Jaallaboota 3 - KITAABA WAAQA

¹ Tanaafi duuba AABBO Waaqi gosa gari lafa Kanaani keesati lakise, aka worra Israeli ka waan had'iisa imbeenne ilaalattu.

² Wonti inni akasi tolcheefi, aka d'alooti Israeli ka qara had'iisa imbeenne had'iisa baratu.

³ Gochiti lafa suni keesati hafte tana: dira Filisti shanani, gosa Kanaani ch'ufa, gosa Sidoni, gosa Hiti ta gaareeni Lebanoni, haga gaara Baal-Hermoni haga kaarra Hamathi teetule.

⁴ Wonti worra kana achiti lakisanifi aka Israeli ilaalatani, aka worri Seera AABBO Waaqi afaani Musatiini ababoota isaniti kenne guutu yokhaani inguunne argani.

⁵ Tanaafi worri Israeli worra Kanaanitiifi ka Hititi, ka Amoriti, ka Periziti, ka Hiviti ka Yebusile woliini qubate.

⁶ Worri worra sunini wolfuud'e waaqoota worrale kad'ate.

Othnieli

⁷ Worri Israeli AABBO Waaqa isaani ded'e, waan hamtu isa durati tolche waaqoota harkani mid'aasani, Baalifi Ashteroti, kad'atani.

⁸ Duuba AABBO Waaqi worra Israeliti dallane, harka nyaapa worraa hayyu Kushan-Rishathamu, ka Mesopotamiati lakise, inni haga ganna saddeeti worra mohate.

⁹ Jennaani worri Israeli AABBO Waaqati bohe, inni nama worra baasu iti erge. Nami sunini Othnieli, ilma Kenazi, ka oboleesa Kalebu maand'icha.

¹⁰ Inni lubbu Waaqaa argatte jaallaba Israelii tahe. Inni duula d'aqe, AABBO Waaqi hayyu Mesopotamia kaani harka isaati kenne inni isa dabsate.

¹¹ Duuba haga ganna afurtama lafti nagaya argate, eegi suni Othnielini lubbu d'abe.

Ehudi

¹² Worri Israeli ammalle Waaqa durati waan hamtu tolche. Sunifi AABBO Waaqi hayyu Egloni, ka gosa Moabu, worra Israeli ch'ufa ira jaba tolche.

¹³ Inni worra Amonitifi ka Amaleki wolti yaame, duuba wold'aqani Israeli had'ani dabsatani, dira meet'i ka Yeriko jed'ani fud'atani.

¹⁴ Duuba worri Israeli ganna kud'ani saddeeti hayyu Moabu jala tae.

¹⁵ Jennaani worri Israeli AABBO Waaqati bohe inni nama worra baasu ergeefi. Nami sunini Ehudi, ilma Gera, ka gosa Benjamini ammalle inni bitaacha. Worri Israeli Ehudi gara hayyicha Egloni damoosani erge.

¹⁶ Ehudini bilaa aflameedi ka d'eerinni isa d'und'uma toko mid'aafate, woya jala gama mirgati hid'ate.

¹⁷ Jennaani waan d'ufeeni kaani Egloni nama aka male gabbati kenne.

¹⁸ Eegi Ehudini waan suni kenneefi, inni worra damoosani d'ufeeni, gala jed'e.

¹⁹ Ammo Ehudini fulla d'akha boch'ani ka Gilgali d'aatu garagale, Egloniti deebie waan jed'eeni, Ee hayyicha, anini d'aamsa kobati siti himu qaba. Duuba hayyuuni waan hojatu ufiitini jed'e, Mana keesa gayaa! Duuba worri ch'ufti gayaae.

²⁰ Jennaani ato hayyichi mana isaa gubba fulla qabanooftu koba tau, Ehudini iti olkore waan jed'eeni, D'aamsa Waaqa ka siti himu qaba. Hayyichi olkae.

²¹ Jennaani Ehudini harka isa bitaachani bilaa gama mirgati fud'ate, hayyicha garaa isa gudda kaani keesa woraane,

²² bilai ch'ufti keesa bade, moori isaa bilaa suni duuche. Ehudini bilaa kaani garaa hayyu keesati lakise, bilai kaani dudda duubani fullae.

²³ Jennaani Ehudini gabahe, balbala ufi duubati ch'ufe qulfe,

²⁴ kae iti d'aabate. Hojattuuni d'ufte, balbala qulfi qabdu agarte waan woliini jette, Hayyuuni hegeri finch'au jirafa,

²⁵ worri haga nami nama eegu ch'ufa eege dad'abe, inni balbala imbanu argani jennaani, fura fud'atani balbala banani. Yo worri jed'e inni ufumaa due ch'iisa.

²⁶ Ehudini, ato worri tae eegu, kae d'akhaa boch'ani kaani bira bahe Serati baqate.

²⁷ Achi gaareeni Efraimutini bahe jennaani magalata d'ae, worra Israeli duulaa wolti yaame. Jennaani gaareeni suni iraa woliini gabuani,

²⁸ waan worrani jed'e, Na gula koota, AABBO Waaqi yayu nyaapa keesani ka Moabu harka keesaniti kenne. Duuba worri Ehudi gula yae, fulla worri Moabu galaana Yordanitini taaku qabe, nama tokole dabru d'owe.

²⁹ Guyya suni worri Askarti Moabu jajabdu ch'ufa nama kunki kud'ani fit'e, tokoleeni ta fiidde baate injirtu.

³⁰ Guyya suni worri Israeli worra Moabu dabsate, duuba lafti haga ganna saddeetama nagaya argate.

Shamgari

³¹ Nami eegi Ehudi jaallaba tahe Shamgari, ilma Anathi. Innileeni nama d'ibba jaa, ka Filisti, t'illoni hobaase worra Israeli baase.