waan jed'e, Nami kud'ani imfayine? Sagalaani kaani me re?

¹⁸ Keessumicha kana male, nami deebie Waaqa galata deebisu injiru?

¹⁹ Yesoni waan isaani jed'e, Olkai, beeni deemi, d'ugefachaani tante la si fayyifte.

D'ufiisa Finna Waaqa

²⁰ Farisayooni guyya Finni Waaqa d'ufu Yeso gaafannaani inni waan jed'eeni, Finni Waaqa aka nami eeguuni ind'ufu.

²¹ Yokhaani nami dandae, Kuno kana injed'u, yokhaani, Kuno suni injed'u. Wonti akanatiifi Finni Waaqa jiddu teesani ke jira.

²² Jennaani inni waan jara ufiitini jed'e, taka tana isani guyya toko ka bara Ilmi Nama lafa jiru kaani argu feetani d'araatani, ammo inargitani.

²³ Gaafasi worri waan isaniini jed'u kuno suni yokhaani kuno kana. Ammo isani indeemina Yokhaani worra gula iyyaina.

²⁴ Akuma angaasuni moga tana angaate taanti ifsitu, guyyaani Ilma Namaleeni akasuma taha.

²⁵ Ammo qara inni aka heddu gaargalu male, ammalle d'alooti kuni isa didu male.

²⁶ Akuma bari Nuhu jiru, bari Ilma Namaleeni jira.

²⁷ Gaafasi haga guyyaani Nuhuni hobolo seene lolaani d'ufe worra ch'ufa balleese gahuti, nyaatani d'ugani wolfuud'ani.

²⁸ Akuma bara Lutu taati — nyaatani d'uugani, bitatani gurguratani, oobraatani mana ijaaratani.

²⁹ Ammo guyya Lutuuni Sodoma keesaa bahe, ibidafi dillooni aka ibida bobeetu gubba gadi roobde worra ch'ufa balleesite.

³⁰ Guyya Ilmi Nama mullatule wonti ch'ufti akasuma taati.

³¹ Guyya suni, nami mana gubba jiru, ka mihi isaa mana keesa jiru, gadi bue inguuratiini; akasuma nami oobru keesa jiruleeni indeebiini.

³² Niiti Lutu qaabad'a!

³³ Nami lubbu ufi baasu fed'u ind'aba; ammo ka lubbu ufii balleesu inargata.

³⁴ Waan anini isaniini jed'u, Halkani suni nama lamati sire toko ira rafa: toko fuud'ani, kaani lakisani.

³⁵ Nad'eeni lamati mid'aani woliini daakhu jira; toko fuud'ani, taani lakisani. [

³⁶ Nama lamati oobru keesa jira: toko fuud'ani, kaani lakisani.]

³⁷ Jari isaa waan jed'eeni, Aabbo, fullaani suni eesa? Inni waan jed'eeni, Allaatiini fulla reefi jiruti buuti.