Jaallaboota 4 - KITAABA WAAQA

¹ Eegi Ehudini due, worri Israeli ammalle AABBO Waaqa durati waan hamtu tahe.

² Tanaafi AABBO Waaqi Yabini, hayyu Kanaani, ka dira Hazori keesa tau, worrati lakise. Guddaani Askarti isaa gaafasi Sisera, ka Harosheth-Hagoimu tau.

³ Yabinini gaari sibiila d'ibba sagali qaba, duuba inni worra Israeli ganna diddama dabse, naasu male mohate. Jennaani worri Israeli AABBO Waaqati bohe qarqaarsa kad'ate.

⁴ Duuba Deborani, niitiini Lapidothi, raaga, ammalle gaafasi isiini jaallaba worra Israeliti.

⁵ Isiini meet'i toko jala teete jiddu Ramafi Betheli, lafa gareeni ta Efraimu keesa, worri Israeli achiti dubbii iti yaa.

⁶ Guyya toko isiini Baraka, ilma Abinoamu, dira Kadeshi ka lafa Naftali keesa yaamte waan jetteeni, AABBO Waaqi Israeli waan sini jed'u, Beeni, nama kunki kud'ani gosa Naftalitifi ta Zabuloni keesaa fuud'i, gaara Taboriti wolti baasi.

⁷ Anini Sisera, gudda askarti Yabini, d'ufeeni, fulla galaana Kishoniti si haasisa. Inni gaarifi askarti ufiitini d'ufa, ammo sumati dabsata.

⁸ Jennaani Barakani waan jed'eeni, Anini yo atini na woliini deemte male indeemu.

⁹ Isiini waan jetteeni, Haye, woliini yaana, ammo huji tana keesa atini diqole ulfinna inargattu, wonti akanatiifi AABBO Waaqi harka niiti d'altititi Sisera keenna. Jennaani Deborafi Baraka kaani Kadeshi woliini yaani.

¹⁰ Barakani gosa Zabulonitifi ta Naftali Kadeshiti wolti yaame, nami kunki kud'ani isa gula yae, Deboraleni isa woliini deemte.

¹¹ Duuba hojuma suni Heberini, ka gosa Keni, waaro ufi, d'aatu Kadeshi mukha gudda toko birati, fulla Saananimu d'aabate, inni qara worra gosa Keni kaani, ka ilmaani Hobabu, ka sodda Musa, biraa godaane.

¹² Siserani aka Barakani gaara Tabori kore d'agaye jennaani

¹³ gaari isaa ka d'ibba sagali ka sibiila kaanifi askarti isaa ch'ufa ta Harosheth-Hagoimu jirtu wolti yaame, galaana Kishoniti erge.

¹⁴ Jennaani Deborani waan Barakani jette, Beeni, AABBO Waaqati sini deema! Arra Sisera harka kanketi kennani. Duuba Barakani gaara Tabori ira nama kunki kud'ani ka duula woliini bue.

¹⁵ Hojja Barakani duula ufiitini worra had'e, AABBO Waaqi Siserafi gaari isaatifi duula isaa ch'ufa worerse baqachise. Siserani gaari ufi iraa bue, miilaani baqate.

¹⁶ Barakani gaarifi duula worra haga Harosheth-Hagoimu reebe duula Sisera ch'ufa hobaasani; nami tokoleeni ka hafe injiru.

¹⁷ Siserani baqate waaro Yaeli, niiti Heberi ta gosa Kennitini bahe; wonti akanatiifi hayyichi Yabini, ka Hazori, worra Heberitiini wolijaala.

¹⁸ Yaelini gabaate, Sisera yoyifate waan jetteeni, Aabbo waaro tiyya olseeni, insodaatini. Duuba inni olseene, isiini isa golla duubati d'ossite.

¹⁹ Inni waan isiini jed'e, Bisaani d'ugu naa kenni, d'eebu qaba. Isiini okhole qadaada buqifte aanani kenniteefi, duuba ammalle isa golla duubati d'ossite.

²⁰ Jennaani inni waan jed'eeni, Balbala waaro dura eji, hojja nami d'ufe, Nami arma jira? jed'e sigaafate injiru jed'iini.

²¹ Siserani guddo dad'abe aka male rafe. Jennaani Yaelini burrisafi d'isa waaroo fuute, laanuma gara isaa d'at'e, d'isa suni madditi d'oofte fulansite lafati hod'ite isa ijeefte.

²² Barakani Sisera barbaadu d'ufe jennaani, Yaelini fuula keesa deemte, yoyifate waan jetteeni, kooti, nama atini barbaadu si garsiisa. Duuba inni isi gula olseene Sisera ka due ch'iisu, ka d'isani mata isaa keesa eju arge.

²³ Duuba guyya suni AABBO Waaqi Yabini hayyicha Kanaani harka worra Israeliti kenne,

²⁴ worri isa had'uma had'e balleese.