Luqaas 10 - KITAABA WAAQA

¹ Eegi waan kana Aabbooni nama torbaatami lama d'ibi fohate, lama lamaani lafa inni d'aqu fed'u ch'ufa ufi dura erge.

² Inni waan worraani jed'e, Mid'aani murani guddo, ammo nami muru diqa; tanaafi abba mid'aani kad'ad'a, aka nama mid'aani muru oobruti ergu.

³ Kara qabad'a, anini aka ilmoole hooliye yeyi keesa isani erga.

⁴ Borsa imfud'atiina, subba yokhaani kopele, nama karaati argitani nagaya imfud'iina.

⁵ Mana seentani ch'ufaani, Waaqi nagaya isani kenniina jed'a.

⁶ Yo nami nagaya fed'u achi jiraate, nageenni keesani isa woliini taa; ammo yo injirre isaniti deebia.

⁷ Manuma suni keesa tataa, waan isanii kennani ch'ufa nyaad'a d'uga, wonti akanatiifi nami wo hojatu wo argachu male. Mana d'ibi induudiina.

⁸ Dira duuddani ch'ufa yo isani yaamani, waan isanii kennani ch'ufa soorad'a;

⁹ nama fayya intahiini fayyisa, Finni Waaqa la isaniti d'iaate jed'aani.

¹⁰ Ammo dira keessumooma ira inargatiini ch'ufa, kara isa gula yaa, waan jettani,

¹¹ Awaara dira keesani ta faana teennati qabatte nu isaniti hat'aanna; ammo waan kana beekha, Finni Waaqa ya d'iaate.

¹² Waan anini isaniti himu, Guyya Muumme diri Sodoma dira suni ira gooma.

Gaargala dira ind'ugefanne

¹³ Gaargala kanke dira Korazini! Gaargala kanke dira Bethsaida! Ato sila huji gugurdo isani keesati tolchani suni Tirofi Sidoni keesati tolchani, worri arra kale daba iraa deebie ch'arqi naqate daara ufi indibiini.

¹⁴ Ammo gaafa qorsuma Waaqi fulla isaanii nahu, dira Tirotiifi ka Sidoniti naha.

¹⁵ Dira Kapernaumu, ehayi, gubbati ufi olfuud'u feeta? Ammo qile si buusani!

¹⁶ Nami isani d'agayu nale d'agaya, ka isani didu nale dida; ammalle ka na didu nama na erge dida.

Deebia jara torbaatama

¹⁷ Jari torbaatami Lamaani kaani gammadaani gale waan jed'e Aabbo, jinnileeni nuu sarmiti maqa kanketiini.

¹⁸ Inni waan jed'eeni, Anini Sheet'ana aka angaasu gubba gadi buu arge.

¹⁹ Ch'aqasa anini yayu humna isanii kenne aka bofafi qaanjibu ira ejaanjatani, ammalle irre nyaapa sunile ira ejaanjateniini; wonti tokoleeni isani intut'u.

²⁰ Ammo waan jinniini isani sarmitufi ingammadina, ammo maro maqa keesani gubbati t'aafanifi gammada.

Yesoni galata Waaqaa deebisa

²¹ Hojuma suni inni gammada Lubbu Qulqullotiini waan jed'e, Galata si deebisa, Aabbo, Abba lafafi gubba, waan atini waan kana qarofi nama wo beekhu d'ossite ijoolle didiqo garsiifteefi. Ee, Aabbo, wonti akana kuni fed'i tanteti.

²² Abbaani kiyya yayu waan ch'ufa nati kenne: nami tokoleeni ka Ilma beekhu injiru Abba male, ammalle ka Abba beekhu injiru Ilmaafi nama Ilmi garsiisu fed'u male.

²³ Jennaani Yesoni jara ufiti garagale d'ossaani waan jed'eeni, Ayyaana ila waan isani argitani argatu.

²⁴ Wonti akanatiifi anini isaniti hima, raagootafi hayyooti hedduuni waan isani argitani kana argu feete ammo d'ad'abde, ammalle waan isani d'ageetani kana d'agayu feete ammo d'abde.

Mammaasa nama Samaria dansa toko

²⁵ Jennaani namichi Seera beekhu toko, aka sila Yeso ilaalatu, olkae waan jed'eeni, Aabbo, maal tolchu male aka jireenna hegeri argad'u?

²⁶ Yesoni waan jed'eeni, Seera keesati maal t'aafani? Maal soomta?

²⁷ Inni waan jed'eeni, Abba Waaqa kanke jaalad'u, garaa kanke ch'ufaani, lubbu tante ch'ufaani, jabeenna kanke ch'ufaani, qalbi tante ch'ufaani; ammalle nama ch'ufa aka ufi jaalatu jaalad'u.

²⁸ Inni waan jed'eeni, Aka dansa deebifte, akana tolchi, injiraata.

²⁹ Ammo inni ufi d'ugeesu fed'e waan Yesoni jed'e, Oboleesi kiyya eenufa?

³⁰ Yesoni waan jed'eeni, Nami toko Yerusalemu bahe Yeriko d'aqe; karaati harka shifta keesa, seene, woya isa ira baafatani, mata d'oosani, isa ch'ichu gahe lakisani kaani biraa yaani.

³¹ Aka ayyaana qaallichi toko kara suni bahe; isa arginaani d'aatu dabre.

³² Akasuma namichi Lawi tokoleeni fulla isaa geennaani arge bira dabre.

³³ Ammo namichi lafa Samaria toko, ato kara deemu, isaani bahe; isa arge jennaani naheefi.

³⁴ Isati d'iaate, mada isaa hid'e, d'ad'afi qorsa dibe gaange ufi gubbaa kaye, Mana keessumatini d'ufe isa qorqorate.

³⁵ Boriyya qarsi lama baase abba manati kenne waan jed'eeni, isa qorqorad'u, hori atini iti darte deebieti sii baasa.

³⁶ Worra sadeeni kana keesa eenuti namicha harka shifta seene suni jaalate seeta?

³⁷ Inni waan jed'eeni, Namicha naheefi suni seha. Jennaani Yesoni waan jed'eeni, Beeni, atileeni akasi tolchi.

Marthafi Mariamu

³⁸ Ato yaanu, Yesoni olla toko seene; niitiini toko ta Martha jed'ani mana ufiti isa yaamte.

³⁹ Isiini oboleeti qabdi ta Mariamu jed'ani; Mariamuni miila Yeso jala teete dubbi isaa ch'aqafte.

⁴⁰ Ammo Marthani waan gololaatiini gaargalte; duuba isati d'ufte waan jetteeni, Aabbo, aka oboleetiini tiyya waan golola ch'ufa nati lakifte ingartu? Deemi isi qarqaari jed'iini.

⁴¹ Ammo Aabbooni waan jed'eeni, Martha, Martha, atini waan hedduuni ufi gaargalchita,

⁴² ammo waan toko ch'alla fed'ani. Mariamuni yayu waan ira dansa fohatte, isi iraa imfuud'ani.