Jaallaboota 2 - KITAABA WAAQA

¹ Malaikaani AABBO Waaqa Gilgali kaate, Bokimu d'at'e waan worra Israelitini jette, Anini lafa anini ababoota teesaniti kakhad'e isaniini d'ufe, waan jed'e, Anini deebie wold'aqisa isani woliini tolfad'e inch'absu.

² Isani wold'aqisa tokole nama lafa tana keesa tau woliini tolfachu himmalle, ammalle fulla worri sorio iti baasu chachabsu maltani. Ammo isani waan anini isaniini jed'e intolchine, garagaltani waan d'ibi tolchitani.

³ Duuba anini amma waan jed'u, Anini worra kana isani duraa imbaasu, worri nyaapa keesani tahe waaqooti worra ch'ufti t'urura isaniti taati.

⁴ Malaikaani dubbi tana jennaani gumiini Israeli ch'ufti lalabde boote,

⁵ tanaafi fulla suni Bokimu maqa baasani, achiti AABBO Waaqaa sorio baasani.

Duisa Yoshua

⁶ Yoshuani worra Israeli abbu kara ufi gad'iise, duuba nami ch'ufti yae qooda lafa ufi fud'achu d'aqe.

⁷ Haga Yoshuani jiru, worri Israeli AABBO Waaqa hojate, ammalle eegi inni duele haga jaaroleeni waan guddo AABBO Waaqi worra Israeliti tolche argite jirtule akasuma isaa hojatani.

⁸ Hojattuuni AABBO Waaqa Yoshuani, ilmi Nuni, ganna d'ibaafi kud'aniti due.

⁹ Duuba lafuma isaa ta qooda kennanifi keesati isaa awaalani, ta maqaani isii Timnathi Heresi jed'ani, lafa gaareeni Efraimu, ta gaara Gaashitini mirgaa.

¹⁰ D'alooti sunini ch'ufa hobae jennaani, d'alooti d'ibiini, ka worra gula d'ufe, AABBO Waaqafi waan inni gumi Israeliti tolche wollaalani.

Aka worri Israeli AABBO Waaqa lakise

¹¹ Jennaani worri Israeli waan hamtu Waaqa durati tolche Waaqoota Baali jed'ani kad'atani.

¹² Worri AABBO Waaqa ababoota isani ka lafa Misiri keesaa worra baase lakise Waaqa d'ibi ka worra worri woliini qubatu, gula yaani, durati jilbifatani, AABBO Waaqa dallansiisani.

¹³ AABBO Waaqa lakisani Baalifi Ashtorethi kad'atani.

¹⁴ Jennaani AABBO Waaqi worra guddo iti dallane, nyaapa worra saamu iti gad'iise. Nyaapi suni worra dabsate, duuba worri Israeli ufi iraa d'owu dad'abe.

¹⁵ Hojja worri nyaapa had'u d'aqu ch'ufa AABBO Waaqi worra qarqaaru dide akuma inni qara jed'e kaani; duuba akanaani worri guddo gaargale.

¹⁶ Jennaani AABBO Waaqi jaallaboota worraa kenne ka harka worra worra saamu keesaa baaftu.

¹⁷ Ammo worri jaallaboota suni ch'aqasu dide AABBO Waaqa lakisani waaqoota d'ibi gula badani, waaqoota suni kad'atani. Abbootini worraa duri dubbi AABBO Waaqa gula yaati, ammo d'alooti haarai kunini, yoosu kara suni iraa gore.

¹⁸ Hojja AABBO Waaqi jaallaba worraa kenne ch'ufa, inni jaallaba suni qarqaare, worra, haga jaallabi sunini jiru, harka nyaapaa keesaa baase. AABBO Waaqi worraa nahe, waan worra guddo dabsani worri gaargale boheefi.

¹⁹ Ammo yo jaallabi sunini duu ch'ufa worri kara duri kaaniti deebie d'aloota qara kaanile iraa hammate, Waaqa d'ibi hojatani kad'atani, aada ufi hamtu lakisu didani.

²⁰ Duuba AABBO Waaqi Israeli dallane waan jed'e, worri kunini ya wold'aqisa anini ababoota worra woliini tolfad'e ch'abse. Waan worri na ch'aqasu dideefi,

²¹ anini deebie gosa duri, gaafa Yoshuani jiru, lafa suni keesa jirtu keesaa gusse imballeesu.

²² Anini worra Israeli kana inilaalad'a aka worri kara kiyya aka ababoota worra gula deemufi yokhaani gula deemu didu arga.

²³ Duuba akanaani AABBO Waaqi gosa suni lafa keesati lakise, ka harka Yoshuati inkennini, yokhaani eegi Yoshuani duele keesaa ingussini.