Luqaas 11 - KITAABA WAAQA

¹ Gaafa toko Yesoni fulla tokoti Waaqa kad'ate jennaani nami toko waan jed'eeni, Aabbo, aka Waaqa kad'atani nu barsiisi, akuma Yohanani jara ufi barsiise.

² Yesoni waan jed'eeni, Hojja kad'attani waan jettani, Aabbo, maqa kanke qulqullo ha guddisani; finni kanke ha d'ufu

³ liqimsa teenna guyya ch'ufa nuu kennni.

⁴ Ch'ubbu teenna nu araarami, aka nuleeni nama nuti ch'ubbame araaramnu. Ilaalacha nutiini ind'ufiini.

⁵ Yesoni waan jara ufitiini jed'e, fakeenna, Yo nami toko isani keesa halkani guddo mana jaala ufi d'aqe waan jed'uuni, Jaali, qit'a sadi naa kenni.

⁶ Keessuma tokoti ammumatana nati gore, ammo anini waan iti kennu inqabu.

⁷ Ammalle yo namichi mana keesa jiru kaani, Aabbo na ingaargalchiini balbala yayu ch'ufani, anaafi ijoolleeni tiyya ya ramne, anini kae woma siti kennu indandau isaani jed'e.

⁸ Maal duuba? Woni anini jed'u, inni yo kae, maro nami kaani jaala isaatiifi woi isaa kennu d'ibaatele, maro fokd'aba isaatiifi kae waan inni fed'u ch'ufa isaa kenna.

⁹ Tanaafi waan anini isaniini jed'u, Kad'ad'a, inargattani; barbaada, inargitani; d'ad'aa, balbala isanii banani.

¹⁰ Wonti akanatiifi nami wo kad'atu ch'ufti inargata, nami woi barbaadu, inarga; nami balbala d'ad'aule duraa banani.

¹¹ Abba kamiti isani keesa, yo ilmi isaa qurt'umi kad'ate bofa kennaafi?

¹² Yokhaani yo inni okhokaani kad'ate qaanjibu kennaafi?

¹³ Yoosi, yo isani nami hamamaani, waan dansa ilmaani teesani kennu beetani, maro hagami hagasi ira Abbaani gubbaa Lubbu Qulqullo jara isa kad'atu kenna?

Waan Yesotiifi Beelzebuli

¹⁴ Yesoni tae jinni duuda baasu jira; jinniini baanaani namichi duudani kaani dubbate, gumileeni guddo mamte.

¹⁵ Ammo nami gari waan jed'e, Inni jabeenna Beelzebuli, gudda jinnitiini jinni baasa.

¹⁶ Ammalle nami gari, aka isa ilaalatu akheekha gubba isa ira barbaade.

¹⁷ Ammo Yesoni herega worraa beennaani waan jed'eeni, Lafti gargari qoodamte ch'ufti imbaddi; manileeni yo gargari qoodame injiga.

¹⁸ Guddinni Sheet'ana, yo inni gargari qoodame, akamiini ejata? Isani, Atini jinni jabeenna Beelzebulitiini baafta naani jettani.

¹⁹ Yo d'uguma anini jinni jabeenna Beelzebulitiini baase, ilmaani teesani jabeenna eennutiini baafti re? Ilmaanuma teesaniti aka isani wollaala tolchitani nama agarsiisa!

²⁰ Ammo, yo anini quba Waaqatiini jinni baase, d'uguma Finni Waaqa ya isaniti d'ufe.

²¹ Yo nami jabaani, ka woraana qabu, mana ufi eege horiini isaa nagaya qaba.

²² Ammo yo nami isa ira jaba d'ufe isa dabsate, inni woraana abbaani kaani d'aabatu kaani isa iraa boojia.

²³ Nami goli tiyya intahiini nyaapa kiyya; nami na qarqaare na woliini woltinguure ya firfirse.

Waan deebia jinni

²⁴ Eegi jinniini hamtuuni nama keesaa baate, isiini lafa godduti dabarte fulla boqota barbaaddi; d'amnaani waan jettu, Mana kiyya ka bahefiti deebia.

²⁵ Deebinaani mana harani mid'aasani agarti.

²⁶ Jennaani biraa deemte, jinni torba d'ibi ta isi ira hamtu fuute, woliini duudani keesa qubatani. Jireenni namicha kaani ka ammaa ka duri ira hama.

²⁷ Ato Yesoni dubbi tana dubbatu, niitiini toko gumi keesa iti lalabde waan jetteeni, Garaa si d'aleefi harmi atini hoote ha eeba argatu!

²⁸ Ammo waan Yesoni jed'eeni, Nami dubbi Waaqa d'agaye guutu, ha hagami eeba argatu!

Barbaada akheekha

²⁹ Gumiini iti daramnaani, inni waan jed'e, D'alooti kuni d'aloota hama! Akheekha barbaada, ammo akheekha iti inkennani, ka Yona male.

³⁰ Akuma Yonaani akheekha jara Ninawiti tahe, akasuma Ilmi Namaleeni d'aloota kana akheekha taha.

³¹ Guyya qorsuma hayyitiini lafa Shebaleeni kaate d'aloota kana himatti. Wonti akanatiifi isiini muumme lafati d'ufte aka qarooma Solomoni d'ageetu; ammo hubad'a, nama Solomoni ira jirtu arma jira.

³² Guyya qorsuma jari Ninawi kae isani himata. Wonti akanatiifi worri dubbi Yona d'ageennaani daba iraa deebie; ammo hubad'a, nama Yona ira jiruti arma jira.

Ifsaafi dukana

³³ Nami ifsa bobeese d'ossu yokhaani okote jala kayu injiru, ammo gubba kaya, aka nami mana seenu ch'ufti ifsa argu.

³⁴ Ifsaani nafaa ila; yo ilti tante qulqullo taate, nafi kanke ch'ufti ifsa qaba; ammo yo hamaatte nafi kanke ch'ufti indukanaa.

³⁵ Tanaafi eegad'u, aka ifsaani si keesa jiru dukana intaane.

³⁶ Duuba yo nafi kanke ch'ufti ifsa qabaate fullaani diqoole dukanooftu injirre, nafi ch'ufti ifsa qaba, aka waan ifsaani guddo siti ifsu.

Yesoni waan jara Seera beekhufi Farisayo hima

³⁷ Ato Yesoni dubbatu namichi Farisayo toko sagaleti isa yaame; tanaafi inni mana olseene nyaataa tae.

³⁸ Namichi Farisayo kaani akasi arginaani mame, maro inni sagale durati qara harka ind'iqatiniifi.

³⁹ Aabbooni waan isaani jed'e, Isani Farisayooni mudunufi qori gama ala ch'alla d'it'ani, ammo garaa keesa sabdoomafi hameennaani guutamtani.

⁴⁰ Isani daalle, Waaquma ala mid'aaseti garaa keesale mid'aasaniti?

⁴¹ Ammo waan mudunufi qori keesa jira hiyyeeyii qooda, duuba wonti ch'ufti qulqullo isanii taati.

⁴² Gaargala keesani Farisayo! Yo isani qooda kud'anneeso ta gurbi urgotiifi waan d'ibi sagaleeni urgeesanile Waaqa baaftani, ammo d'ugaafi Waaqa lakiftani, waan kana tolchu maltani ato taanile indeene.

⁴³ Gaargala keesani, Farisayo! Barch'uma ch'ufa ira dansa mana Waaqa iti kad'atani keesati feetani, ammalle aka gabaya keesati nagaya isani fuud'ani jaalattani.

⁴⁴ Gaargala keesani! Isani akuma awaala imullanne, ka nami ato imbeenne ira yau jirtani.

⁴⁵ Namichi Seera beekhu toko waan jed'eeni, Aabbo, atini yo akasi jettu nule miid'u jirta.

⁴⁶ Yesoni waan jed'eeni, Gaargala keesani, isani jara Seera beekhu! Ulfinna gudda nama, baachiftani, ammo ufi ulfinna suni quba tokoleeni intut'ani.

⁴⁷ Gaargala keesani! Isani awaala raaga ababooti teesani fitt'e ijaartani.

⁴⁸ Duuba isanileeni waan ababooti teesani taate quuftani; worri raagoota ijeese, isani awaala ijaartaniifi.

⁴⁹ Tanaafi Qalbiini Waaqaleeni waan jette, Anini raagafi ergattu worrati erga; nama gari ijeesani, ka gari gaargalchani.

⁵⁰ Tanaafi d'iiga raagoota ch'ufa, ta haga lafti uumamte ijeesani, d'aloota kana iraa fed'ani,

⁵¹ haga d'iiga Habilitiifi haga d'iiga Zekaria, ka jiddu fulla sorio iti qalaniifi fulla qulqulloti ijeesani. Ee, waan anini jed'u, d'iiga ch'ufa d'aloota kana iraa fed'ani.

⁵² Gaargala keesani, jara Seera beekhu! Fura balbala qorsuma fuutani; ufii seenu diddani, nama seenu fed'ule d'owartani.

⁵³ Inni achi deemnaani, jara Seera beekhufi Farisayooni guddo isa goyeesani waan heddu isa gaafatani,

⁵⁴ aka gaadani dubbi afaani isaatiini isa qabani.