Jaallaboota 18 - KITAABA WAAQA

¹ Gaafasi hayyuuni Israeli keesa injiru. Gaafasi gochiti Dani lafa qutuma barbaaduu jirti; wonti akanatiifi worri gosa Israeli keesaa d'aala lafaa inarganne.

² Jennaani gochiti Dani nama shani jajanna gosa ufi keesaa fohate, dira Zorafi Eshtaoliti keesa dooya ergani. Lafa gareeni ta Efraimutini baanaani mana Mika keesa taani.

³ Ato achi jiranu, worri qonqo kaimticha Lawi kaani beekhe itigorani Maaniti armaani si d'ufe? Huji maani arma qabda? jed'ani gaafatani.

⁴ Inni waan jed'eeni, Nu yayu Mikaani woli d'anne, aka inni hori naa baase, anileeni qaallu isaa tahu.

⁵ Worri waan jed'eeni, Me abbo, Waaqa nuu kad'ad'u, aka imaltuni nu yaanu tumini milkooftu.

⁶ Qaallichi waan jed'eeni, Woma insodaatina, nagumaani yaa, imaltuni teesani harka AABBO Waaqa keesa jirti.

⁷ Jennaani jari kaani shananu kae yae, dira Laishatini bahe, worri aka biyyiti sunini akuma worra Sidoni ufuma dagu ch'iiftu arge. Worri worra nagaya qabu ka nama tokoleeni woliind'amne ka waan fed'ani ch'ufa qabu. Worri worra Sidonile iraa fago jira, nama tokole woma iraa inqabu.

⁸ Worra shanani kaani Zorafi Eshtaoliti gallaani, biyyiti, maani gartani? jette gaafatte.

⁹ Worri waan jed'eeni, Dubbi d'ibi lakisa, koota nu yaasa, worra Laishi inhaana. Lafa ya argine maachine, arma chiiftani, ka woma intolchine afaani ind'aanina, kaa hurrisa lafa suni fud'ad'a!

¹⁰ Yo isani achini baatani biyya dagu jirtu agartani laftileeni ballo wonti nami fed'u ch'ufti keesa jirti, ammalle Waaqi ya harka keesaniti kenne.

¹¹ Jennaani nami d'ibba jaa ka gosa Dani lolaa kurfefate, Zorafi Eshtaoli keesaa kae.

¹² Kiriath-Yearimu ta lafa Yuda keesati, bulani. Tanaafi fulla suni arrale bulto Dani jed'ani.

¹³ Worri Achi kae, mana Mika, ka gaareeni Efraimu keesa jiru, d'ufe.

¹⁴ Jennaani worri shanani kaani ka lafa d'aatu Laishi dooyate, waan wahela worratiini jed'e, Isani aka maneeni tana toko keesa, akheekhi mukha ka boch'aani qarsiini mat'ansani kad'atani jiru beetu? Ammalle akheekha kad'atani d'ibifi waan efodi jed'aniti jira, akasi beetu? Nu maani tahu male re?

¹⁵ Duuba mana Mika, fulla kaimtichi Lawi kaani tauti gorani, aka inni fidamu gaafatani.

¹⁶ Haga worri tana harkaa qabu, duuli Dani, nami d'ibba jaa, ka lolaa kurfae, fullo keesa ch'iisa.

¹⁷ Worri dooyaa kaani shanani mana olduude, akheekha mukha ka boch'ani qarsiini mat'ansani kaanifi akheekha d'ibifi woni efodi jed'ani kaani fuud'ani itiini d'aabatani, ka qaallichi nama d'ibba jaa sunini fulla fulloo woliini jiru.

¹⁸ Hojja jari mana Mika olseene miha woyyuma kaani fuud'e, qaallichi waan jed'eeni, Isani maani tolchitani?

¹⁹ Worri waan jed'eeni, Afaani qabad'i, indubbatiini, nu gula kooti qaallufi abba mala nu tahi. Fulla atini qaallu worra nama tokoti taatu, qaallu gosa Israeliti tahu infeetu?

²⁰ Dubbini tunini qaallicha gammachiifte, inni miha woyyuma suni fud'ate, worra woliini iti d'aabate.

²¹ Jennaani worri garagale, ijoolleefi loonifi waan worri qabu ch'ufa ufi dura aanse, kae iti d'aabate.

²² Eegi worri mana iraa fagaate, Mikaani olla isaa lola wolti baase worra Dani kaani hordofe d'aqabe

²³ iti iyye. Worri Dani Mikati garagale waan jed'eeni, Maaniti lafa jira ka atini duula kana ch'ufa baaftufi?

²⁴ Mikaani waan jed'eeni, maanti lafa jira akami? Qaallu kiyyafi waaqa anini mid'aafad'e ch'ufa ya fud'atani itiini d'aabatani, maanti na hafe?

²⁵ Worri Dani waan jed'eeni, Atini woma dubbachu himmalle, hegeri worra kana dallansiifte ufi haasiifta, duuba hegeri siifi worri kankeleeni inhobaa.

²⁶ Akasi jennaani kaani iti d'aabatani. Mikaani aka worri isa ira irre qabu arginaani garagale worra ufiti deebie.

²⁷ Worri Dani waan Mikaani mid'aafatefi qaallu isale fuud'e dira Laishi, ka dagu jiru, d'ufe, nama keesa jiru fit'e dirale gube.

²⁸ Waan diri sunini Sidoni iraa fago jirufi, ammalle waan worri nama d'ibiini woma wolira inqamneefi nama buale d'abani. (Diri sunini bale, Bethnehobu keesa jira.) Worri Dani dira kaani deebie jaare ke qubate.

²⁹ Maqa isaa Laishi iraa Daniti jijirani, maqa ababo worraa Dani, ilma Yakobo gula.

³⁰ Worri Dani akheekha boch'ani kaani old'aabe kad'ate, ammalle Yonathani, ilmi Gershomu, akhaakhuni Musa, gosa Daniti qaallu tahe, d'alooti isaaleeni qaallu tahe, haga worra Israeli qabani boojianiti.

³¹ Akheekhi Mikaani boch'e mid'aase kaani haga Waaroni Woyyuma Shilo jirtu achiti hafe.