Lawi 1 - KITAABA WAAQA

Sorio gubani baasani

¹ AABBO Waaqi Waaro Woyyuma keesaa Musa yaame waan jed'eeni,

² Waan atini worra Israelitini jettu: Yo nami keesani sorio AABBO Waaqaa baasu d'ufu, looni isaa taanaani, ree taanaani ha keesaa wobaasu.

³ Hojja inni looni isaa keesa korma gubani sorio baasani baase, kormi suni ha korma aabo inqamne tahu. Korma suni ha balbala Waaro Woyyuma duraani d'ufu, aka AABBO Waaqi ee jed'e isa ira fud'atu.

⁴ Inni ha harka isaa korma gubani sorio baasani suni ira keeyate hariratuti, aka akasiini ch'ubbu isaa araaramanifi,

⁵ Inni ha achiti korma suni AABBO Waaqa durati gorau, duuba qaaloleeni ilmaani Haruni ha d'iiga isaa fuute, waan aka mesa ka sorio irati qalani, ka fulla balbala Waaro Woyyuma jiru gama afraanitu fifit'u.

⁶ Eegi suni ha korma suni qale fooni gargari ch'iru.

⁷ Duuba qaaloleeni taani ha qoraani fuute waan aka mesa suni irati ibida bobeesitu.

⁸ Jennaani worri ka fooni gargari ch'irani kaani, matafi d'ad'ale woliini fuud'e ibida gubba kayuti.

⁹ Duuba namichi kaani ha miha garaatifi fooni lukha d'iquuti, ammo qaallichi ha fooni kaani ch'ufa waan aka mesa kaani irati gubuti aka akasiini ch'inch'aani waan gubani suni AABBO Waaqa gammachiiftu.

¹⁰ Yo namichi suni ree isaa sorio baasu fed'e, wonti inni baasu suni ha korma aabo inqamne tatuuti.

¹¹ Inni waan suni ha waan mesa fakaata kaani gama mirgati AABBO Waaqa durati gorau, duuba qaaloleeni ilmaani Haruni ha d'iiga isaa suni waan aka mesa jira kaani gama afraaniti fifit'u.

¹² Eegi inni qale fooni gargari ch'ire qaallichi ha fooni suni ch'ufa matafi d'ad'ale woliini fuud'e, waan aka mesa suni ira kayuti.

¹³ Duuba namichi ka miha garaatifi fooni lukha d'iquuti, ammo qaallichi ha fooni kaani ch'ufa fuud'e mesa irati gubuti. Aka akasiini ch'inch'aani waan gubani suni AABBO Waaqa gammachiiftu.

¹⁴ Yo wonti inni AABBO Waaqa gube sorio baasu simpirre taate, simpirreeni suni ha sabaliisa taatu, yokhaani ilmaani isaa.

¹⁵ Duuba qaallichi ha fulla mesa sunini d'ufe, mata miich'ire iraa kute, waan aka mesa suni irati gubuti, duuba d'iiga ha d'aatu waan aka mesa suniti keesaa baasaniti.

¹⁶ Ammalle ha garaachafi waan keesa jira fuud'e, waan mesa fakaata kaani gama ilaboru fulla daara iti jissaniti gatuti.

¹⁷ Inni ha koola lachu fuud'e, nafa isaa gargari tarsaasu, ka koola suni iraa imbuqimne, ammalle ha fooni suni waan aka mesa kaani irati gubuti, aka akasiini ch'inch'aani waan gubani suni AABBO Waaqa gammachiiftu.