Lawi 21 - KITAABA WAAQA

Aada qaaloleeni keesati bulu malte

¹ AABBO Waaqi waan Musani jed'e, Waan atini qaalole ilmaani Harunitini jettu, qaalluuni tokoleeni fulla nama due deeme ufi int'ureesini,

² yo haad'afi abbaafi ilma isaatiifi intala isaa taate male,

³ yokhaani oboleesafi obeeleti isaa ta dubra ta infuud'ini ta mana isaati galtu taate male.

⁴ Inni soddowaani isaa ta doote jed'e ufi int'ureesini.

⁵ Qaalluuni tokoleeni mata isaa fulla tokole haadate yokhaani areedale haadate, nafale ufi ch'ich'ire aka bohu ufi ingarsiisini.

⁶ Inni Waaqa isaa durati qulqullo tahu male, maqa isaa ch'eersu himmalle. Inni nama sorio gubani ta sagale AABBO Waaqa, Waaqaa baasu, tanaafi qulqullo tahu male.

⁷ Qaalluuni sharmut'a yokhaani nad'eeni qara fuud'ani fuud'u himmalle; inni Waaqa isaati qulqullo.

⁸ Biyyiti nama suni ha aka inni qulqullo hereddu, wonti akanatiifi inni nama sagale Waaqa keesani baasu. Anini AABBO Waaqa qulqullo, worra kiyyale inqulqulleesa.

⁹ Hojja dubarti ufi t'ureesite sharmut'a taate, isiini yayu abba ufi ch'eersite balleesite; isi ha gubani ijeesani.

¹⁰ Qaalliicha gudda yayu d'ad'ani muudani eebisani woya qaallu iti naqani, tanaafi inni rifeensa isaa gindeese, yokhaani woya ufi tatarsaase nama due bohu himmalle.

¹¹ Inni fulla reefa tokole d'aqe ufi t'ureesu himmalle, ato abbaafi haad'a isaale taate;

¹² ammalle inni fulla qulqullo Waaqa isaa keesa bahe int'ureesini; wonti akanatiifi isa yayu d'ad'ani muudani Waaqa durati eebisani. Anini AABBO Waaqa.

¹³ Inni ha dubra take nami bira ingahiini fuud'u

¹⁴ nad'eeni d'iirsi iraa duefi ta d'iirse lakiseefi sharmut'a inni infuud'ini. Inni dubra gosa isaa ch'alla fuud'u male.

¹⁵ Yo inni akasi intahini, ilmaani isaa ta sila qulqullo tahu malte int'uroofti. Anini AABBO Waaqa, ka isa qulqulleese, qaallu gudda tolche.

¹⁶ AABBO Waaqa waan Musani jed'e,

¹⁷ Waan atini Harunini jettu: Nami d'aloota kanketi haga jiru jireenna, ka nafi isaa aabo qabu, tokoleeni fulla qulqullooti d'iaate Waaqaa sagale imbaasini.

^18-20 Nami aabo qabu, balla taanaani, naafa taanaani nama fuuli aka ira gore miili naafa taanaani, nama farra goobo qabu taanaani, geefarra taanaani, nama ilti kalabsu qabdu taanaani, nama nafi d'iira ka saala mamadae malaani keesa yau taanaani, yokhaani ka kolaasani taanaani, nami akana kunini tokoleeni fulla qulqullooti d'iaate sorio Waaqa imbaasini.

²¹ Nami d'aloota qaallu Haruni ka nafi isa aabo qabu sagale gube AABBO Waaqa baasu himmalle. Inni aabo qabo, tanaafi Waaqati d'iaate sagale baasufi himmalle.

²² Nami akasi suni sagale Waaqa isaa dandae nyaata, sagale qulqullo taanaani yokhaani ta ira qulqullo taanaanile.

²³ Ammo waan nafi isaa aabo qabuufi inni golla qulqulloofi fulla sorio iti qalaniti ind'atini inni waan qulqullo kana t'ureesu himmalle wonti akanatiifi anini AABBO Waaqa, ka waan suni ch'ufa qulqulleesu.

²⁴ Duuba wonti Musani Harunifi ilmaani isaatiifi worra Israeli ch'ufaani jed'e tana.