Jaallaboota 9 - KITAABA WAAQA1 Ilmi Gideoni, ka Abimeleki jed'ani gara dira Shekemu d'aqe, fulla fiit'aani haad'a isaa teetu, waan jed'eeni, 2 Waan isani worra Shekemutiini jettani, Akamiti ira isanii jira yo, ilmaani Gideoni torbatamanu isani mohatte mo, yoyu nami toko ch'allaani isani mohate? Qaabad'a, anini foonuma keesani. 3 Fiit'aani haad'a isaa dubbi tana worra Shekemuti haasoofte jennaani. Worri Shekemu waan worri wolfit'atifi ee jed'e Abimeleki gula bahe. 4 Duuba worri qarsi torbatama ta mana waaqa worra ka Baal-Berithi jed'ani keesa jirtu kenneefi. Duuba qarsi tanaani inni worra seseega toko bitate, ka isaa woliini yae. 5 Inni dira Ofra fulla mana abba isaa d'aqe, achiti d'akhuma toko gubbati oboleyaani isaa torbatama taani, ta ilmaani Gideoni, fit'e. Ammo Yothamuni, ilmi maand'ichi Gideoni, d'okhate bahe. 6 Jennaani worri Shekemutifi ka Bethmilo wolti bahe mukha gudda woyyu ka Shekemu jiru d'aqani, achiti Abimeleki hayyu tolfatani. 7 Yothamuni dubbi tana d'ageennaani gaara Gerizimu fiit'eeni bahe lalabe waan worrani jed'e, worri Shekemu, na ch'aqasa, aka Waaqileeni isani ch'aqasu! 8 Duri, mukhi wolti bahe hayyu muude fohate. Waan ejersaani jed'ani, Hayyu keenna tahi. 9 Ejersi waan jed'e, Yoyu hayyu keesaani tahe, anini d'ad'a mid'aani kiyya keesaa bahu, ka Waaqafi naamani ulfeesani deebie namaa inkennu. 10 Jennaani mukeeni taani waan odaani jette yoosi, atini kooti, hayyu keenna tahi. 11 Ammo odaani waan jed'eeni, Yoyu hayyu keesani tahe, anini mid'aani kiyya miyao deebie imbaasu. 12 Jennaani mukeeni waan zabibuni jette, yoosi atini kooti, hayyu keenna tahi. 13 Ammo zabibuni waan jette, yoyu hayyu keesani tahe, anini daad'i, tiyya ta namaafi Waaqale gammachiiftu, deebie namaa inkennu. 14 Jennaani mukeeni ch'ufti sabansaani waan jette, yoosi, atini kooti, hayyu keenna tahi. 15 Sabansi waan jed'eeni, Yo d'uguma hayyu keesaani na tolchu feetani, koota, gaadisa kiyya jala boqod'a. Yo isani diddani, ibidi qoraati dame tiyya keesaa bahe hind'eesa Lebanoni gube balleesa. 16 Amma duuba, isaani gaafa Abimeleki hayyu tolchitani, waan d'uga gula tolchitani seetani? Isani d'uguma ya Gideoni saalfatani, waan inni isaani tolche gula worra isaa qaabatani ulfeesitani? 17 Qaabad'a, aka abbaani kiyya isanii kalche, isaani jed'e lubbu ufi jibbaate, harka worra Midiani keesaa isaani baase. 18 Ammo arra worra abba kiyyati garagaltani, ilmaani isaa nama torbatama d'akha toko irati fit'ani — ammalle waan Abimelekini ka abbaani kiyya tissiti ira d'ale fiit'a teesani taheefi, isani hayyu Shekemu tolchitani. 19 Amma tana, yo d'uguma wonti isaani Gideonifi worra isaa tolchitani d'ugaa taate, wald'aqa nagayaani woliini taa. 20 Ammo yo d'uga intahini ibidi Abimeleki iraa bobau ha worra Shekemutifi Bethmilo gubu. Ibidi worra Shekemutifi worra Bethmilo ira bobau ha Abimeleki gubuti. 21 Jennaani waan oboleesa ufi Abimeleki sodaatufi, Jothamuni baqate Beerite gale. 22 Abimelekini ganna sadi Israeli mohate. 23 Eegi suni Waaqi Abimelekifi worra Shekemu wold'absiise, worri garagale nyaapa isaati tahe. 24 Wonti woni kuni ch'ufti taateefi aka Abimelekifi worri Shekemu, ka gaafa inni ilmaani torbatama ta Gideoni fit'e wahelchefi gati ch'ubbu ufii argatu. 25 Worri Shekemu, worra Abimeleki gaadu, fiit'e gaara gubba kaye, duuba worri nama kara suni bahu ch'ufa saame. Dubbi tana Abimelekiti himani. 26 Jennaani Gaalini, ilmi Ebedi, Oboleyaani isaa woliini Shekemu d'ufe, duuba worri Shekemuleni isaa d'ugeefate gula bahe. 27 Worri ch'ufti oobru zabibu yae mid'aani guure, daad'i ira mid'aase jila tolfate. Jennaani mana waaqa isaani d'aqani, achiti nyaatani d'ugani Abimeleki hamatani. 28 Gaalini waan worraani jed'e, Isii nu d'iira akamititi Shekemu keesaa d'alate? Nu maafi Abimeleki hojanna? Inni qara eenu? Ilma Gideoni! Zebulini dubbi isaa gula deema, ammo nu maafi isa hojanna? Ababo keesani Hamori, ka gochiti teesani iraa baate gula baatani ho? 29 D'iiro ato anini sila isaani dura deeme, Abimeleki isaani duraa boola kaya! Sila waan jed'uuni, duula kanke nama iti darad'u, kooti woli haana! 30 Zebulini, guddaani dira suni, jecha Gaali d'ageennaani guddo dallane. 31 Nama Abimeleki ka Aruma jiruti erge waan jed'eeni Gaali ilmi Ebalitifi oboleyaani isaa yayu Shekemu d'ufani, duuba worri dira seenu si d'owa. 32 Duuba siifi worri kanke waan taatani, halkaniini yaa, oobru keesati d'okhad'a. 33 Bori yo biiftuuni baatu kaa, ato worri isani imbeekanne dira marsa had'a. Duuba hojja Gaalifi d'iirti isaa d'owa d'ufte, haga dandeetani ch'ufa had'a! 34 Jennaani Abimelekifi nami isaa ch'ufti halkaniini kaani, fulla afuriti gargari bahani, dira Shekemu d'okhatani jala bulani. 35 Abimelekifi nami isaa Gaali ka fullo dira suni keesa eju argani jennaani fulla iti d'okhatani taani diidati gabahani. 36 Gaalini worra arge jennaani waan Zebulini jed'e, Laali! Nama d'iira ka fiit'e gaara ira gadi oriu! Zebulini waan jed'eeni, Laki, sunini namaaniti, gaandiduma gaara iraati. 37 Ammalle Gaalini waan jed'eeni me, kuno laali! Nama fiit'e gaara ira gubuu! Hagi tokoleeni kara mukha gudda worra wohimu kaanini d'ufuti jira. 38 Jennaani Zebulini waan jed'eeni, Kiyyibi kanke kaana me amma? Nami waan nu Abimeleki hojannufi gaafate siiniti? Worri atini reefu tufate kananiti? Amma beeni deemi, worra had'i! 39 Jennaani Gaalini nama isaa fud'ate Abimeleki had'u d'aqe. 40 Gaalini dabsatani jennaani kae baqate, Abimelekileeni isaa reebe. Nami hedduni balbala dira keesati madae. 41 Abimelekini Aruma qubate, Zebulileeni Gaalifi oboleyaani, isaa Shekemu keesaa had'e balleese worri deebie achi inteenne. 42 Boriyyaate Abimelekini worra Shekemu ka alati kurfefate yau d'agaye, 43 duuba nama isaa fud'ate ch'ibra fulla saditi gargari qoode, alati d'okhate worra eege. Inni worra dira keesa ga yau arginaani, aka worra fit'u fulla iti d'okhate gabahe. 44 Ato Abimelekifi duuli isaa fullo dira suni keesati sime worra deebiu d'owu, ch'ibrani, lamaani taani biyya Shekemu ta ala jirtu taani haate hobaafte. 45 Guyya suni ch'ufa woli had'ani, wolballeesani. Abimelekini nama dira suni ch'ufa fit'e dira qabate, maneeni ch'ufa ch'ach'abse gargari jisse, biyye lafale ch'ufa sooda iti fach'aase. 46 Worri gugurdaani ka mana jaba nyaapa iti d'okhatani ka Shekemu keesa jiru, waan kana d'agaye, mana jaba ka waaqa worraa ka Baal-Berithi jed'aniti baqate. 47 Aka worri suni ch'ufti achiti wolti bahe Abimelekiti himnaani, 48 Inni gaara Salmoni worra isaa woliini kore, d'agaraani dame mukha kute, gurmu irati baate. Ammalle waan worra isaatini jed'e, Hurrisa, waan anini tolche kana tolcha. 49 Jennaani nami ch'ufti dame mukha kutate, Abimeleki gula deemani, dame mukha taani ch'ufa mana jaba kaaniti tuulani, ibada iti kayani worra mana jaba suni keesa jiru, d'iirafi nad'eeni ka haga kuma toko, gubani hobaasani. 50 Jennaani Abimelekini Thebezi d'aqe, dira suni marse qabe. 51 Achile mana jaba d'eera nyaapa iti d'okhatani jira nami dira suni keesa jiru, d'iirafi nad'eeleni, mana suniti baqatani ufiti ch'ufaani, gubba olkorani. 52 Abimelekini mana d'eera suni had'u fed'e duuba aka mana gubu balbalati d'iaate. 53 Ammo niitiini toko, ta mana suni gubba jirtu, d'akha daakhu gubbaa mata isaa ira buufte borosite. 54 Jennaani inni hurrise, gurba miha isaa ka lola baatu yaame waan jed'eeni, Goraade tante qalqala keesaa luqisi, na ijeesi. Aka nami, nad'eeniti ijeese injenne. Jennaani gurbaani suni tumaata tokooni ijeese. 55 Worri Israeli, aka Abimelekini due arginaani, kaani galani. 56 Kara kanaani Waaqi Abimeleki gati daba isaa, ka inni abba ufuti dabe, gaafa oboleyaani isaa ta torbatama fit'e baaseefi. 57 Ammalle Waaqi worra Shekemu ch'ufa ch'ubbu ira deebise, akuma Yothamuni, ilmi Gideoni qara jed'e, gaafa worra abaare kaani. |
Borana Bible © Bible Society of Kenya, 2019.
Bible Society of Kenya