Luqaas 12 - KITAABA WAAQA

¹ Gumiini kunki hedduu wolti baate woli ira ejaanjatte, jennaani Yesoni qara waan jara ufitiini jed'e, Bukho Farisayo eegad'a, anini kiyyiba worraa baana.

² Wonti daboolani ta imullanne injirtu, yokhaani wonti d'ossani ta imbeekhamne injirtu.

³ Tanaafi dubbi isani dukana keesati jettani ch'ufa ifsa keesati d'agayani, ammalle dubbi isani dinqati gurrati wolti himtani fiit'e mana gudda gubbati lalabani.

Abba sodaachu malani

⁴ Waan anini isaniini jed'u, jaallaani tiyya, nama nafa ijeesu ammo eegi suni waan d'ibi tolchu indandeenne insodaatiina.

⁵ Ammo nama sodaachu malani anini isaniti hima; Waaqa sodaad'a, ka eegi nafa ijeese jabeenna ibida keesa buusuuni qabu. Ee, waan anini isaniini jed'u, sunuma sodaad'a.

⁶ Simpirreeni shani beese lamati gurguraniyu? Ammo tokole Waaqa durati inded'ani.

⁷ Tana lakisa, rifeensa mata keesanile ch'ufa yayu hedani. Insodaatiina: gatiini teesani ta simpirre ira jirti.

Himachafi mormacha Kristo

⁸ Woni anini jed'u, Nama nama durati na d'ugeesu ch'ufa Ilmi Nama malaika Waaqa durati d'ugeesa.

⁹ Ammo nama nama durati na mormatu malaika Waaqa durati mormatani.

¹⁰ Nama Ilma Nama arabsu ch'ufa inaraaramaniifi, ammo nami Lubbu Qulqullo arabsu araarama inargatu.

¹¹ Yo Mana Waaqatiifi jaarolefi nama gugurda dura isani geesani, waan deefattaniifi waan dubbattani iyaadiina.

¹² Wonti akanatiifi Lubbuuni Qulqullooni hojuma suni waan isani jechu maltani isani barsiifti.

Mammaasa daalle dureesa

¹³ Nami toko gumi keesa waan isaani jed'e Aabbo, oboleesa kiyyaani, D'aala qoodiifi jed'i.

¹⁴ Ammo inni waan jed'eeni, Eentu qortu yokhaani qoodu hori keesani naa tolche?

¹⁵ Inni waan biyyaani jed'e, Me hubad'a, d'arraa ch'ufa eegad'a; wonti akanatiifi jireenni namaa qabeeni isaa keesa injiru.

¹⁶ Jennaani Yesoni mammaasa kana worrati hime waan jed'eeni, Oobruuni nama dureesa toko guddo mid'aani baafte.

¹⁷ Inni d'ind'inse garaa ufi keesati waan jed'e, Anini fulla mid'aani kiyya olkeyad'u inqabu maal taha?

¹⁸ Waan ufiini jed'e, Anini akana tolcha; khod'o tiyya d'iige, ballise ijaara, achiti mid'aanifi waan kiyya ch'ufa guura.

¹⁹ Duuba waan ufiini jed'u, Abbo, atini amma hori gudda qabda, ka ganna heddu tahu, boqod'u nyaad'u, d'ugi, gammadi.

²⁰ Ammo Waaqi waan jed'eeni, Atini daalle, halkani kana lubbu tante fed'ani; horiini atini olkeete suni ka eennu taha duuba?

²¹ Nami hori lafa keyate ammo gara Waaqa durooma inqamne akasuma taha.

D'ind'insafi d'ugefacha

²² Jennaani Yesoni waan jara ufitiini jed'e, Wonti anini, Waan sagale yokhaani woya uyifatani inqulqulliina jed'eefi tana.

²³ Wonti akanatiifi jireenni sagale ira jira, nafileeni woya ira jira.

²⁴ Me haranqeesa ilaala; mid'aani oobre imuru, khod'o inqabu ta mid'aani iti guuratu; ammo Waaqi isa nyaachisa. Isani simpirre guddo ira jirtaniniti?

²⁵ Eentu isani keesa, ato haguma fed'u qulqulle, dandae lubbu ufi d'eeresa?

²⁶ Yo waan diqo suni indandeenne, maafi waan d'ibii gaargaltani re?

²⁷ Aka daraaraani bahu ilaala; inni inhojatu yokhaani woya inhod'atu; ammo waan anini isaniini jed'u, Solomonileeni guddinna ufi ch'ufa keesati aka daraara kana taka woya inuyifanne.

²⁸ Ammo yo Waaqi buuyo diida ta arra jirtu ammo ta bori ibidaani gubani akana uyise, hagasi ira isani inuyisu? D'ugefachaani teesani waan diqo d'uguma.

²⁹ Tanaafi waan nyaattani d'uddani qulqulltani imudamiina.

³⁰ Wonti akanatiifi nami Waaqa imbeenne ch'ufti waan akana kana barbaada. Abbaani keesani aka isani waan akasi feetani imbeekha.

³¹ Isani ammo qara Finna isaa barbaada, duuba wonti kuni ch'ufti teesani taati.

Hori gubbaa

³² Insodaatiina, gumi diqo! Wonti akanatiifi Abbaani keesani Finna isaa isanii kennu fed'a.

³³ Waan qabdani gurgura, eebaani wo namaa kenna. Subba indulomane mid'aafad'a, hori gubba jiru ka inhobaamne olkeyad'a, fulla hattuuni iti ind'iaanne yokhaani fulla bilaachi imballeesine.

³⁴ Wonti akanatiifi fulla horiini keesani jiru garaani keesanileeni jira.

Hojattu ta eeddu

³⁵ Mart'o teesani mart'ifad'a, ifsa keesani bobeefad'a;

³⁶ aka hojattu abba isaani ka fuud'a galu worrati eeddu taha, aka hojja inni gale balbala d'ad'au bananiifi.

³⁷ Ayyaana hojattu suni ta abbaani yo gale kurfo argu! D'uguma, waan anini isaniini jed'u, inni mart'ifate worra teteesise, d'ufe gololcha.

³⁸ Yo inni halkani d'ufe yokhaani ganama d'ufe, akasi worra arge, ayyaana hojattu suni.

³⁹ Ammalle waan kana beekha, Abbaani mana ato sila hojja hattuuni d'uftu beekhe ineega, aka mana isaa nama ch'absu d'owu.

⁴⁰ Isanileeni kurfo taha; wonti akanatiifi Ilmi Nama, ato isani imbeekane d'ufa.

Mammaasa hojattu d'ugaafi d'ara

⁴¹ Petroni waan jed'eeni, Aabbo, mammaasa kana atini nu ch'allati himta mo nama ch'ufa?

⁴² Duuba Aabbooni waan jed'eeni, Gololchituuni qalbi qabdu ta abba ufi guute eennu re? Inni ka abbaani isaa waan ch'ufa harka isati kenne, hojattu d'ibi gololchi jed'uuni.

⁴³ Ayyaana hojattu suni ka abbaani, yo gale, isa akasi tolchu argu.

⁴⁴ D'uguma, waan anini isaniini jed'u, inni gudda hori ufi ch'ufa namicha suni tolcha.

⁴⁵ Ammo yo hojattuuni, abbaani kiyya yayu ture jette, tissele d'ibi ta d'iiratifi ta uwale d'aanicha iti kae, nyaate d'uge machae,

⁴⁶ abbaani hojattu suni guyya inni insehannefi hojja inni imbeenne d'ufe aka male isa d'aane, aka jara d'ugefacha inqamne tolcha.

⁴⁷ Hojattuuni fed'i abba ufi beete ammo inguutiini d'aanicha gudda argati.

⁴⁸ Ammo hojattuuni imbeenne, ta waan d'aanicha male tolchitu, d'aanicha diqa argati. Nama waan guddo iti kennani waan guddo ira fed'ani; ka waan guddo harka isati kennani waan hagasi iraa guddo iraa fed'ani.

Fohacha jabdu

⁴⁹ Anini ibida lafati buusu d'ufe, ato sila qara bobae ira dansa!

⁵⁰ Anini batiso argachu male qaba; haga argad'uti akamiini gaargala kana keesa baha!

⁵¹ Waan anini nagaya lafaani d'ufe seetani? Hiyyo, akasiiniti, ammo nama gargari baasu d'ufe.

⁵² Armaa achi mana toko keesa nami shani gargari qoodama, moga toko nama lama, taani sadi.

⁵³ Abbaafi ilmi gargari bahani, haad'afi intalti gargari bahani intalafi haati gargari bahani; ammalle niiti ilmaatiifi haati isaaleeni gargari bahani.

Hubacha waan ammatana

⁵⁴ Ammalle Yesoni waan gumiini jed'e, Hojja dumansa ila galchuuti argitani, Bokeeni irooba jettani, duuba bokeeni irooba.

⁵⁵ Ammalle hojja bubbeeni gama bita d'oofte, Lafti guddo owiti jettani, yoosi inowiti.

⁵⁶ Isani kiyyibdoole! Waan lafatiifi ka gubba himu imbeetani; ammo akami waan ammatani himu dad'abdani re?

Kajella ufi eegad'a

⁵⁷ Isani waan d'uga maafi beekhu dad'abdani?

⁵⁸ Hojja nama si kajellu woliini gara jaarsa qorsuma yaatani, haga dandeetani wold'aqa kara keesati, aka inni jaarsa qorsuma durati si inhirkimne yokhaani guddaani qorsuma harka gudda askartiti si inkenine ammalle guddaani askarti si inhiinne.

⁵⁹ Waan anini siini jed'u, Atini keesaa imbaatu, haga gati tante ch'ufa baaftuuti.